15
Ra ma chi iluxe enda naná
1 Biiya sti seña naro'ba ibá' dede bidxagayaa. Biiya gadxe ángel naaze gadxe plaga, ma ra iluxe enda naná, purti ma ne nga tidi xiana sti Dios.
2 Ne laca biiya xiixa ruluí espeju nucha gui, ti lapa si nexhe ni casi ra'ta nisadó'. Ne uriá ni zuhuaa cani qué nusisaca dxa mani ngola que ne bidó' sti', ne qué nicaa seña stime. Naaze cabe arpa ni bidii Dios laacabe. 3 Cayuunda cabe cantu bi'nda Moisés ni bi'ni xhiiña Dios que, ne sti Dendxu huiini que. Na ni:
Naro'ba ne de enda ridxagayaa irá ni runi lu',
Señor Dios ni jma nandxó'.
Jneza ne sicarú irá ni riguixhe lu',
lii ni runi mandar irá guidxi.
4 Tuu nga qué idxibi lii ne usisaca lii ya', Señor,
purti iruti ru casi lii.
Ne zeda uzuxibi irá binni xa ñee lu'
purti ma bihuinni jneza ni runi lu'.
5 Oraque biya dxie ne biiya zuxele yu'du ro' sti Dios ni nuu ibá', lugar ni jma nandxó'. 6 Ne biree gadxe ángel naaze plaga que ndaani ni, nacu lari quichi', nayá guie' dede ruzaani', ne xi' cinturón de oro xpechu cabe. 7 Bidii ti bultu nabani que cada tobi de laacabe ti copa de oro. Dxá ca copa que de xiana sti Dios ni qué ziuu dxi gati'. 8 Ne bichá enda risaca ne enda nandxó' sti Dios yu'du que de gu'xhu'. Ne iruti ñanda ñuu dede ora ma birá idubi gadxe plaga ni né ca ángel que.