1 Bezaleli kazenga kilingo cha kulukuzila nhosa cha m'biki wa mjoholo, utali wake na ugazi wake ukala ukiilinga. Utali wake ukala meta 2.2, ugazi wake ukala meta 2.2, na wimo wake ukala meta 1.3. 2 Katenda mhembe kuna zimhembe nne za ikilingo cha kulukuzila nhosa. Zimhembe zisongoligwa kulawa mkigogo cha idibiki ditendile ikilingo cha kulukuzila nhosa, na kazigubikiza na shaba. 3 Kavitenda via vose va ikilingo cha kulukuzila nhosa, nongo za kwikila mitozi, makulega, mikungu, uma, na vizolelo va kuzolela moto. Via vino vose vikala vitendigwe na shaba. 4 Katenda lwavu lwa shaba na kulwika hasi ya ulugigo lwake, lwenza lwa ikilingo cha kulukuzila nhosa kulawa hasi. 5 Katenda vitindi vine na kuvigwasika hana izimhembe nne za ulwavu lwa shaba sama ya kwingizila izifimbo za kupapila ikilingo cha kulukuzila nhosa. 6 Katenda fimbo za m'biki wa mjoholo, na kuzigubikiza na shaba. 7 Kazisomeka izifimbo m'vitindi vili mumgwazo wa ikilingo cha kulukuzila nhosa, na izifimbo zilawila ng'ambu zose mbili za ikilingo, na izifimbo ziwa vipapilo va ikilingo. Kakitenda ikilingo na mbamha za m'biki wa mjoholo, na kikala kamba sanduku dipongole.

8 Katenda teleko da shaba na kikalilo chake cha shaba kulawa m'viwowo vikalile va watwanzi wakalile wosang'hanika hanhu ha kwingilila mdihema da kuiting'hanila.

9 Abaho katenda konhi da idihema da kuiting'hanila. Ng'ambu ya kusi ya idikonhi katungika miguo itendigwe na kitani inogile isokotigwe, ikalile na utali wa meta 44, 10 nguzo zake malongo mabili na vikalilo vake malongo mabili vikala va shaba, ila iving'hwangwalingo va izinguzo na kabali zake zikala za madini ga feza. 11 Vivija ng'ambu ya kaskazi ya idikonhi katungika miguo ikalile na utali wa meta 44, nguzo zake malongo mabili na vikalilo vake malongo mabili vikala va shaba, ila iving'hwangwalingo va izinguzo na kabali zake zikala za madini ga feza. 12 Ng'ambu ya uswelo wa zua kukala na miguo ikalile na utali wa meta 22, hamoja na nguzo longo dimwe na vikalilo longo dimwe. Ving'hwangwalingo na kabali zake zikala za madini ga feza. 13 Ng'ambu ya ulawilo wa zua, kukalile na hanhu ha kwingilila, vivija kukala na ugazi wa meta 22. 14 Miguo ili na utali wa meta 6.6 ikala ng'ambu imwe, hamoja na nguzo ndatu na vikalilo vidatu, 15 na miguo ili na utali wa meta 6.6 ikala ng'ambu iyagwe, hamoja na nguzo ndatu na vikalilo vidatu. 16 Miguo yose izunguluke idikonhi ikala ya kitani inogile isokotigwe. 17 Ivikalilo va izinguzo vikala va shaba, ila iving'hwangwalingo na izikabali za izinguzo zikala za madini ga feza, na izisota za izinguzo zigubikizwa na madini ga feza. Avo nguzo zose za idikonhi zifungigwa na kabali za madini ga feza. 18 Watenda guo da kutungika hanhu ha kwingilila mdikonhi na nyuzi za buluu, zambalau, na ndung'hu, na kitani inogile isokotigwe, na kuhambigwa na muhambaji. Dikala na utali wa meta 9 na wimo wa meta 7.5, na dilinga na miguo iyagwe izunguluke idikonhi. 19 Dikala ditungikwe mzinguzo nne zikalile m'vikalilo vine va shaba, ving'hwangwalingo vake na kabali zake zikala za madini ga feza, na izisota za izinguzo zigubikizwa na madini ga feza. 20 Vigingi vose va idihema da kuiting'hanila na vigingi vose vizunguluke idikonhi vikala va shaba.

21 Kino kicho kiasi cha vinhu vizengile hema da kuiting'hanila, hema ajo mgati yake kukalile na mbamha mbili za mabwe zikalile zandikigwe Ndagizi Longo Dimwe. Vinhu vino vilagizwa na Musa, na Walawi wavitenda wolongozwa na Isamali, mwana wa mkulu wa nhambiko Haloni. 22 Bezaleli, mwana wa Uli, mzukulu wa Huli, wa mtala wa Yuda, katenda gaja gose MNDEWA gayamulagize Musa. 23 Kakala yotazigwa na Oholiabu, mwana wa Ahisamaki, kulawa mtala wa Dani, yakalile galu wa kusongola, kuvumbula namna ya kutenda vinhu, na kufuma na nyuzi za buluu, zambalau, na ndung'hu, na kitani inogile. 24 Zahabu zose zizengele hema da kuiting'hanila, kulawa mzizahabu zilavigwe nhosa mkwinuligwa ha MNDEWA, zikala na tani 1, ipimigwe kulingana na kipimilo kili mdihema da kuiting'hanila. 25 Madini ga feza gasangigwe na ididale da wanhu wakalile wapetigwe gakala na uzami wa tani 3.43, kulingana na kipimilo kili mdihema da kuiting'hanila. 26 Kiasi kino kilinga na mheta ya wanhu wose wapetigwe, kila munhu kaliha kiasi kilingile, kulingana na kipimilo kili mdihema da kuiting'hanila. Kukala na wambigalo alufu mia sita na ndatu na mia tano na malongo matano (603,550) wali na milao malongo mabili na kugendelela wakalile wapetigwe mkipigiti cha kupetigwa. 27 Tani 3.4 za madini ga feza zizenga vikalilo mia va idihema da kuiting'hanila na vikalilo va idiguo da kudikikiwizila Idisanduku da Lagano, kila kikalilo kimwe kizengigwa na kilo malongo madatu na nne za madini ga feza. 28 Na kilo malongo madatu za madini ga feza zisigale, katenda ving'hwangwalingo va izinguzo, kazigubikiza sota zake, na kuzitendela kabali. 29 Vivija wanhu walava nhosa ya shaba kilo alufu mbili na mia nne malongo mabili na tano (2,425), 30 na shaba ino watenda vikalilo va nguzo za hanhu ha kwingilila mdihema da kuiting'hanila, na ikilingo cha kulukuzila nhosa, hamoja na lwavu lwake lwa shaba, na via vose va ikilingo cha kulukuzila nhosa, 31 vivija watenda vikalilo va nguzo zinulize imiguo dizunguluke idikonhi, vikalilo va nguzo zinulize imiguo ya hanhu ha kwingilila mdikonhi, hamoja na ivigingi vose va idihema da kuiting'hanila na idikonhi.