1 Mkipigiti cha mndewa Amlafeli wa Shinali,*Shinaliiyo isi ya Babelonia. mndewa Alioki wa Elasali, mndewa Kedolaomeli wa Elamu, na mndewa Tidali wa Goimu, 2 wandewa wano watenda ng'hondo na mndewa Bela wa Sodoma, mndewa Bilisha wa Gomola, mndewa Shinabi wa Adima, mndewa Shemeba wa Seboimu, na mndewa wa Bela ama mtwaga diyagwe Soali. 3 Wandewa wano watano wawaduganya hamoja asikali zao Mdibonde da Sidimu, ajo dikemigwe Bahali ya Munyu. 4 Wakala hasi ya utawala wa mndewa Kedolaomeli mkipigiti cha milao longo dimwe na mibili, ila mmulao wa longo dimwe na midatu, wainega na heyo. 5 Mmulao wa longo dimwe na mine, mndewa Kedolaomeli na wandewa wakalile hamoja na heyo weza na kuwahuma Walefai ako Ashitelosi-Kalinaimu, Wazuzi ako Hamu, Waemi ako Shawe-Kiliasaimu, 6 na Waholi muisi ya vigongovigongo ya Seili mbaka Eli-Palani behi na luwala. 7 Abaho wahinduka kukisogo na kuchola Kadeshi, itangigwe mtwaga diyagwe Eni-Mishipati. Waisola isi yose ya Waamaleki, na kuwahuma Waamoli wakalile wokala mkiwambo cha Hasasoni-Tamali.

8 Abaho wandewa wa Sodoma, Gomola, Adima, Seboimu, na Bela wawaduganya asikali zao sama ya kutenda ng'hondo Mdibonde da Sidimu na kugomba na 9 Kedolaomeli mndewa wa Elamu, Tidali mndewa wa Goimu, Amlafeli mndewa wa Shinali, na Alioki mndewa wa Elasali. Wandewa wane wagomba na wandewa watano. 10 Bonde da Sidimu dikala dimemile mikolongo ya lami, na iwandewa wa Sodoma na Gomola hamoja na asikali zao viwakimbile kulawa hana ing'hondo, wanhu wayagwe walagalila mmikolongo hiyo, na wanhu wasigale wakimbilila kuvigongo. 11 Waja iwandewa wane wasola kila kinhu kulawa Sodoma na Gomola, wasola na vakuja, abaho wachola. 12 Loti, mwana wa ndugu yake Ablam, kakala yokala Sodoma, avo wamsola heyo na vinhu vake vose.

13 Abaho munhu imwe yakalile yahonyokwe, keza na kumulongela Ablam Mueblania. Ablam kakala yokala behi na mibiki mikulu ya mwaloni ya munhu imwe yakemigwe Mamle Mwamoli, ndugu wa Eshikoli na Aneli, awo wose wakalile hamoja na Ablam. 14 Ablam viyahulike kamba ndugu yake kagogigwa, kawakema wanhu wa ng'hondo mia ndatu na longo dimwe na wanane hang'hambi yake, wanhu waleligwe mng'anda yake, kawakoleleza waja iwandewa wane mbaka mkiwambo cha Dani. 15 Viwavikile haja Ablam kawagola wanhu zake mmadalemadale. Viivikile ikilo, wawavamhila waja iwandewa wane na kuwahuma. Kawawinga mbaka kiwambo cha Hoba, kasikazi ya wambo da Damaski. 16 Avo kavibweza vinhu vose vikalile visoligwe, na kum'bweza Loti ndugu yake na vinhu vake, hamoja na watwanzi na wanhu wayagwe.

17 Ablam viyabwelile kipigiti viyeshile kumuhuma Kedolaomeli na wandewa wayagwe wakalile na heyo, mndewa wa Sodoma keza kuiting'hana na heyo Mdibonde da Shawe, ajo vivija dikemigwe Bonde da Mndewa. 18 Na Melikizedeki, mndewa wa Salemu na mkulu wa nhambiko wa Mulungu Mkulu Ng'hani, kamgalila Ablam mkate na divai, 19 kammoteza, na kumulongela, “Mulungu Mkulu Ng'hani, heyo yalumbile ulanga na isi, yammoteze Ablam! 20 Yayenzigwe Mulungu Mkulu Ng'hani, ayo yakutendile gweye uwahume wadumuka zako!” Na Ablam kamgwelela Melikizedeki zaka ya vinhu vose viyabwelile navo.

21 Mndewa wa Sodoma kamulongela Ablam, “Nigwelele wanhu zangu, ila vinhu vuupatile hiko sigala navo.” 22 Ila Ablam kamulongela mndewa wa Sodoma, “Nimduilila MNDEWA, Mulungu Mkulu Ng'hani, yalumbile ulanga na isi, 23 kamba sisola kinhu chako chochose, luzi ama luzabi lwa kilatu, giladi sambiulonge, ‘Nie iyo nimtendile Ablam yawe mgoli.’ 24 Nie mwenyego sisola kinhu chochose, ila notogola kija kiwadile wanhu zangu, na dija idifungu da wanhu wacholile kung'hondo hamoja na nie, kina Aneli, Eshikoli, na Mamle.”