1 Ablam viyakalile na milao malongo tisa na tisa, MNDEWA kamulawilila, kamulongela, “Nie iyo Mulungu Mwene Mhiko. Nitegeleze nie na sambiuwe na mbuli na munhu. 2 Noditenda lagano jangu hagatigati yangu nie na gweye, na nie nolongeza lukolo lwako.” 3 Ablam kagwa kingubanguba. Abaho Mulungu kamulongela, 4 “Noditenda lagano dino na gweye. Nokwika kilagano kamba gweye kowa tata wa ndewa bwando. 5 Twaga jako hadikemigwa Ablam,*Mkieblania Ablamnhegulo yake tata yenuligwe. ila Ablaham,†MkieblaniaAblaham nhegulo yake tata wa ndewa bwando. kwavija nokutenda gweye kuwa tata wa ndewa bwando. 6 Nokutenda wongezeke ng'hani. Lukolo lwako lokwiza kuwa ndewa bwando, na wandewa wolawa kumwako.

7 “Nodigoga lagano jangu diniilagane na gweye hamoja na lukolo lwako londalwize kulawa mulelo umwe mbaka mulelo uyagwe, na kino chowa kilagano cha gunge na gunge. Mazua gose nie nowa Mulungu wako gweye na Mulungu wa lukolo lwako londalwize. 8 Nokugwelela gweye na lukolo lwako isi ino yuukala sambi kamba muhenza. Isi yose ya Kanaani yowa ya lukolo lwako milongo yose, na nie nowa Mulungu wao.”

9 Mulungu kamulongela Ablaham, “Gweye vivija kolondigwa udigoge lagano jangu, wose gweye na lukolo lwako londalwize. 10 Dino dijo lagano jangu na gweye na lukolo lwako londalwize. Kila mbigalo mmwanza wenu kolondigwa yengile kumbi. 11 Molondigwa mwingizigwe kumbi, na chowa kilaguso cha lagano hagatigati yangu nie na mweye. 12 Kulawa sambi kolondigwa umwingize kumbi kila mwana mbigalo kipigiti yahavikiza mazua manane, nyakadala yaleligwe mng'anda yako na nyakadala yaguligwe kulawa ha wahenza awo walekile kulawa mulukolo lwako. 13 Kila mbigalo kolondigwa yengizigwe kumbi, na mbuli ino yowa kilaguso cha lukuli kulagusa kamba lagano jangu diniilagane na gweye dowa lagano da digunge. 14 Mbigalo yalekile kwingila kumbi, heyo hapetigwa kuwa munhu wangu, kwavija hadigogile lagano jangu.”

15 Vivija Mulungu kamulongela Ablaham, “Kulawa sambi sambiumkeme mtwanzi wako twaga dikemigwa Salai, ila twaga jake dowa Sala.‡Mkieblania Sala nhegulo yake mndele wa mndewa. 16 Nommoteza, na nokugwelela mwana kubitila heyo. Nommoteza, na heyo kowa mama wa ndewa bwando, na wandewa wa wanhu wolawa kumwake.”

17 Ablaham kagwa kingubanguba, kaseka, na kuilongela mwenyego, “Munhu yali na milao mia kodaha kulela mwana? Sala yali na milao malongo tisa kodaha kulela mwana?” 18 Ablaham kamulongela Mulungu, “Habali sambiumuleke Sumaili yawe muhazi wangu?”

19 Ila Mulungu kamulongela, “Bule, mtwanzi wako Sala kokulelela mwana, na gweye komgwelela twaga Isaka.§Mkieblania Isaka nhegulo yake kiseko. Lagano jangu noditenda na heyo hamoja na lukolo lwake londalwize. Dino dowa lagano da digunge. 20 Mmbuli ya Sumaili, nigahulika gaja gaulondile, avo nommoteza na kumgwelela wana bwando na lukolo bwando. Heyo kowa tata wa wana wa mndewa longo dimwe na wabili, na lukolo lwake lowa undewa mkulu. 21 Ila lagano jangu noditenda na Isaka, ayo Sala yondayakulelele gweye mkipigiti kamba kino cha mulao ukwiza.” 22 Viyeshile kulonga na heyo, Mulungu kachola uchana kulawa ha Ablaham.

23 Mdizua didija Ablaham kamsola mwanage Sumaili na wambigalo wose waleligwe mng'anda yake na waja waguligwe, kawengiza kumbi, kamba Mulungu viyamulongele. 24 Ablaham kakala na milao malongo tisa na tisa kipigiti viyengizigwe kumbi, 25 na mwanage Sumaili kakala na milao longo dimwe na midatu. 26 Ablaham na mwanage Sumaili, wose wabili wengizigwa kumbi mdizua dimwe. 27 Na kila mbigalo yali mmulango wa Ablaham, nyakadala yaleligwe mng'anda yake na nyakadala yaguligwe kulawa ha wahenza, wengila kumbi hamoja na heyo.