1 Yakobo kagendelela na mwanza wake na kavika muisi ya wanhu wa ulawilo wa zua. 2 Hiko kona sima mumgunda, na madale madatu ga ng'hondolo gahumula hamgwazo wa idisima, kwavija madale gakala gong'wezigwa mazi kulawa mdisima dija. Na dibwe dikalile digubike idisima dija dikala kulu. 3 Ikala nzoela ya wachunga kuibeta mbaka kipigiti madale gose ga ng'hondolo vondagaiduganye, avo wachunga ng'hondolo wadibimbilisa idibwe kulawa hamulomo wa idisima, na kuwang'weza iwang'hondolo. Abaho wadibweza idibwe haja hadikalile hana umulomo wa idisima.

4 Yakobo kawauza iwachunga ng'hondolo, “Ndugu zangu, mweye molawa kwahi?”

Wedika, “Tweye tolawa Halani.”

5 Kawauza, “Mumtanga Labani mzukulu wa Naholi?”

Wedika, “Tumtanga.”

6 Yakobo kawauza, yolonga, “Mpile?”

Wedika, “Mpile.” Walonga, “Lola, mwanage ija haja kokwiza na dale jake da ng'hondolo.”

7 Yakobo kawalongela, “Loleni, zua hadinahonga, kipigiti cha ng'hondolo kuwasa hakinavika, wang'wezeni mazi iwang'hondolo na muwagale wakaje.”

8 Avo hewo walonga, “Hatudaha kutenda avo, mbaka madale gose vondagaiduganye hamoja, na idibwe vondadibimbiliswe kulawa haumulomo wa idisima, abaho towang'weza mazi iwang'hondolo.”

9 Kipigiti Yakobo viyakalile yogendelela kuwalongela iwachunga, Laheli keza na ng'hondolo wa tataake, kwavija heyo kakala yowachunga. 10 Yakobo viyamonile Laheli mwanage Labani lumbu ja mamaake, na viyadiwene dale da ng'hondolo wa Labani, kachola kudibimbilisa idibwe kulawa haumulomo wa idisima, na kuwang'weza ng'hondolo wa mjombaake. 11 Abaho, Yakobo kamnonela Laheli, na kusonga kulila na dizwi kulu, 12 na kumpetela kamba, heyo kakala ndugu wa tataake, mwanage Lebeka.

Avo Laheli kakimbilila ukae kachola kumpetela tataake. 13 Labani viyahulike mbuli za Yakobo mwana wa lumbu jake, kamkimbilila kam'bokela, kamkumbatila na kumnonela, abaho wachola ukae yake. Yakobo kampetela Labani mbuli zose zimulawilile. 14 Abaho Labani kamulongela, “Kweli gweye nyama yangu na mulopa wangu.” Yakobo kakala na heyo mulenge umwe.

15 Labani kamulongela Yakobo, “Kwavija gweye kwa ndugu yangu, havilumbile unisang'hanikile bule. Nongela choni chuulonda kiwe kitumetume chako.” 16 Labani kakala na wana wakitwanzi wabili, mkulu kokemigwa Lea na mdodo kokemigwa Laheli. 17 Lea kakala na meso gavulale, ila Laheli kakala yanogile mkiwiliwili na mkihanga.

18 Yakobo kanogelwa na Laheli, avo kamulongela Labani, “Nokusang'hanikila milao saba, sama ya kumsola mwanago mdodo Laheli.”

19 Labani kamulongela, “Vinoga nikugwelele gweye umsole sio munhu iyagwe yoyose. Kala hano hamoja na nie.” 20 Avo Yakobo kamsang'hanikila milao saba sama ya kumpata Laheli, Yakobo kachona kipigiti kija kiguhi kwavija viyanogelwe na Laheli.

21 Abaho Yakobo kamulongela Labani, “Nigwelele mtwanzi wangu, kipigiti changu kimala, na nolonda niwase nayo.” 22 Avo Labani kawakema hamoja wanhu wose wa hanhu haja na kutenda lusona lwa zengele. 23 Viivikile ikilo, Labani kamsola Lea mwanage na kumgwelela Yakobo, na heyo kawasa nayo. 24 Labani kamulava Zilpa nyakadala wake yamsang'hanikile Lea. 25 Viivikile imitondo, kumbe kakala Lea! Avo Yakobo kamulongela Labani, “Choni kino kiunitendele?” Yakobo kamuuza Labani. “Nikusang'hanikila milao saba sama ya Laheli. Habali univwizile?”

26 Labani kamulongela, “Ino sio nzoela yetu muisi yetu, yalongole kusoligwa mdodo abaho mkulu. 27 Mambukiza mazua gano saba ga lusona lwa zengele lwa ino imkulu, abaho nokugwelela Laheli kamba uhanisang'hanikila milao saba iyagwe.”

28 Yakobo katogola, kamambukiza mazua saba ga Lea, abaho Labani kamgwelela Laheli yawe mtwanzi wake. 29 Labani kamulava Bilha nyakadala wake yamsang'hanikile Laheli. 30 Avo vivija Yakobo kawasa na Laheli, na kamnogela ng'hani Laheli kubanza Lea. Yakobo kamsang'hanikila Labani milao saba iyagwe.

31 MNDEWA viyawene kamba Lea hanogeligwe ng'hani, kamfungula inda yake kamgwelela wana, ila Laheli kakala bule sambo. 32 Lea kapata inda na kamulela mwana mbigalo, kamgwaa twaga dikemigwa Lubeni,*Mkieblania Lubeni nhegulo yake Mndewa kawona mgayo wangu. kwavija kalonga, “MNDEWA kawona mgayo wangu. Kweli mbigalo wangu sambi konogelwa na nie.” 33 Lea kapata inda kabili na kamulela mwana mbigalo, kamgwaa twaga dikemigwa Simioni,†Mkieblania Simioni nhegulo yake tegeleza. kwavija kalonga, “MNDEWA kahulika kamba nie sinogelwe, avo kanigwelela mwana iyagwe.” 34 Lea kapata inda iyagwe na kumulela mwana mbigalo, kamgwaa twaga dikemigwa Lawi,‡Mkieblania Lawi nhegulo yake mwandakana. kwavija kalonga, “Sambi mbigalo wangu kowa behi ng'hani na nie, kwavija nimulelela wana mbigalo wadatu.” 35 Lea kapata inda iyagwe na kumulela mwana mbigalo, kamgwaa twaga dikemigwa Yuda,§Mkieblania Yuda nhegulo yake nhogolwa. kwavija kalonga, “Mwanza uno nomuyenzi MNDEWA.” Abaho Lea kema kulela.