1 Yakobo kawahulika walamu zake wana wa Labani wolonga, “Yakobo kasola vinhu vose vikalile va tataetu. Ugoli wake wose ulawa m'vinhu vayakalile navo tataetu.” 2 Yakobo kavitanga kamba Labani hanogelwe na heyo kamba viikalile haichanduso. 3 Abaho MNDEWA kamulongela Yakobo, “Bwela muisi ya wahenga zako na ndugu zako, nie nowa hamoja na gweye.”

4 Avo Yakobo katuma usenga kuwakema Laheli na Lea, weze kumgunda kuyakalile yochunga ng'hondolo zake. 5 Yakobo kawalongela, “Nokona kamba tataenu hanogelwa na nie kamba viikalile haichanduso, ila Mulungu wa tataangu ka hamoja na nie. 6 Movitanga kamba nimsang'hanikila tataenu na mhiko zangu zose. 7 Hata avo tataenu kanitendela uzenzeleganye mkugalula kitumetume changu mianza bwando. Ila Mulungu hamulekile yanhendele nie kinhu kihile. 8 Labani viyalongile, ‘Ng'hondolo wondawaleligwe wali na minyela wowa kitumetume chako,’ wose wasonga kulela wana wali na minyela. Na viyagalule na kulonga, ‘Wang'onyo wali na minhongo wowa kitumetume chako,’ ng'hondolo wose walela wana wali na minhongo. 9 Vino vivo Mulungu viyasolile wang'onyo wa tataenu na kunigwelela nie.

10 “Kipigiti cha wang'onyo kuikwela, nilota nyona songolomi wa menhe wakalile wokwela wose wakala na minhongo, minyela, na midewa. 11 Msenga wa Mulungu wa kuulanga kanikema nie muinzozi yolonga, ‘Yakobo,’ na nie nidika, ‘Nabaha.’ 12 Na heyo kanongela, ‘Lola songolomi wose wa menhe waja wokwela wana minhongo, minyela, na midewa. Nigatenda gano kwavija nyona vija Labani viyakutendele. 13 Nie iyo Mulungu nikulawilile kuja Beteli, hanhu haja haudigidile dibwe mavuta na haja haunitendele kiduilo. Avo segela hima muisi ino uchole muisi yako yuuleligwe.’ ”

14 Laheli na Lea wamulongela Yakobo, “Tweye twabule kinhu ama uhazi wowose kulawa ha tataetu. 15 Avo katutenda tweye kamba wahenza. Katuguza na sambi kaja hela zose ziyatuguzile tweye. 16 Ugoli wose Mulungu uyam'bokile tataetu wetu tweye na wanetu. Avo sang'hana gaja Mulungu gondayakulongele.”

17 Avo Yakobo kawakweleza watwanzi zake na wanage muna iwangamia, 18 na kugaswagiza madale gake gose galongole haulongozi wake hamoja na vinhu vose viyapatile Padani-Alamu*Padani-Alamu ya ako Kaskazi na Uswelo wa zua muisi ya Mesopotamia. na kuchola ha tataake Isaka muisi ya Kanaani. 19 Kipigiti hicho Labani kakala yacholile kuwakanha mijusu ng'hondolo zake, avija viyakalile haduhu Laheli kapata nafasi ya kwiba vinyago avo vikalile miungu ya tataake. 20 Yakobo kam'vwizila Labani na hamulongele kamba kohalawa. 21 Yakobo kasola vinhu vake vose na kusegela hima. Kaloka Lwanda lwa Yuflati, kagalukila kuili isi ya Gileadi ili na vigongovigongo.

22 Mazua madatu vigabitile, Labani kalongeligwa kamba Yakobo kakimbila. 23 Avo Labani kawasola ndugu zake, wasonga kumkweleleza Yakobo kipigiti cha mazua saba, na wam'vika muisi ya vigongovigongo ya Gileadi. 24 Avo Mulungu kamulawilila Labani ikilo mnzozi na kumulongela, “Uteganye, sambiumulonge Yakobo mbuli yoyose ihile.” 25 Yakobo keka ng'hambi muisi ya vigongovigongo ya Gileadi, vivija Labani na ndugu zake weka ng'hambi yao behi na heyo.

26 Abaho Labani kamulongela Yakobo, “Choni chuutendile? Kunivwizila na kusola wanangu kamba vija wagogigwe kung'hondo. 27 Habali usegele mkuifisa na kunivwizila? Habali hunongele giladi nikulage na ndeng'ha na nyila, na ngoma na bango? 28 Hata hunilekile niwanonela wanangu na wazukulu zangu na kuwalaga? Kweli kutenda ubozi. 29 Nodaha kukulumiza, ila Mulungu wa tataako kandawilila kilo ya lelo na kanongela, ‘Uteganye, sambiumulonge Yakobo mbuli yoyose ihile.’ 30 Novitanga kamba kosulukila kubwela mng'anda ya tataako, ila habali wibile miungu yangu?”

31 Yakobo kalonga, “Nidumba kwavija nigelegeza kamba uhanibokile wanago. 32 Ila kamba uham'vika munhu yoyose mmwanza wetu yali na miungu yako, nayadanganhike. Lolesa bahano haulongozi wa ndugu zetu, kamba nna kinhu chako chochose, kisole.” Yakobo havitangile kamba Laheli kakala yebile miungu ya Labani.

33 Avo Labani kengila mdihema da Yakobo na kasonga kuzahila, abaho mdihema da Lea, na mdihema da waja nyakadala wabili wakitwanzi, ila hayonile miungu yake. Abaho kengila mdihema da Laheli. 34 Laheli kaisola ija imiungu na kuifisa mdisogi da kugwasikila mumgongo wa ngamia wake na kuikalila. Labani kazahila kila hanhu mdihema ila hayonile. 35 Laheli kamulongela tataake, “Tataangu, sambiunyonele lusango avija vinihila kwinuka haulongozi wako, kwavija notumika.” Avo Labani kazahila ila hayonile miungu yake.

36 Yakobo kehilwa ng'hani na kumuuza Labani, “Halihi hanihonyele? Choni kihile kinitendile kikutendile gweye unikoleleze?” 37 Kusakula m'vinhu vangu vose. Kinhu chaki chako kiupatile? Vike hano haulongozi wa wandugu zako na wandugu zangu, giladi watulamule. 38 Nikala hamoja na gweye milao malongo mabili sambi. Kipigiti chose ng'hondolo zako na menhe zako hawanatengula inda, na sinakuja songolomi wa ng'hondolo kulawa mdale jako. 39 Sikugalile ng'hondolo wako yakomigwe na wang'onyo wa kumuhulo. Hasala zose nizisola nie. Gweye kulonda nikulihe wang'onyo wose webigwe imisi ama ikilo.

40 Kipigiti kitali nigaya, imisi nilukuzwa na zua, na ikilo nibunhigwa na beho. Sipatile utulo. 41 Milao malongo mabili nikala mng'anda yako, nikusang'hanikila milao longo dimwe na mine sama ya Laheli na Lea, na milao sita sama ya madale ga wang'onyo. Kugalula kitumetume changu mianza longo dimwe. 42 Kamba Mulungu wa muhenga zangu, Mulungu wa Ablaham na Isaka, yahalekile kuwa hamoja na nie, uhaniwingile bila kinhu. Ila Mulungu kayona migayo yangu na sang'hano initendile, kileka mana kakukomhokela ikilo ibitile.

43 Labani kamwidika Yakobo na kumulongela, “Watwanzi wano wanangu nie, na wana zao wangu nie, wang'onyo wano wangu nie, na vose vuuvona vangu nie. Avo choni kinidaha kuwatendela wanangu, ama wana zao wawalelile? 44 Avo tutende lagano gweye na nie, diwe usindila wetu.”

45 Yakobo kasola dibwe, na kudisimika kamba nguzo giladi diwe lukumbuso. 46 Abaho Yakobo kawalongela wandugu zake, “Lundizeni mibwe.” Avo wadondola mabwe na kugalundiza kamba kisugulu. Abaho wakala hasi hamgwazo wa kija ikisugulu, waja mandia. 47 Labani kahakema hanhu haja Yegali-Sahadusa,†Yegali-Sahadusa nhegulo yake muulonzi wa Kialamaiki lundi da usindila. na Yakobo kahakema Galedi.‡Mkieblania Galedi nhegulo yake lundi da usindila.

48 Avo Labani kamulongela Yakobo, “Kisugulu kino cha mibwe chowa usindila hagatigati yetu tweye.” Kino kicho kilamso cha hanhu haja kukemigwa Galedi. 49 Labani vivija kahakema hanhu haja Mizpa,§Mkieblania Mizpa nhegulo yake ulingo wa kwimilizila. kwavija kalonga, “MNDEWA yatulole, giladi tudigoge lagano dino kipigiti gweye na nie tuhawa kutali na miage. 50 Kamba uhawagaza wanangu ama uhasola watwanzi wayagwe mbali na wanangu, hata kamba sivimanyile, ukumbukile kamba Mulungu kotulola.” 51 Abaho Labani kamulongela Yakobo, “Lola kisugulu kino cha mibwe, lola nguzo ino iniisimike hagatigati yako na yangu. 52 Kisugulu kino cha mibwe na nguzo ino zizo usindila, nie sikibanza kisugulu kino cha mibwe kwiza ng'ambu yako kukulumiza, na gweye sambiubanze kisugulu kino cha mibwe na nguzo ino wize ng'ambu yangu kunilumiza. 53 Mulungu wa Ablaham na mulungu wa Naholi wotulamula gweye na nie.”

Avo Yakobo kaiduila mditwaga da Mulungu yakalile yotambikilwa na Isaka tataake kukigoga kilagano kija. 54 Abaho Yakobo kalava nhosa muisi ija ya vigongovigongo na kuwakema ndugu zake weze kuja mandia. Na viweshile kuja mandia wakala bahaja ikilo ngima. 55 Na imitondo ng'hani zua da ikabili Labani kawanonela wazukulu zake na wanage na kuwamoteza. Na abaho kabwela ukae yake.