1 Yakobo kakala muisi yaakalile tataake kamba muhenza, isi ya Kanaani. 2 Ino iyo simulizi ya mulango wa Yakobo.

Usufu viyakalile na milao longo dimwe na saba, kakala yochunga ng'hondolo na wakulu zake, wana wa Bilha na wana wa Zilpa watwanzi wa tataake. Usufu kamgalila tataake mbuli zihile ziwatendile wakulu zake.

3 Islaeli, ayo vivija yakemigwe Yakobo, kamnogela ng'hani Usufu kubanza wanage wasigale kwavija kamulela kipigiti cha uvyele wake, na kamtendela kanzu nhali ihambigwe. 4 Wakulu zake viwonile kamba tataao kamnogela heyo ng'hani kubanza hewo wose wasigale, wamwihila, na hawalongelele nayo goya.

5 Usufu kalota nzozi, na viyawalongele wakulu zake, wabanza kumwihila. 6 Kawalongela, “Tegelezeni nzozi ino inilotile. 7 Tweye tose tukala kumgunda tufunga makinza ga ngano, nidukila kinza jangu dinuka na kwima wima na mikinza yenu izunguluka kinza jangu na kudinamilila mbaka hasi.”

8 Wakulu zake wamuuza, “Kokwagiza gweye kowa mndewa wetu, kokwagiza gweye kotutawala tweye?” Avo wamwihila ng'hani kabisa sama ya nzozi yake na mbuli zake. 9 Abaho Usufu kalota nzozi iyagwe na kuwalongela wakulu zake, “Nilota nzozi iyagwe. Zua na mulenge na nhondo longo dimwe na imwe zininamilila nie mbaka hasi.” 10 Ila viyamulongele tataake kamba viyawalongele wandugu zake, tataake kamkomhokela na kumulongela, “Nzozi yaki ino yuulotile! Mamaako na nie na wakulu zako tokwiza na kukunamilila gweye mbaka hasi?” 11 Avo wakulu zake wamonela migongo, ila tataake kazika mbuli zija mmoyo.

12 Vuzimalile mbuli zino, wakulu zake wachola kuchunga ng'hondolo za tataao behi na Shekemu. 13 Na Yakobo kamulongela Usufu, “Wakulu zako wachola Shekemu kuchunga ng'hondolo, isasale nolonda kukutuma kumwao.”

Usufu kalonga, “Nhogola.”

14 Tataake kamulongela, “Genda ukawalole wakulu zako hamoja na iwang'hondolo kamba wana ugima, abaho ubwele unongele.” Avo tataake kamtuma Usufu kulawa Kudibonde da Hebloni.

Viyavikile Shekemu, 15 munhu imwe kam'vika yozungulukazunguluka muluwala, kamuuza, “Kozahila choni hano?”

16 Kalonga, “Nowazahila wakulu zangu. Nilongele kwahi kowachungila ng'hondolo zao.”

17 Ija imunhu kalonga, “Wasegela hano kwavija niwahulika wolonga, ‘Tucholeni Dotani.’ ” Avo Usufu kawakoleleza wakulu zake, kawavika Dotani.

18 Wamona songela viyakalile kutali, na kipigiti hanawakwenhukila, wamwikila zundo da kumkoma. 19 Wailongela, “Ayo mulota nzozi kokwiza. 20 Izoni tumkome abaho tumwase mdikolongo dimwe mmwanza wa mikolongo ino. Tulonge mng'onyo wa kumuhulo kamkoma. Abaho tulole malawililo ga nzozi zake.”

21 Lubeni viyagahulike gano, kalonda kumkombola kulawa mmakono gao. Kalonga, “Sambitumkome.” 22 Lubeni kawalongela, “Sambitwite mulopa wake, ila tumwase mdikolongo dino dili hano mmuhulo, ila sambimmulumize.” Lubeni kalonga vino giladi yamwihule kulawa mmakono gao yam'bweze ha tataake. 23 Usufu viyavikile ha wakulu zake, wam'vula kanzu yake nhali ihambigwe iyavalile. 24 Wamsola wamwasila mdikolongo dikalile bule kinhu, dikala bule mazi mgati yake.

25 Viwakalile hasi waje mandia, walola wona dale da Wasumaili wokwiza kulawa Gileadi, hamoja na ngamia zao wapapile ubane, zeli, na manemane,*Ubane, zeli, na manemane vikala vinhu vilawa muululu wa mibiki, vokwanikigwa na kunyala. na wakala mnzila wovigala Misili. 26 Yuda kawalongela wandugu zake, “Kamba tuhamkoma mdodo wetu na kuufisa mulopa wake, topata choni? 27 Izoni tumguze ha Wasumaili na sambitumulumize kwavija ino mdodo wetu, lukuli lwetu, na mulopa wetu.” Na ndugu zake watogola. 28 Avo waja iwachuuzi kulawa Midiani†Hano Wamidiani wao Wasumaili. viwakwenhuke, wakulu zake wamulava Usufu hanze ya idikolongo na kumguza ha Wasumaili kwa vidanga malongo mabili va feza,‡Kino kicho kiasi cha hela kiyalihigwe nyakadala wa kimbigalo. na wamsola na kumgala Misili.

29 Lubeni viyabwelile kudikolongo na kona kamba Usufu kahaduhu muja mdikolongo, kadega vivalo vake mkona giogio. 30 Kabwela ha wandugu zake na kuwalongela, “Immhale kahaduhu muja mdikolongo, nitendeze?”

31 Avo wasola kanzu ya Usufu, wamchinja menhe, waivubika ija ikanzu mmulopa. 32 Waisola ija ikanzu ihambigwe waigala ha tataao na kulonga, “Tuidondola kanzu ino. Ilole goya, siku yowa kanzu ya mwanago.”

33 Tataao kaitanga na kulonga, “Ino iyo kanzu ya mwanangu, mng'onyo mkali kamja. Mwanangu Usufu kadegigwa vidangavidanga.” 34 Abaho Yakobo kadega vivalo vake mkona giogio, kavala migunia, na kumulilila mwanage mmazua bwando. 35 Wanage wose wakimbigalo na wakitwanzi weza kumuhembekeza, ila kalema kuhembekezwa. Kalonga, “Nomulilila mwanangu mbaka vondaningile kuzimu.” Avo tataake kagendelela kumulilila.

36 Kipigiti kikija, viwavikile Misili, waja Iwamidiani wamguza Usufu ha Potifa, ayo yakalile imwe wa wakulu wa silikali, ayo vivija yakalile kilangizi wa wemilizi wa ng'anda ya Falao, mndewa wa Misili.