49
Mbuli za Kimambukizo za Yakobo
1 Abaho Yakobo kawakema wanage na kulonga, “Nikwenhukileni niwalongele gaja gondagawalawilile mmazua ga hamwande.
2 “Iduganyeni hamoja mtegeleze, mweye wana wa Yakobo.
Mtegelezeni tataenu, Islaeli.
3 “Lubeni, gweye iyo mwanangu wa udele, gweye iyo mhiko yangu
na mwana wa ichanduso wa umhale wangu.
Gweye iyo mkulu kubanza wose, na kuna mhiko kuwabanza wose.
4 Gweye kwa kamba mmemo wa mazi,
ila hauwa wa ichanduso tena,
kwavija gweye kuwasa na mtwanzi wangu wa kunze,
na kulunyolodosa lusazi lwa tataako.
5 “Simioni na Lawi hewo iwo ndugu, mizele yao iyo via va kutendela ukaini.
6 Siilumba hamoja nao kipigiti wahanyong'onya,
ama kuwa hamoja nao mmiting'hano yao,
kwavija sama ya lusango lwao, wawakoma wanhu,
na kuwagela ulemale ng'ombe sama ya mchezo.
7 Ndukumiza na iwe mulusango lwao, kwavija lukali ng'hani,
ndukumiza na iwe mng'hasilika zao, kwavija wana ng'hasilika ya kikaini.
Ng'holo zao nozipwililisila mwa wanhu wa lukolo lwangu,
nozipwililisila muisi yose ya Islaeli.
8 “Yuda,*Sio Yuda mwenyego, ila lukolo lwake. wandugu zako wokuyenzi,
mkono wako wowa msingo ya wadumuka zako.
Wandugu zako wokufugamila mavindi na kukwinamilila.
9 Yuda, mwanangu, ka kamba mwana simba,
kovikoma vija voyopelemba na kuvibweza ukae yake,
kokiigolosa na kutambalala.
Haduhu munhu yogeza kumgaza.
10 Fimbo ya kindewa haisegela mumkono wa Yuda,
na fimbo ya kindewa haisegela hana gamagulu gake,
mbaka vondayeze ayo mwene fimbo yake,
ayo yondayahishimilwe na ndewa zose.
11 Komfunga mwana mhunda wake mmizabibu,
hana imizabibu inogile ng'hani,†Mbuli zino nhegulo yake Yuda kowa na mizabibu bwando mbaka hona vihile kuwafunga wana mhunda zake mmizabibu.
kosuluza vivalo vake mdivai ndung'hu ng'hani.‡Mbuli zino nhegulo yake Yuda kowa na divai bwando mbaka iyagwe kosuluzila vivalo vake.
12 Meso gake madung'hu kubanza divai,§Mbuli zino nhegulo yake Yuda kong'wa divai bwando mbaka meso gake gowa madung'hu kamba divai.
meno gake mazelu kubanza matombo.*Mbuli zino nhegulo yake Yuda kong'wa matombo bwando ga ng'ombe mbaka meno gake gowa mazelu kamba matombo.
13 “Zabuloni†Sio Zabuloni mwenyego, ila lukolo lwake. kokala behi na mgwazo wa bahali,
na hanhu hoyokala heyo howa bandali,
undewa wake wovika kutali mbaka wambo da Sidoni.
14 “Isakali‡Sio Isakali mwenyego, ila lukolo lwake. kowa kamba mhunda mwene mhiko,
yatambalale hagatigati ya misogi yake,
15 kuno yohalola haja hayatambalale vihanogile,
na vija ija iisi viinogile.
Avo koganamiza maega gake yaipape imisogi,
na koigagahiza kusang'hanika kamba nyakadala.
16 “Dani§Sio Dani mwenyego, ila lukolo lwake. kowa mtawala wa wanhu zake.
Wowa kamba mitala iyagwe ya Islaeli.
17 Dani kowa kamba nyoka hamgwazo wa idigwang'wando,
nyoka yali na sumu hamgwazo wa inzila,
yomulumiza falasi mkisiginho,
avo ija yali uchana ya ifalasi kolagalila kukisogo.
18 “Noubeta ukombola wako, MNDEWA.*Mbuli zino nhegulo yake Yakobo koubeta ukombola wa Mndewa kulawa ha wadumuka zake.
19 “Gadi†Sio Gadi mwenyego, ila lukolo lwake. kovamhilwa na mibokonyi,
ila heyo kowavamhila m'visiginho vao.
20 “Migunda ya Asheli‡Sio Asheli mwenyego, ila lukolo lwake. yolava vakuja bwando,
kowa na mandia ga kuimemeza ng'anda ya mndewa.
21 “Naftali§Sio Naftali mwenyego, ila lukolo lwake. iyo mnokela yailegehe,
yolela wana wanogile.
22 “Usufu*Sio Usufu mwenyego ila lukolo lwake. ka kamba m'biki ulelile mujo, uli behi na nzokwe,
matambi gake gokwela hata kukibanza kiwambaza.
23 Wadumuka zake wam'vamhila na lusango,
wamwasila misale na kumgaza ng'hani.
24 Ila mhinde yake igendelela kuwa na mhiko,
na makono gake gagangamala,
sama ya Mulungu wa Yakobo Mwene Mhiko,
ayo vivija yokemigwa Mchunga, Dibwe da Islaeli.
25 Mulungu wa tataako inimtambikila nie yakutaze,
Mulungu Mwene Mhiko yakumoteze,
kokumoteza motelo za mvula kulawa uchana,
na mazi bwando kulawa hasi ya isi,
motelo za wang'onyo wofugigwa na wana.
26 Motelo za tataako ng'hulu,
kubanza motelo za migongo ya umwaka, zovika kuna zisota za ivigongo va gunge na gunge.
Motelo zino zose nazikale mditwi da Usufu,†Nhegulo ya mnhongo uno iyo Usufu kobokela motelo bwando kuwabanza wandugu zake.
ayo yali mndewa hagatigati ya ndugu zake.
27 “Benjamini‡Sio Benjamini mwenyego, ila lukolo lwake. ka kamba mbwizi mkali,
imitondo na ichungulo kogoga na kuja.”
28 Ino iyo mitala longo dimwe na mibili ya Islaeli, na gano gago gayalongile tataao kipigiti viyakalile yowalaga. Kammoteza kila imwe na motelo ziwalingile.
Ifa na Mazisi ga Yakobo
29 Abaho Yakobo kawalongela wanage, “Nie na mmabehi kudanganhika. Mnizike hamoja na wahenga zangu muimhango, mumgunda wa Efloni ija Imuhiti, 30 mhango ili mumgunda wa Makipela, behi na Mamle kuja Kanaani. Mhango iyagulile Ablaham kulawa ha Efloni Muhiti, hamoja na umgunda hawe hanhu ha kuzikila. 31 Kuja kuyazikigwe Ablaham hamoja na mtwanzi wake Sala, haja kuwazikigwe Isaka na mtwanzi wake Lebeka, na haja baho hanimzikile Lea. 32 Mgunda uja, uli na mhango mgati yake, uguligwa kulawa ha Muhiti.” 33 Yakobo viyamambukize kulava ndagizi zino ha wanage, kakunza magulu gake mkisazi, kadanganhika na kuilumba hamoja na wahenga zake.
*49:8 Sio Yuda mwenyego, ila lukolo lwake.
†49:11 Mbuli zino nhegulo yake Yuda kowa na mizabibu bwando mbaka hona vihile kuwafunga wana mhunda zake mmizabibu.
‡49:11 Mbuli zino nhegulo yake Yuda kowa na divai bwando mbaka iyagwe kosuluzila vivalo vake.
§49:12 Mbuli zino nhegulo yake Yuda kong'wa divai bwando mbaka meso gake gowa madung'hu kamba divai.
*49:12 Mbuli zino nhegulo yake Yuda kong'wa matombo bwando ga ng'ombe mbaka meno gake gowa mazelu kamba matombo.
†49:13 Sio Zabuloni mwenyego, ila lukolo lwake.
‡49:14 Sio Isakali mwenyego, ila lukolo lwake.
§49:16 Sio Dani mwenyego, ila lukolo lwake.
*49:18 Mbuli zino nhegulo yake Yakobo koubeta ukombola wa Mndewa kulawa ha wadumuka zake.
†49:19 Sio Gadi mwenyego, ila lukolo lwake.
‡49:20 Sio Asheli mwenyego, ila lukolo lwake.
§49:21 Sio Naftali mwenyego, ila lukolo lwake.
*49:22 Sio Usufu mwenyego ila lukolo lwake.
†49:26 Nhegulo ya mnhongo uno iyo Usufu kobokela motelo bwando kuwabanza wandugu zake.
‡49:27 Sio Benjamini mwenyego, ila lukolo lwake.