6
1 Bhoono, kwo okubha turakora emirimo hamwe na Taatabhugya, turabhiisasaama kubha orubhaango rwa Taatabhugya runo musuungʼaaniri, mutarutiga rubhure bhusa. 2 Taatabhugya arabhuga mu Makaamo Amahoreeru,
“Kwe eriibhaga rino rikweenderwa, nikakwiigwa,
orusiku rwo obhutuurya, nikakusakirya.”*Rora Isaya 49:8.
Ambe itegeerera, eriibhaga rino rikweenderwa ni rino, orusiku rwo obhutuurya ni runo!
Okwiikongʼeererya mumirimo gya Taatabhugya
3 Tutakumukorera omuutu wowoosi engʼana yoyoosi yino ekumubhiihira, okubha obhuhokya bhweetu bhutagaambwa bhubhi. 4 Nawe, tureerekya mumangʼana goosi kubha, etwe ni bhahokya bha Taatabhugya. Turiikongʼeererya bhukongʼu munyaako nzaru. 5 Tutemirwe bhubhi, tubhohirwe mukibhoho, na amahizo ga abhaatu bhatumwaayiiri. Tukoriri emirimo mikongʼu, tukateengeeza no okuraambuka ne enzara. 6 Kweeki turiiyeerekya kubha abhabhagati bha Taatabhugya kwo obhuheene, kwo obhumenyi, kwo obhwiikongʼeererya, kwo obhuzomu, kwo obhukaangati bhwe Ekoro Muhoreeru, kwo obhuseegi bhwe eheene 7 na kwo obhurwaazi bhwa amangʼana go obhuheene. Turakora gayo goosi kwo obhuturo bhwa Taatabhugya. Eheene nikyo ekigwaato kyeetu, orubhaara rwo obhuryo na rwo obhumosi.†Orubhaara rwo obhuryo na rwo obhumosi, obhugazuro bhwaku ni kubha, okubhoko kwo obhuryo nikwo kukugwaata ekigwaato, no okubhoko kwo obhumosi nikwo kukugwaata engubha yo okwiiriibha. 8 Etwe turamuhokeerya Taatabhugya, abhaatu bharaatusuuke kasi kutuzeera, bharaatukumye kasi kutugaamba bhubhi. Turarorekana kubha turi bhabheehi, nawe turagaamba obhuheene. 9 Turarorekana kya bhano tutamenyekeeni, nawe turamenyekana bhuzomu. Turarorekana kya bhano tukukwa, nawe turi bhahoru! Tutemirwe bhubhi, nawe tukyaari kwiitwa. 10 Turarorekana kya abhaatu bhe ebhigoongi, nawe eriibhaga ryoosi tuno obhuzomererwa. Turarorekana kya abhataka, nawe tubhaniibhirye bhaaru. Turarorekana tutana kyokyoosi, nawe tune ebhigiro bhyoosi.
11 Emwe Abhakoriinto, tugaambiri neemwe kubhweero bhukongʼu, kwo okubha turabhaseega kwe eziikoro zyeetu zyoosi. 12 Etwe tukyaari kutiga kubhaseega emwe, nawe emwe niimwe mutigiri kutuseega etwe. 13 Bhoono ndagaamba neemwe kya abhaana bhaane, kubha mubhe muratuseega kwe eziikoro zyeenyu zyoosi, kyeego etwe tukubhaseega emwe.
Okugwaatana na abhaatu bhano bhatari abhiikirirya
14 Mutagwaatana na abhaatu bhano bhatari abhiikirirya. Mbe, eheene no obhubhi bhuratura kwiigwaana heene? Obhweero ne ekiirima bhiraturabhwi kubha hamwe? 15 Kweeki Krisito na Beriari‡Beriari ni riina eriindi rya Seetaani. bharaturabhwi kwiigwaana? Omwiikirirya na wuno atari omwiikirirya bhano obhwiigwaanoki? 16 Bhuriho obhwiigwaanoki gati we eriiseengerero rya Taatabhugya ne emisaambwa gyo okubhaazwa? Etwe ni iseengerero rya Taatabhugya wuno ari muhoru!§Rora 1 Abhakoriinto 3:16; Abhaefeso 2:20-21. Kyeego Taatabhugya omweene akabhuga,
“Ndiikara hamwe nabho no okugeenda gati waabhu.
Ndabha Taatabhugya waabhu, nabho bharabha abhaatu bhaane.”*Rora Abharaawi 26:12; Yeremia 32:38; Ezekieri 37:27.
17 Kweego Omukuru akabhuga,
“Murwe gati waabhu, mwiiyaahure nabho.
Mutakunia kigiro ekinyaka,
niho neenye niraabhasuungʼaane.”†Rora Isaya 52:11.
18 Kweeki akabhuga,
“Ndabha Wuuso weenyu,
neemwe murabha abhamura na abhaakya bhaane.
Omukuru, Taatabhugya wo Obhuturo Bhwoosi abhugiri!”‡Rora 2 Samweeri 7:14; 1 Amangʼana ge Eriibhaga 17:13.
*6:2 Rora Isaya 49:8.
†6:7 Orubhaara rwo obhuryo na rwo obhumosi, obhugazuro bhwaku ni kubha, okubhoko kwo obhuryo nikwo kukugwaata ekigwaato, no okubhoko kwo obhumosi nikwo kukugwaata engubha yo okwiiriibha.
‡6:15 Beriari ni riina eriindi rya Seetaani.
§6:16 Rora 1 Abhakoriinto 3:16; Abhaefeso 2:20-21.
*6:16 Rora Abharaawi 26:12; Yeremia 32:38; Ezekieri 37:27.
†6:17 Rora Isaya 52:11.
‡6:18 Rora 2 Samweeri 7:14; 1 Amangʼana ge Eriibhaga 17:13.