Enyaarubha ku
Bheeburania
Obhutaangiro
Omukaami we enyaarubha ku Bheeburania atamenyekeeni kweetwe, eratura kubha omweega Pauro, Ruuka, Barinaaba, kasi wuundi. Omukaami we enyaarubha yino yaari Mukrisito wuno yaari amenyiri kisi Eriiragano rye Ekare. Abhasomi bhaaru bhariiseega kubha, enyaarubha yino ekaamirwe hano eriiseengerero rya Taatabhugya rya mumugye gwa Yerusaremu rikyaari kugwiisibhwa. Eriiseengerero riyo, rikagwiisibhwa omwaaka gwa miroongo muhuungati (70) okurwa hano Yeesu Krisito yiibhwiirwe.
Omukaami we enyaarubha yino, yaari arakaamira Abhakrisito bhe Ekiyahudi bhano bhaari bhakunyaakibhwa na abhaatu bhano bhaari bhakuhakania obhwiikirirya bhwaabhu. Omukaami yaari arabheerekya kubha Yeesu akaaza okukuunaania emigiro gya Musa kwo okwiiruusya kye ekimweeso kyo obhuriingʼaani, wuno ewe omweene aranagya okutuurya abhaatu. Akakora ego kwo okukaama emikiriri miroongo esaasabha (60) okurwa Mwiiragano rye Ekare rino rikweerekya kyeego Yeesu Krisito akakuunaania obhurooti na amahokya go omuseengeri omukuru wa Abhayahudi. Yeesu omweene aranagya okutuurya abhaatu, kwe ekigirirye ewe ni Mwaana wa Taatabhugya, Omuseengeri Omukuru omukuunaania.
Amiiseego go omukaami gaari ni kweerekya kubha Yeesu niwe akweerekya obhuguungo bhwa Taatabhugya. Niwe akukumiirirya kubha Krisito ni mukuru kukira maraika, abhakaangati na abhaseengeri bhoosi. Kwe enzira ya Krisito, abhaatu bhoosi bharasuungʼaana obhutuurya bhwe eheene.
1
Taatabhugya akeereenie kuhitira ku Mwaana waaye
1 Ekare hayo, Taatabhugya akakeerenia na bhazaazi bheetu maanga maaru kwa nzira nzaru, okuhitira kubharooti. 2 Nawe muziisiku zino zyo obhuteero, Taatabhugya agaambiri na neetwe kuhitira ku Mwaana waaye.*Omwaana waaye. Rora Omwaana wa Taatabhugya mu Bhugaruri bhwa Amangʼana Amakongʼu. Akamusora Omwaana wuyo agabhe ebhigiro bhyoosi, kweeki kuhitira kweewe Taatabhugya akateema ekyaaro. 3 Omwaana wuyo ni rumesyo rwo obhuguungo bhwa Taatabhugya, na niwe ekireengyo kye eheene kya Taatabhugya. Aragirya ebhigiro bhyoosi bhye ekyaaro bhigeenderere kubhaho kubhunagya bhwe engʼana yaaye yo obhuturo. Neewe akiiruusya kubha ekimweeso kyo okuruusya abhaatu ebhibhi, akagya mwiisaaro, akiikara orubhaara rwo obhuryo rwo Omukuru, Taatabhugya.
Yeesu ni mukuru kukira maraika
4 Taatabhugya akamukora Omwaana waaye abhe omukuru kukira bhamaraika,†Bhamaraika. Rora engʼana maraika mu Bhugaruri bhwa Amangʼana Amakongʼu. kyeego yamuheeri eriina rino ni ikuru kukira ga bhamaraika. 5 Ni heene, kwo okubha atariho maraika wuno Taatabhugya yamubhuuriiri amangʼana gano yabhuuriiri Yeesu,
“Awe ni Mwaana waane,
reero niho nibharaarikiiri kubha awe ni mwaana waane.”‡Rora Zaburi 2:7.
Na Taatabhugya ataagaambiri kwiiguru wa maraika wowoosi,
“Enye ndabha Wiise waabhu,
neewe arabha Omwaana waane.ӤRora 2 Samweeri 7:14.
6 Kweeki, hano Taatabhugya yamutumiri Omwaana waaye omweene mukyaaro, akabhuga,
“Bhamaraika bhoosi bha Taatabhugya bhamuseengere Omwaana wuyo.”*Rora Obhuhiiti bhwe Emigiro 32:43.
7 Na iguru wa bhamaraika akabhuga,
“Enye nirakora bhamaraika bhaane bhabhe kyo obhukama,†Obhukama ku Kiyunaani rino obhugazuro bhwo obhukama ne ekoro.
na abhabhagati bhaane bhabhe kye emireengeeri gyo omuriro.”‡Rora Zaburi 104:4.
8 Nawe iguru wo Omwaana waaye akabhuga,
“Awe Taatabhugya orabhaaha kirakeego na kirakeego,
no obhukaangati bhwaazo bhurabha bhwe eheene.
9 Awe oseegiri eheene,
na ohaabhiihirirwa amabhi.
Kweego enye, Taatabhugya waazo,
nikuhakiri amaguta go obhuzomererwa,
okubha nikukore omukuru,
kukira abharikyaazo bhoosi.ӤRora Zaburi 45:6-7.
10 Kweeki Taatabhugya akamubhuurira Omwaana waaye,
“Awe Omukuru naawe okateema ekyaaro kubhutaangiro hayo,
awe naawe okateema eriisaaro ni mirimo gya amabhoko gaazo.
11 Ebhigiro bhiyo bhyoosi,
bhiranyara kye eziingibho,
nawe awe orabhaho kirakeego.
12 Awe orabhikunyakunya ebhigiro bhiyo kye eziingibho,
bhirakyoosibhwa kye eziikabhuuti.
Nawe awe otakwiikyoosya na rumwe,
naabhe emyaaka gyaazo gitana bhuteero.”*Rora Zaburi 102:25-27.
13 Taatabhugya ataamubhuuriiri maraika wowoosi,
“Wiikare orubhaara rwaane rwo obhuryo,
tee hano nikutuura abhabhisa bhaazo
iyaasi wa amaguru gaazo.ӠRora Zaburi 110:1.
14 Kweego, bhamaraika ni kigiroki? Ni bhabhagati bha Taatabhugya, kweeki ni koro zino Taatabhugya akuzitumania, zigeende kubhahokeerya abhaatu bhano bharaatuuribhwe.
*1:2 Omwaana waaye. Rora Omwaana wa Taatabhugya mu Bhugaruri bhwa Amangʼana Amakongʼu.
†1:4 Bhamaraika. Rora engʼana maraika mu Bhugaruri bhwa Amangʼana Amakongʼu.
‡1:5 Rora Zaburi 2:7.
§1:5 Rora 2 Samweeri 7:14.
*1:6 Rora Obhuhiiti bhwe Emigiro 32:43.
†1:7 Obhukama ku Kiyunaani rino obhugazuro bhwo obhukama ne ekoro.
‡1:7 Rora Zaburi 104:4.
§1:9 Rora Zaburi 45:6-7.
*1:12 Rora Zaburi 102:25-27.
†1:13 Rora Zaburi 110:1.