Amangʼana Amazomu ga Yeesu Krisito
kyeego gakaamirwe na
Mataayo
Obhutaangiro
Ekitabhu kino kyaakaamirwe na Mataayo, wuno yaari omutobhya we eriigooti. Yeesu akamubhirikira Mataayo, abhe omwaanamweega waaye kweemera hano yataangiri okurwaaza kubhweero. Amangʼana maaru gano Mataayo yakaamiri mukitabhu kino, ni gano yaruuzi kwa ameeso gaaye omweene.
Ekigirirye kya Mataayo okukaama ekitabhu kino yaari ni kukumiirirya Abhayahudi kubha Yeesu ni Mutuurya wuno Taatabhugya yaragiri okumutuma kweebho. Nikyo ekigirye Mataayo mubhutaangiro bhwe ekitabhu kino yataangiri okukaama ekisyooko kya Yeesu. Mukitabhu kino Mataayo arabhuga kubha, okuhitira ku Yeesu gatuukiri goosi gano bhaagaambiri abharooti bhe Eriiragano rye Ekare. Kweeki Mataayo arakumiirirya kubha obhutemi bhwa mwiisaaro ni bhwa abhaatu bha mubhyaaro bhyoosi bhano bhamwiikyooreeri.
Ekitabhu kya Mataayo kizaabhirwe bhuzomu na kiragana ebhisigo bhyaaru mubhwiikari bhwa Yeesu mukyaaro hano, okweemera okwiibhurwa kwaaye tee okukyoora kwaaye mwiisaaro. Gatigati we ekitabhu kiraruusya ameegyo maaru gano Yeesu yaari akweegya abhaatu. Mumeegyo gaaye turamenyeekererya obhutemi bhwa Taatabhugya kyeego bhuri, na turaraarikwa kwiikara obhwiikari bhwo okumuzomera Taatabhugya.
1
Ehamati ya Yeesu Krisito
(Ruuka 3:23-38)
1 Gano nigo amariina ge ekisyooko kya Yeesu Krisito.*Krisito ni ngʼana ye Ekiyunaani, obhugazuro bhwaku ni wuno ahakirwe amaguta. Mu Kieburania bharabhuga Masiya. Rora engʼana yino mu Bhugaruri bhwa Amangʼana Amakongʼu. Yeesu Krisito akarweera mukisyooko kyo omutemi Daudi na Aburahamu.
2 Aburahamu akamwiibhura Isaaka,
Isaaka akamwiibhura Yaakobo,
Yaakobo akamwiibhura Yuuda na bhawamwaabhu.
3 Yuuda akamwiibhura Pereesi na Zeera ku Tamaari,
Pereesi akamwiibhura Hezirooni,
Hezirooni akamwiibhura Araamu,
4 Araamu akamwiibhura Aminadabu,
Aminadabu akamwiibhura Nasoni,
Nasoni akamwiibhura Sarimooni,
5 Sarimooni akamwiibhura Boazi ku Rahaabu,
Boazi akamwiibhura Obeedi ku Ruutu,
Obeedi akamwiibhura Yeese,
6 na Yeese akamwiibhura omutemi Daudi.
Daudi akamwiibhura Soromooni kumukari wuno yaari omukari wa Uria,†Omukari wa Uria yaari arabhirikirwa Batisheeba. Rora 2 Samweeri 12:24-25.
7 Soromooni akamwiibhura Rehoboamu,
Rehoboamu akamwiibhura Abiya,
Abiya akamwiibhura Asa,
8 Asa akamwiibhura Yehoshafati,
Yehoshafati akamwiibhura Yoraamu,
Yoraamu akamwiibhura Uzia,
9 Uzia akamwiibhura Yotamu,
Yotamu akamwiibhura Ahaazi,
Ahaazi akamwiibhura Hezekia,
10 Hezekia akamwiibhura Manase,
Manase akamwiibhura Amoni,
Amoni akamwiibhura Yosia,
11 na Yosia akamwiibhura Yekonia na bhawamwaabhu,
eriibhaga riyo niryo Abhiiziraeri bhaagegirwe bhabhe abhagya mukyaaro kya Babeeri.
12 Hano Abhiiziraeri bhaagegirwe kugya Babeeri,
Yekonia akamwiibhura Shearitieri,
Shearitieri akamwiibhura Zerubabeeri,
13 Zerubabeeri akamwiibhura Abihuudi,
Abihuudi akamwiibhura Eriakimu,
Eriakimu akamwiibhura Azori,
14 Azori akamwiibhura Zadoki,
Zadoki akamwiibhura Akimu,
Akimu akamwiibhura Eriudi,
15 Eriudi akamwiibhura Ereazaari,
Ereazaari akamwiibhura Matani,
Matani akamwiibhura Yaakobo,
16 Yaakobo akamwiibhura Yusufu, musubhe wa Mariamu,
na Mariamu akamwiibhura Yeesu wuno akubhirikirwa Masiya.
17 Ambe, okurwa ku Aburahamu okuhikira okwiibhurwa kwo omutemi Daudi zyaari eziinyiibhuro ikumi ni inye. Kweeki, okurwa ku Daudi okuhikira kwiibhaga rino Abhiiziraeri bhaari bhamariri kugegwa kugya Babeeri, zyaari nyiibhuro eziindi ikumi ni inye. Kweeki, okurwa kwiibhaga rino bhaagegirwe bhabhe abhagya, okuhikira okwiibhurwa kwa Masiya, zyaari nyiibhuro eziindi ikumi ni inye.
Okwiibhurwa kwa Yeesu Krisito
(Ruuka 2:1-7)
18 Engʼana yo okwiibhurwa kwa Yeesu Krisito niyo yino. Mariamu nina waabhu Yeesu, yaari ayuungiibhwe na Yusufu. Nawe yaari akyaari kuhiindira nawe, Mariamu akarorekana ariinda, enda yino yabhweeni kwo obhunagya bhwe Ekoro Muhoreeru.‡Ekoro Muhoreeru. Rora amangʼana gano mu Bhugaruri bhwa Amangʼana Amakongʼu. 19 Yusufu omusubhe waaye, yaari omuutu we eheene embere wa Taatabhugya. Ateendiri amusuukye Mariamu, kweego akaamura kumutiga bhwiibhisi.§Kuriingʼaana ne enyaangi ya Abhayahudi, eraabhe omumura no omuukya bhiiyuungirye, bhahaabhabhara kubha bhiikweeriri. Nawe haari ne eriibhaga ryo omwaaka omugima gwo okwiiganya eriibhaga bhakyaari kukweerana. Eriibhaga ryoosi riyo bhatiikiriibhwe kwiikara hamwe tee hano bhakugya kukweerana. Okumutiga wuno ayuungiibhwe kukatuubhana no okutigana.
20 Nawe hano Yusufu yaari yamwiiri gayo, kituukiro maraika*Maraika. Rora engʼana yino mu Bhugaruri bhwa Amangʼana Amakongʼu. wo Omukuru, Taatabhugya akamutuukira mukirooto, akamubhuurira, “Yusufu, omwaana wo omutemi Daudi,†Daudi. Rora engʼana yino mu Bhugaruri bhwa Amangʼana Amakongʼu. otoobhoha kumukweera Mariamu, kwo okubha enda yiyo ayibhweeni kwo obhunagya bhwe Ekoro Muhoreeru. 21 Ariibhura omwaana we ekisubhe, no omutoge Yeesu,‡Obhugazuro bhwe eriina rya Yeesu ni Mukuru, Taatabhugya aratuurya. kwo okubha wuyo niwe araatuurye abhaatu okurwa mubhibhi bhyaabhu.”
22 Gayo goosi gaakorirwe ego, okubha rikuunaane eriingʼana rino Omukuru, Taatabhugya yabhugiri kwe enzira yo omurooti waaye kubha,
23 “Murore, omukari wuno akyaari kuhiindira no omusubhe aragega enda,
neewe ariibhura omwaana we ekisubhe.
Niho bharaamubhirikire eriina ryaaye Imanueri.ӤRora Isaya 7:14.
Obhugazuro bhwe eriina rino ni kubha, Taatabhugya ari hamwe neetwe.
24 Hano Yusufu yaabhuukiri, akakora kyeego maraika wo Omukuru, Taatabhugya yamubhuuriiri. Yusufu akamukweera Mariamu, 25 nawe ataahiindiiri neewe tee hano Mariamu yiibhwiiri omwaana we ekisubhe. Yusufu akamutoga omwaana wuyo, Yeesu.
*1:1 Krisito ni ngʼana ye Ekiyunaani, obhugazuro bhwaku ni wuno ahakirwe amaguta. Mu Kieburania bharabhuga Masiya. Rora engʼana yino mu Bhugaruri bhwa Amangʼana Amakongʼu.
†1:6 Omukari wa Uria yaari arabhirikirwa Batisheeba. Rora 2 Samweeri 12:24-25.
‡1:18 Ekoro Muhoreeru. Rora amangʼana gano mu Bhugaruri bhwa Amangʼana Amakongʼu.
§1:19 Kuriingʼaana ne enyaangi ya Abhayahudi, eraabhe omumura no omuukya bhiiyuungirye, bhahaabhabhara kubha bhiikweeriri. Nawe haari ne eriibhaga ryo omwaaka omugima gwo okwiiganya eriibhaga bhakyaari kukweerana. Eriibhaga ryoosi riyo bhatiikiriibhwe kwiikara hamwe tee hano bhakugya kukweerana. Okumutiga wuno ayuungiibhwe kukatuubhana no okutigana.
*1:20 Maraika. Rora engʼana yino mu Bhugaruri bhwa Amangʼana Amakongʼu.
†1:20 Daudi. Rora engʼana yino mu Bhugaruri bhwa Amangʼana Amakongʼu.
‡1:21 Obhugazuro bhwe eriina rya Yeesu ni Mukuru, Taatabhugya aratuurya.
§1:23 Rora Isaya 7:14.