4
Yeesu arasakibhwa na Seetaani
(Mariko 1:12-13; Ruuka 4:1-13)
1 Kyaamwe, Yeesu akakaangatwa ne Ekoro Muhoreeru kugya mwiitirigo, okubha asakibhwe na Seetaani.*Seetaani. Rora engʼana yino mu Bhugaruri bhwa Amangʼana Amakongʼu. 2 Akamara eyo eziisiku miroongo ene (40), obhutiku no omwiisi akiisiitya okurya ebhyaakurya. Kubhuteero, akiigwa enzara bhukongʼu. 3 Niho Seetaani akaaza kumusakya, akamubhuurira, “Aribha awe naawe Omwaana wa Taatabhugya,†Omwaana wa Taatabhugya. Rora amangʼana gano mu Bhugaruri bhwa Amangʼana Amakongʼu. swaagya amagina gano giikyoore gabhe emikaate.”
4 Nawe Yeesu akamubhuurira, “Ekaamirwe mu Makaamo Amahoreeru,
‘Omuutu atakunagya kwiikara kwe ebhyaakurya ebhyeene,
nawe ariikara kumangʼana goosi
gano gakurwa mumunwa gwa Taatabhugya.’‡Rora Obhuhiiti bhwe Emigiro 8:3.”
5 Niho Seetaani akamuhira Yeesu mumugye omuhoreeru gwa Yerusaremu, akamwiimeererya kukisoonge kye eriiseengerero rya Taatabhugya,§Eriiseengerero rya Taatabhugya ryaari ni nyuumba esorwa yo okuseengera Taatabhugya mumugye gwa Yerusaremu. Rora eriiseengerero mu Bhugaruri bhwa Amangʼana Amakongʼu. 6 akamubhuurira, “Aribha awe naawe Omwaana wa Taatabhugya, irekera haasi. Otakunagya kunyahaarika, ekaamirwe mu Makaamo Amahoreeru,
‘Taatabhugya araswaagya bhamaraika bhaaye kwiiguru waazo, okubha bhakuriihe,
nabho bharakugega mumabhoko gaabhu,
amaguru gaazo gataaza kwiitema kwiigina ryoryoosi.’*Rora Zaburi 91:11-12. ”
7 Nawe Yeesu akamubhuurira, “Kweeki ekaamirwe, ‘Otamusakya Omukuru, Taatabhugya waazo.’†Rora Obhuhiiti bhwe Emigiro 6:16. ”
8 Mubhuteero, Seetaani akamuhira Yeesu kukinazo kye ekiguru ekitaambi. Hayo, akamweerekya ebhyaaro bhyoosi bhya mukyaaro hamwe no obhuniibhi bhwamu, 9 akamubhuurira, “Aribha oraanihigamire no okuniseengera, ndakuha bhyoosi bhino.”
10 Nawe Yeesu akamubhuurira, “Noorwe hano, Seetaani! Ekaamirwe mu Makaamo Amahoreeru,
‘Omuseengere Omukuru, Taatabhugya waazo,
omuhokeerye ewe omweene ego.’‡Rora Obhuhiiti bhwe Emigiro 6:13. ”
11 Niho Seetaani akamutiga Yeesu hayo. Hayohayo, bhamaraika bha Taatabhugya bhakaaza okumuhokeerya Yeesu.
Yeesu arataanga obhuhokya bhwaaye kubhweero
(Mariko 1:14-15; Ruuka 4:14-15)
12 Ambe, eriibhaga rirya Yohana yaari abhohirwe munyuumba ya abhabhohwa. Hano Yeesu akiigwa amangʼana gano, akatanura harya, akagya mukyaaro kya Gariraaya, akahika mumugye gwa Nazareeti. 13 Niho, Yeesu akasaama okurwa Nazareeti, akagya kwiikara mumugye gwa Kaperinaumu. Omugye guyo gwaari embarika ye Enyaanza ya Gariraaya, orubhaara rwe ekisyooko kya Zaburooni na Nafutaari. 14 Ekabha ego, okubha rikuunaane eriingʼana rino Taatabhugya yabhugiri kwe enzira yo omurooti Isaya,
15 “Mwiitegeerere, abhaatu bhe ebhyaaro bhya Zaburooni na Nafutaari,
ahagiro hano hari munzira yo okweerekera munyaanza,
no omwaambuko gwe Ekitaaro kya Yorodaani.
Gariraaya eyo niho bhakwaanga abhaatu bhe ebhyaaro ebhiindi.
16 Abhaatu bhano bhano mukiikara mukiirima,
bharuuzi obhweero bhukuru,
na bhano bhiikeeri mukiirima kyo oruku,
bhabhariirwe no obhweero bhwe etabhoori.ӤRora Isaya 9:1-2.
17 Kwe eriibhaga riyo, Yeesu akataanga kurwaazira abhaatu, “Mute ebhibhi bhyeenyu mumwiikyoorere Taatabhugya, kwo okubha obhutemi bhwa mwiisaaro bhubhahikiiri!”
Yeesu arataanga kusora abhaanabheega bhaaye
(Mariko 1:16-20; Ruuka 5:1-11)
18 Hano Yeesu yaari akugeenda embarika we Enyaanza ya Gariraaya, akarora abhategi bhabhiri bhe eziiswe, Simooni wuno yakubhirikirwa Petero na wamwaabhu Andurea. Abhabhiri bhayo bhaari bhararekera eziinzero munyaanza, okubha bhagwaatye eziiswe. 19 Yeesu akabhabhuurira, “Muuze, munituniirire! Enye ndabhakora mubhe abhategi bha abhaatu.”*Abhategi bha abhaatu, obhugazuro bhwaku ni kubha bharuusye abhaatu okurwa mubhibhi bhyaabhu no okubhakumania hamwe musaango ya abhaatu bha Taatabhugya. 20 Hayohayo, bhakatiga eziinzero zyaabhu, bhakamutuniirira Yeesu.
21 Hano Yeesu yageendiri embere hasuuhu, akarora abhaatu abhaandi bhabhiri, Yaakobo na wamwaabhu Yohana, abhaana bha Zebedaayo. Abhabhiri bhayo bhaari mubhwaato hamwe na wiise waabhu, bhaari bharazomya eziinzero zyaabhu. Yeesu akabhabhirikira bhamutuniirire. 22 Eriibhaga riyoriyo, bhakatiga obhwaato na wiise waabhu, bhakamutuniirira Yeesu.
Yeesu areegya abhaatu no okuhorya abharweeri bhaaru
(Ruuka 6:17-19)
23 Yeesu yaari ariiruguura mukyaaro kyoosi kya Gariraaya. Yaari arasikira muziinyuumba zye eziisaango†Eziinyuumba zye eziisaango zyaari nyuumba zyo okwiikumanirya Abhayahudi kwiiguru yo okuseengera Taatabhugya, eheene kurusiku rwo okumuunya. Rora enyuumba ye esaango mu Bhugaruri bhwa Amangʼana Amakongʼu. no okweegya abhaatu muyo. Yaari arabharwaazira Amangʼana Amazomu iguru yo obhutemi bhwa mwiisaaro no okuhorya amarweeri gaabhu goosi. 24 Amangʼana iguru wa Yeesu gaari garanyaragana bhukongʼu tee mukyaaro kyoosi kya Siria. Abhaatu bhakamuhirira abharweeri bhaabhu bhoosi bhano bhana amarweeri ge etuubho maanga maaru. Gati waabhu, bhaari bharimu bhano bhakunyaakibhwa bhukongʼu, bhano bhaatiirirwe na amasaambwa amabhi, bhano bhaari ne eriirimu na bhano ebhiimo bhikuuri. Yeesu akabhahorya bhoosi. 25 Ambe, abhaatu bhaaru bhukongʼu bhakabha bharamutuniirira okurwa Gariraaya, Dekapoori, Yerusaremu, Yudea na mumwaambuko gwe Ekitaaro kya Yorodaani.
*4:1 Seetaani. Rora engʼana yino mu Bhugaruri bhwa Amangʼana Amakongʼu.
†4:3 Omwaana wa Taatabhugya. Rora amangʼana gano mu Bhugaruri bhwa Amangʼana Amakongʼu.
‡4:4 Rora Obhuhiiti bhwe Emigiro 8:3.
§4:5 Eriiseengerero rya Taatabhugya ryaari ni nyuumba esorwa yo okuseengera Taatabhugya mumugye gwa Yerusaremu. Rora eriiseengerero mu Bhugaruri bhwa Amangʼana Amakongʼu.
*4:6 Rora Zaburi 91:11-12.
†4:7 Rora Obhuhiiti bhwe Emigiro 6:16.
‡4:10 Rora Obhuhiiti bhwe Emigiro 6:13.
§4:16 Rora Isaya 9:1-2.
*4:19 Abhategi bha abhaatu, obhugazuro bhwaku ni kubha bharuusye abhaatu okurwa mubhibhi bhyaabhu no okubhakumania hamwe musaango ya abhaatu bha Taatabhugya.
†4:23 Eziinyuumba zye eziisaango zyaari nyuumba zyo okwiikumanirya Abhayahudi kwiiguru yo okuseengera Taatabhugya, eheene kurusiku rwo okumuunya. Rora enyuumba ye esaango mu Bhugaruri bhwa Amangʼana Amakongʼu.