7
Abhaatu bha Taatabhugya bharabhaaswa orubhaaso
1 Hano gayo gaahitiri, nikarora obhurori obhuundi. Nikarora bhamaraika bhane, bhiimeereeri mbaara inye zye ekyaaro. Nabho bhaari bharikiingitiirirya obhukama okurwa mbaara zyoosi inye zye ekyaaro, okubha bhutahuumbuuta okuuza mukyaaro, munyaanza naabhe kumuti gwogwoosi. 2 Bhamaraika bhayo bhaari bhaheerwe obhunagya bhwo okusarya ekyaaro ne enyaanza. Kyaamwe, nikarora maraika owuundi aratiira iguru okurwa ruguru, agegiri orubhaaso rwa Taatabhugya wuno ari muhoru. Akatiirya eriiraka akabhabhuurira bhamaraika bhane bhayo, 3 akabhuga, “Muganye! Mutasarya ekyaaro, enyaanza naabhe emiti, tee tutuure orubhaaso mubhisyoosyo bhya abhagya bhoosi bha Taatabhugya weetu.”
4 Kyaamwe, nikabhuurirwa obhubhari bhwa abhaatu bhano bhatereerwe orubhaaso rwa Taatabhugya mubhisyoosyo. Nabho bhoosi bhaari ni kikuundiko kimwe ne ebhikwe miroongo ene ni inye (144,000), okurwa ebhisyooko bhyoosi ikumi na bhibhiri bhya Abhiiziraeri.
5 Gati waabhu bhaari abhaatu ebhikwe ikumi na bhibhiri (12,000) bhe ekisyooko kya Yuuda,
ne ebhikwe ikumi na bhibhiri bhe ekisyooko kya Rubeeni,
ne ebhikwe ikumi na bhibhiri bhe ekisyooko kya Gaadi.
6 Ne ebhikwe ikumi na bhibhiri bhe ekisyooko kya Asheeri,
ne ebhikwe ikumi na bhibhiri bhe ekisyooko kya Nafutaari,
ne ebhikwe ikumi na bhibhiri bhe ekisyooko kya Manase.
7 Ne ebhikwe ikumi na bhibhiri bhe ekisyooko kya Simioni,
ne ebhikwe ikumi na bhibhiri bhe ekisyooko kya Raawi,
ne ebhikwe ikumi na bhibhiri bhe ekisyooko kya Isakari.
8 Ne ebhikwe ikumi na bhibhiri bhe ekisyooko kya Zaburooni,
ne ebhikwe ikumi na bhibhiri bhye ekisyooko kya Yusufu,
ne ebhikwe ikumi na bhibhiri bhe ekisyooko kya Benjamini.
Esaango ya abhaatu bhe ebhyaaro bhyoosi
9 Hano gayo gaahitiri, nikarora esaango ya abhaatu ekuru, yino ataari ariho omuutu wo okunagya kubhara, bhaari bhiimeereeri embere we ekituumbi kyo omuriinga ne embere ye Engʼoondu ya Taatabhugya. Abhaatu bhayo, bhaarwiiri ebhyaaro bhyoosi, eziingaanda zyoosi, abhahiiri bhoosi ne ebhigaambo bhyoosi. Bhiibhohiri eziingibho ndabhu na bhaari bhagwaatiriiri amatu ge emiteende. 10 Bhakabha bharatiirya eriiraka bharabhuga,
“Obhutuurya bhurarwa ku Taatabhugya weetu,
wuno yiikeeri kukituumbi kyo omuriinga,
na kwe Engʼoondu ya Taatabhugya!”
11 Bhamaraika bhoosi bhaari bhiimeereeri okwiiruguura ekituumbi kyo omuriinga, abhakaruka bharya ne ebhityeenyi ebhine bhirya bhyo obhuhoru. Bhakamugweera mumaguru embere we ekituumbi kiyo, bhakamuseengera Taatabhugya, 12 bharabhuga,
“Gabhe ego!
Mumukumye Taatabhugya weetu, niwe wo obhuguungo,
mumubhuurire, ‘Ozomirye,’
mumusuuke,
niwe wa amangʼeeni, obhunagya na amanaga
kirakeego na kirakeego.
Gabhe ego!”
13 Kyaamwe, owumwe wa abhakaruka bharya akaanibhuurya, “Mbe, abhaatu bhano bhiibhohiri eziingibho eziindabhu ni bha weewi? Bharweereeri hayi?”
14 Nikamukyoora, “Ee omukuru waane, awe naawe omenyiri.”
Akaanibhuurira, “Abhaatu bhano nibho bhano bhakurwa muziinyaako eziikuru zirya. Bhahuriri eziingibho zyaabhu kwa amanyiinga ge Engʼoondu ya Taatabhugya, zikabha nzero pee. 15 Nikyo bhari embere we ekituumbi kyo omuriinga kya Taatabhugya. Bharamuhokeerya obhutiku no omwiisi mwiiseengerero ryaaye. Neewe Taatabhugya yiikeeri kukituumbi kyo omuriinga, arabha hamwe nabho no okubhariiha. 16 Nabho bhatakubha ne enzara naabhe enyoota kweeki, naabhe bhatakwookibhwa ne eryoobha naabhe okubhona eryooya ryoryoosi.*Rora Isaya 49:10. 17 Erabha ego, kwo okubha Engʼoondu ya Taatabhugya wuno ari haguhi ne ekituumbi kyo omuriinga, niwe omuriisya waabhu. Arabhakaangata bhoosi kugya mukitaaro kya amaanzi go obhuhoru. Neewe Taatabhugya arabhatarikya eziingusuri zyaabhu.”