4
Juàn ngue lu' le' alux mèn co' nzo loo bé' loo Diox, mèna ndyub xib loo Diox no ncòo' mèna yéc mèna loo Diox.
1 Ngolo mblu' Jesucrist loon par mque'en ye's loo mèna, ale mxaquen mdoo xal' thìb puert loon loo bé' par mbui'en le'n bé'. No, chàa, mbìnen thìb di's co' mxaquen mbyèn xal co'se' cabii ncuez mèn thìb trompet. Mbìnen gunee thìb mbi' loon co' ngòc leque mbi' co' nerleque' gunii loon. Gunee mbi' loon:
―Fquée trè', Juàn, par lu'en ryethe con' co' gàc loo mèn loo izlyo' le'n tiemp co' yi'th nque.
2 Leque hora, mbli Xpii Natú' che'n Diox par, chàa, nguan le'n loo bé'. No mbli Xpii Natú' che'n Diox mbui'en thìb asient co'te' ndyub Diox co'te' ñibe' Diox le'n loo bé'. No gunèen ndub thìb mbi' loo asienta. 3 Mbi' co' ndub loo asienta, ante ndxaa'd xnìi mbi'a no ndxaa'd bèel mbi'a xal ndxaa'd xnìi no ndxaa'd bèel thìb loo quèe co' lèe quèe jasp no xal tedib loo quèe co' nquéeguè' xnìi co' lèe quèe cornalin. Dib vuelt loo asient co'te' ndub Diox gunèen ndoo thìb arc mbèel qui'th. Arc co' nac mbèel qui'tha ndxaa'd xnìi no ndxaa'd bèel xal ndxaa'd bèel no xal ndxaa'd xnìi loo thìb loo quèe co' lèe quèe esmerald. 4 Gunèen nziri' taagal fthap asient dib vuelt loo asient co'te' ndub Diox. Loo asienta ndub thìb thìb mèngool co' ngòc gal fthap mèngool. Mèngoola noc xab ampurte lar' nagus bèelleque'. No gunèen nzi'f anabte coron or yéc rye mèngoola. 5 No gunèen ndxà'x bèel gundi co'te' ndub mbi' loo asient co' ndoo xtau' taamas asient. Mbìnen ngulàa gundi no ndxas ndlya'b gundii. No gunèen nzi'f yol gaz manoj ye'rbèel loo asient co' ndoo xtau' taamas asient. Gaz manoj ye'rbèel co' nzi'f yola ndlu' cón che'n Xpii Natú' che'n Diox. 6 Gunèen, ne, co'te' ndoo asienta nziri' thìb con' co' ñaa xal ñaa níttó' co' xèe nziri' co' ndri'th xnìi par xís xal vidr.
Xtau'the con' co' ñaa xal ñaa níttó'a no dib vuelt co'te' ndoo asient co' mbui'en nera mxaquen nziri' thap con' co' ñaa xal thap loo má' co' naban. Má'a nzib ngudloo ned loo má' no ned xís má'. Dib lad má'a nzib ngudloo má'. 7 Ner má' ñaa loo xal ñaa thìb mbee's co' ndoo yis lox yen. Le' mbryop má' na, ñaa loo xal ñaa thìb laa ngon. Le' mbyon má' na, ñaa loo xal ñaa loo thìb mbi'. Le' dyap má' na, ñaa loo xal ñaa thìb mtii co' nxobii. 8 Dyap loo con' co' ñaa xal má' co' nabana, thìb thìb má'a mque no xop xíl'. Par le'n xíl' má' no par xís xíl' má' gunèen nzib ngudloo má'. No ze no yál' thidtene mbez má':
Anze'f natú' nac U', Tad Diox, U' co' ndxàp rye loothe con' roo no con' xèn la's nii U' no la's ya' U', U' co' thidteneque' nzo.
9 No cadque' co'se' mbez dyap má' co' nabana, mbez má': Con' roo con' xèn nac U', Tad. No be' taaguè' mbez má':
Ante loo U' tolo gàc con' guryath no con' guryèn.
Mbez má', ne:
Diox quix non U'
loo Diox co' ndub loo asient co' ndoo xtau' loo rye asient, Diox co' thidteneque' naban. 10 Lomisque' tiemp, ne, ryete gal fthap mèngool co' ndub loo gal fthap asient co' ndoo dib vuelt loo asient co' ndoo xtau'a, ndyub xib loo Diox co' ndub loo asient co' ndoo xtau'a, Diox co' thidtene naban. No mbec mèngoola coron co' ndub yéc mèngoola xàn' nii Diox co' ndub loo asienta. No mbez mèngoola loo Diox:
11 Tad, U' co' nac Diox nu', thidte U' nac Diox co' ndxàal ñee mèn loo le' U' nac Diox roo no Diox xèn. No loo U' ndxàal ñee mèn di's co' nac di's guryath no di's guryèn. No thidte U' nac Diox co' ndxàalpe' ñibe' loo alux con' co' mblec U' xalque' ndli U'. Tac U' mbli par mblec U' no mxèn' U' izlyo' no ryethe con' co' nziri' loo izlyo' no co' ndxú' loo bé'. No mbli U' ryethe con' co' nac izlyo' no ryethe con' co' nac bé' xal gunee lezo' U'.