1 Be taa be taa mxaquen mbìnen mbyèn thìb di's co' mbyèn le'n templ co'te' nac más natú'. Di'sa ndxab loo rye gaz angl:

―Huaa lath gu' gaz loo con' co' nzo le'n cop gu' co' nac con' co' li Diox par tetìi Diox mèn.

2 Sya, ngua angl co' nac ner angl. Ngua lath angl con' co' ngòc ner loo yaltìi co' ngòc con' ye'rsin' loo izlyo'. Le' sya, ryete mèn co' mque no señ che'n má' tín' no mèn co' mcòo' yéc no co' mdub xib loo gunab che'n má', ale ngro' thìb loo yé's ye'rsin' no thìb loo yé's zab lad mèn co' mbli par mden' mèn yalnè tín'.

3 Ngua lath tedib angl co' nac mbryop angl co' nde nque tedib loo yaltìi co' ngòc con' ye'rsin' co' ngo le'n cop angl loo níttó'. Le' sya, níttó'a ngòc ren xal ren che'n thìb mèn nguth. No mbli nít co' ngòc rena par nguth rye loothe má' co' naban le'n níttó'.

4 Ngoloa, ngua lath angl co' nac mbyon angl co' nde nque tedib loo yaltìi co' ngòc con' ye'rsin' co' ngo le'n cop angl loo rye yó'be' no loo rye lugar co'te' ndub len nít. No ngòc nít yó'be' ren no ngòc nít co'te' ndub len nít ren. 5 Látha, chàa, mbìnen gunii angl co' ñibe' loo nít dib athu loo izlyo'. Ndxab angl loo Diox:

―Tad Diox, U' nac Diox nalì no Diox nambìi por tataa mbli U' no mdub rez U' cón che'n mèn ba', U' co' nac Diox natú' co' thidteneque' nzo. 6 Tataa mbli U' loo mèna tac mèna mbeth mèn co' ngòc mèn co' ngro xà' loo cón che'n xab izlyo' par ngòc mèna che'npe' U'. No lomisque', mbeth mèna mèn co' mde'th di's co' ndxab U' no mèn co' mblo yalbàn cón che'n U' loo mèn loo izlyo'. No nalle', U' mnibe' yèe loo mèna par gu mèna nít ren chele' mèn ndlya's gu nít. Aa. Nzyalque' mèna, tataa gàca loo mèna.

7 Mbìnen, ne, gunii thìb xa' axta loo còo' co' ndoo gaxte co'te' ndub Diox. Mbez xa':

―Lìca, Tad Diox, U' co' ndxàp rye loothe con' roo no con' xèn la's nii U' no la's ya' U', nalìque' nac U' no nambìique' nac U'. No nalìcpe' nac co' ndub rez U' cón che'n mèna.

8 Ngoloa, ngua lath tedib angl co' nac dyap angl co' nde nque tedib loo yaltìi co' ngòc con' ye'rsin' co' ngo le'n cop angl loo huiz. No mbli Diox par ngòc con' roo no con' xèn loo huiz par mtec mso' huiz mèn loo izlyo'. 9 No ryete mèna mbyec mzyo' axta plóthe. Per ne' por ngòc con'a loo mèna ne'nglàade yéc mèna no ne'nglàade lezo' mèna par nse' mèna mod co' ngòp mèna loo Diox. Ne' ne' ngab mèna loo xtàa mèna le' Diox nac Diox roo no Diox xèn. Ndxe'leque', nazab gunii yèe gunii tìi mèna cón che'n Diox, Diox co' ndxàp rye loothe con' roo no con' xèn la's nii Diox no la's ya' Diox par ñibe' Diox gàc yaltìi loo mèn axta plóthe.

10 Ngoloa, ngua lath angl co' nac ga'y angl co' nde nque tedib loo yaltìi co' ngòc con' ye'rsin' co' ngo le'n cop angl loo asient co'te' ndub má' tín'a. No ryete lugar co'te' mnibe' má' tín'a ngulàa yál'cuau loo mèn loo izlyo' loo ryete con', que naca loo má', que naca loo mèn. Nde nxon', mèna ndxuhua loz ndxuhua tin por ya ne'nxecte mèn ngòc yaltìi no yalnèa loo mèn. 11 Per ne' por ndxàc con'a loo mèna ne'nglàade yéc mèna no ne'nglàade lezo' mèna par nse' mèna mod co' ndxàp mèna loo Diox. Ndxe'leque', nazab gunii mèna cón che'n Diox, Diox co' nzo loo bé', por mbli Diox ndxàc yalnèa loo mèna no por mbli Diox ngro xo'f ye's ye'rsin'a lad mèn.

12 Ngoloa, ngua lath angl co' nac xop angl co' nde nquea tedib loo yaltìi co' ngòc con' ye'rsin' co' ngo le'n cop angl loo yó'be' co' nac más yó'be' roo, co' lèe yó' Eufrat. Sya, nít co' nzo'f yó'be'a ale mbiiz nít par tataa mod mxyal' thìb ned co'te' ndri'th yó'be'a par mbri'th mèn co' nac rey con solndad rey co' nac mèn co' ñibe' nación par ned ndlyen huiz.

13 Be taa be taa gunèen ngro' thìb xpii ye'rsin' ro dragón, no ngro' thìb xpii ye'rsin' ro má' co' ngòc má' tín', no ngro' thìb xpii ye'rsin' ro xa' co' mbez mde'th cón che'n Diox per nde'th xa' di's co' inacte con' lìcpe'. Xpii ye'rsin'a ñaa xal ñaa mbich. 14 Mbich co' ngro' ro yon xa'a, mbicha ngòc xpii meexù'. Xpiia mbli ngòc huax yalguzye' co' nac yalguzye' roo no yalguzye' xèn. Ngro xpiia loo izlyo' par mbli xpiia mqueltàa rye rey co' nzo dib athu loo izlyo' con solndad rey par thidte mqueltàa rye rey con solndad rey par li rye rey xó' con solndad rey loo Diox co'se' gàc huiz co'se' tub rez Diox cón che'n rye mèn ye'rsin' par telux Diox rye mèn ye'rsin'a co'se' li Diox xó' con mèna huiza, Diox co' ndxàp rye loothe con' roo no con' xèn la's nii Diox no la's ya' Diox. 15-16 Sya, mqueltàa xpii ye'rsin'a rye rey con mèn co' nac solndad rey thìb lugar co' lèe Armagedón co' nac lèe thìb la's co' nziri' loo xyòn mèn nación Israel. Láth ngue hui'en con'a, mbìnen di's co' gunee Jesucrist loon. Gunee Jesucrist loon:

―Juàn, hui' nexa. Na gal thìb huiz co' yende chó mèn ngue bed daa no thìb huiz co' yende chó mèn nzi quee lezo' galen. Galen loo izlyo' xal co'se' ndlyàa huan' liz mèn. Huen gàca loo mèn, mèn co' nzi quee lezo', no mèn co' altant nzi loo cón chenen, no mèn co' nalì no nambìi nzi que tee ban lì loo cón chenen. Mèna yende chó tethon no yende chó co' too mèna thìb lad loo mèn co' nzo loo cón chenen par ta' mèn gust lezo' mèn con mèna co'se' gàc huiz co' galen.

17 Ngoloa, ngua lath angl co' nac gaz angl co' nde nquea tedib loo yaltìi co' ngòc con' ye'rsin' co' ngo le'n cop angl loo mbii loo izlyo'. Sya, cabii mbyèn thìb di's axta co'te' nac le'n templ co'te' nac lugar más natú' loo bé' co'te' nzo Diox. Di'sa mbez:

―Nase guneela. Con' ndxè' nac lult con' co' lin par tataa mod tetìin mèn loo izlyo'.

18 Sya, ngulàa bèel gundii. Mbyèn huax ruid. Ngos mblya'b gundii. No mbuin thìb xòo brut más fuert co' tarte huin dib lal nziri' mèn loo izlyo'. 19 Lomisque' ne, mxaquen ale ngulàa bes son part ciuda Jerusalén co' nac ciuda roo ciuda xèn. Le' rye liz mèn co' nac chol ciuda co' nziri' loo izlyo' na, ngulàare' no ngulàateri' ciuda loo izlyo'. Làth xtau'a, Diox mte' lezo' cón che'n ciuda co' ne' tedib lèe ciuda Babiloñ par li Diox gàc más yaltìi no yalnè loo mèn ciudaa por tant ndxecloo Diox ñèe Diox mèna por mod ye'rsin' co' ngòp mèna loo Diox. 20 Lomisque' ne, rye yòo biiz co' nziri' le'n níttó' chol lugar no rye yii den mdyep le'n níttó' no mdyon' rye yii den. 21 Lomisque' ne, ngulàa yuu quèe brut co' né' axta cho' kil rloo mèn loo izlyo'. Per mastale' ngulàa yuu quèea rloo mèn co' nziri' loo izlyo', ale le'le' gunii yèeque' no gunii tìique' mèna cón che'n Diox por yuu quèe co' ngulàa rloo mèna tac yuu quèea mbli ngòc thìb yaltìi tín' loo mèn.