6
Lee re goo ndyeen bzhizh ndoblo gon goo diiz lo xut goo ne lo xnaa goo, tak tabaa nlaaz Zha Nabee, ne koree nak kuu wen. 2-3 Tak tata nzhab lo ley chaan Moisés: “Bke leettsooʼa xuta ne xnaaʼa, tsa wen yoʼa ne tsa naroob bana lo yezlyu ree”. [Ex. 20:12; Dt. 5:16] Koree nak kuu ner kuu nataak kuu mnabee Diox, tsa wen rid re zha kuu gon diize.
Ne lee re goo kuu nak xut ndyeen, ndoblot tsow goo kezhyan zhiinn goo, mas wen bteni goo ndyeen ne bteli goo ndyeen taxal nlaaz Zha Nabee.
Reta goo kuu nak mos, ndoblo gon goo diiz lo zha kuu nabee lo goo lo yezlyu ree, nadoo gok goo ne naguuz gok goo lo zha, taxal leeka lo Jesucrist ngeyon goo diiz. Btsow goo rtsin zha ne tsowt gooy beeta leettsa ndewii zha lo goo, tsa wen yaan goo lo zha, sinke ndoblo tsow goo rtsin zha kon dib ndroo leettsoo goo, taxal nlaaz Diox tak mos Jesucrist nak goo. Ndoblo tsow goo rtsin zha kuu nabee lo goo kon dib ndroo leettsoo goo, taxal zha kuu nke tsiin lo Zha Nabee, ne tsowt gooy taxal zha kuu nke tsiin lo men. Tak kadta thib zha, tegal mos nak zha o nagt zha mos, kadta thib zha kayaa zha lo Zha Nabee taxalta kuu wen kuu mtsow zha.
Ne reta goo kuu nak zha kuu nabee, ndoblot yii goo lo mos goo, btelaaz goo lo ropta goo nabee Zha Nabee kuu ndob yibaa; tak lalka nataak re men lo Diox.
Re kuu mndaa Diox par tak re zha kuu nyelaaz Diox
10 Lee nal nin lo re goo wetsʼn ne btan na, ney gok goo kon yalney chaan Zha Nabee. 11 Blortsin goo re kuu mndaa Diox lo goo par tak goo, tsa tak kenap goo goo ne tsa ney to goo lo re yalkedi chaan Maxuuy. 12 Tak ngeyotaa kon men, sinke leeʼaa ngeyo kon re mbi fyer kuu nzo lobee kuu nabee lo yezlyu ree, re mbi fyer kuu ney kuu nabee lo yalkow ne ntsow kuu went. 13 Kona ndoblo lortsinaa re kuu mndaa Diox loʼaa par takaa, tsa xekaa ridaa re wiz went, ne leettsa ngwalo mriide nalika toʼaa lo Diox.
14 Kona ndoblo thib koʼaa yekaa nali toʼaa lo Diox ne thib yelaazaa kuu wli; tsa nakaa taxal thib soldad kuu nya lo zhoo kuu nzo sinch leeyy ne now pech kon yiib.
15 Ne ndoblo list yetsinaa par taaʼaa kwent Diiz Chul chaan Jesucrist, diiz kuu ntsow wen kwin re men, tsa nakaa taxal soldad kuu list ndo nke labyid ni.
16 Ne kuu mas ndoblo tsowaa nak thib yelaazaa Jesús, tak leey nak taxal yiib kuu ntow dib soldad ne kon leey tak tuyyaa re btson kuu ndob bel yek kuu nkee Maxuuy yekaa.
17 Thibka ndoblo telaazaa leeʼaa wlipaa nap yalnaban kuu thitanax, tsa nakaa taxal soldad kuu now bchuyib yek. Noga ndoblo thibka yelaazaa xkiiz Diox, ne lee xkiiz Diox nak taxal espad kuu ndaa Mbi Nayon chaan Diox. 18 Reta wiz ndoblo tediz goo lo Diox, ne thibka bnaab goo re kwaa lo Diox taxal nlaaz Mbi Nayon, bnaab goo lo Diox por goo ne bnaab goo lo Diox por reta zha kuu nyelaaz Jesucrist, re zha kuu nali ndo nyelaaz Diox. 19 Ne noga bnaab goo lo Diox por na, tsa taa Diox re diiz kuu ndoblo nin, ne tsa tsow Diox yoney leettsoon, tsa tak tan kwent Diiz Chul kuu ngoo gaats ndala. 20 Diox mtaalʼn tsa tan kwent Diiz Chul, kona nal naliibʼn ne nzon tsib. Bnaab goo lo Diox tsa tsow Diox yoney leettsoon, par tan kwent chaan Diiz Chul, taxal ndoblo tan kwente.
Paba mni “diox” bluz
21 Lee wets Tíquico, zha kuu nali nak ne thibka ntsow ayudʼn lo rtsin Zha Nabee, lee zha ya lo goo, tsa taa zha kwent chaan na ne kwent re kuu ngetsowʼn lo goo. 22 Kona mtaalʼn zha lo goo, tsa lee zha ne lo goo naa xa nzi nee nzhee, ne koney zha leettsoo goo ne tetsey zha leettsoo goo.
23 Nlazʼn lee Diox kuu nak Xutaa, ne Jesucrist Zha Nabee loʼaa tsow wen kwin goo, ne nlazʼn ke leettsoo goo thib goo ne tedib goo ne thib yelaaz goo Diox. 24 Naabʼn lo Diox tsa lat leettsoo Diox ne Diox reta goo, zha kuu nke leettsoo Jesucrist Zha Nabee loʼaa kon yalnkelaaz kuu nzeet.
¡Tbaa gake!
Paba