1 Leettsa ngwalo mriid re koree, lee Jesús mndiy re yez yezlyu Galilea ne nlaazt Jesús ya Jesús yezlyu Judea, tak tya nlaaz re zha Israel kuth Jesús. 2 Per ndetsin gaxa ani kuu le Ramad, thib re ani kuu ntsow re zha Israel, 3 tsa lee re wets Jesús nzhab lo Jesús:

―Broo nzhee, ne gwa yezlyu Judea, tsa noga re zha kuu nyelaaza kuu nzo tya, wii re kuu ntsowa. 4 Tak leettsa lee thib zha nlaaz zha lebee re men zha, ntsowt zha re kuu xgaatsta. Ne nal os ntsowa re kuu thoz, btsowe delant lo reta men.

5 Tak neeka re wets Jesús ngwalaazt zha Jesús. 6 Tsa nzhab Jesús lo re zha:

―Ter tsin or da, per lee re goo reta or wen lo goo. 7 Lee re men yezlyu nayiit zha ne zha goo, per na si nayii zha ne zha na, tak nloon lee re kuu ntsow zha went nak. 8 Gwa goo lo ani yatʼn nal, tak ter tsin or kuu yan.

9 Ngwalo nzhab Jesús kona lo re wets Jesús, tsa myaanka Jesús yezlyu Galilea.

10 Leettsa lee re wets Jesús nda, noga Jesús mndeke ngwa lo ani, per xgaatsta ngwa Jesús. 11 Tsa lee re zha Israel mkwaan Jesús lo ani, ne mbez re zha:

―¿Ma mbyiʼa?

12 Ne kwathoz nteth re men Jesús. Thib net zha mbez: “Wen nak mbyiʼa”; per lee tedib net zha mbez: “Pa gak zhaʼa zha wen, lee zha nak thib zha kuu nkedi re men”.

13 Per neeka thib zha myet leettsoo gatediz kwent chaan Jesús lo re men, tak nzeb zha ne zha re zha Israel kuu nataak.

14 Per leettsa ndrola ani, tsaraa lee Jesús ngwa lee roo gwodoo, ne mndelo Jesús mloo lo re men tya. 15 Tsa lee re zha Israel kwathoz mzegey leettsoo zha, ne nzhab zha:

―¿Chebee kwathoz nzhaak zha ree, ne ngwat zha skwel?

16 Ora mkab Jesús lo re zha, ne nzhab Jesús:

―Lee leyy kuu ngeloon lo re goo nagte chaan na, leey nak chaan zha kuu mtaalʼn. 17 Os lee thib zha nlaaz tsow kuu nlaaz Diox, tak lebee zha os lee leyy kuu ngeloon nake chaan Diox o chaan na. 18 Lee zha kuu ndaa leeka kwent chaane, ntsow zhay tsa tsow nataak re men zha, per lee zha kuu nkwaan par tsow nataak re men zha kuu mtaal zha, zhaʼa si mbez kuu wli ne nkedit zha.

19 ’¿Chu wlit lee Moisés mndaa ley lo re goo? Per neeka thib goo ntsowt kuu nzhab lo ley. ¿Tak nlaaz goo kuth goo na?

20 Tsa lee re men mkab ne nzhab lo Jesús:

―¡Mbi fyer nzo leettsooʼa, nzhak naxen yeka! ¿Cho nlaaz kutha?

21 Ora nzhab Jesús lo re men:

―Reta goo mzegey leettsoo goo, tak mtsowʼn thib kuu thoz wiz sabd, wiz kuu ndroxkwan reʼaa zha Israel. 22 Moisés mloo lo goo kee goo seny ree mbet byi, seny kuu nak seny chaan reʼaa zha Israel (tegal leet Moisés nak kuu mndelo mtsow koree, sinke re teyaa zha ndala mndeloy), ne tegal wiz sabd nal per lee re goo nkee goo seny re mbet byi goo. 23 Ne os ndak goo wen kee goo seny thib mbetdoo wiz sabd, wiz kuu ndroxkwan reʼaa zha Israel, par tsow goo kuu mbez lo ley chaan Moisés, mbay ¿chebee nayii goo ne goo na, tak mtegwen thib zha wiz sabd tsa? 24 Naabt goo kwent taxal nloo re kwaa lo goo, sinke leettsa naab goo kwent, btsow goo thib mod nali.

25 Tsa lee chop tson re zha Jerusalén nzhab:

―¿Chu leet zha ree kuu nkwaan zha par kuth zha? 26 Ne nal lee zha ndo ngeni lo re men baa, ne neeka thib zha yent kwan mbez lo zha. ¿Chu noga re zha kuu nak tsiin nyelaaz lee zha nak Crist Kuu Mtaal Diox Nabee? 27 Per leeʼaa neʼaa naa cho nak zha, tak leettsa yaad Crist Kuu Taal Diox Nabee, neeka thib zha net naa pa lad roo zha.

28 Ne or ngeloo Jesús lo re men lee roo gwodoo, mbin Jesús tata nzhab re zha, tsa nex nzhab Jesús lo re zha:

―¡Ndak goo nlebee goo na, ne ne goo pa mroon! Per ndyaltʼn tak nlazʼn yalʼn, sinke lee zha kuu mtaalʼn, nak thib zha kuu nali ne wli, ne lee re goo nlebeet goo zha. 29 Per na si nlebeen zha, tak lo zha mroon ne lee zha mtaalʼn.

30 Tsa ngwalaaz re zha gaten zha Jesús, per neeka thib zha mzhent Jesús, tak ter tsin or kuu ten zha Jesús. 31 Kwaro zha ngwalaaz Jesús ne mbez zha:

―Leettsa yaad Crist Kuu Taal Diox Nabee, ¿chu tetsow zha masraa kuu thoz nake zha ree?

32 Tsa lee re fariseo mbin kuu nzhab re men kwent chaan Jesús, re zhaʼa ne re ngwleyy kuu nataak, mtaal zha chop tson zha kuu nkenap gwodoo, tsa ten zha Jesús.

33 Tsa lee Jesús nzhab:

―Bee ndon lo re goo telut tyemp, tsaraa bren lo zha kuu mtaalʼn. 34 Tsa lee re goo kwaan na, per yetsaltʼn lo goo, tak gagt ya goo ta ndyan.

35 Tsa lee re zha Israel mndelo mnaabdiz lo re altaa nzhab:

―¿Pa bi zha, xomod gagt yetsal zha loʼaa? ¿Chu lo re tawlazaa kuu nzo tedib ta ndya zha, re zha kuu nzo xid re zha kuu nagt zha Israel ne tya loo zha lo re zhaʼa? 36 ¿Kwan nak kuu ne zha loʼaa: “Kwaan goo na per yetsaltʼn lo goo, tak gagt ya goo ta ndyan”?

37 Ne wiz kuu nyelo nlux ani wiza nak wiz ro. Ne wiza lee Jesús mndeli ne nex nzhab lo re men:

―¿Os lee thib goo nzheek leettsoo, de goo lon ne gwii goo nit? 38 Taxal nke lo xkiiz Diox: “Lee zha kuu nyelaaz na, leen leettsoo zha gats taxal thib yoo kuu ndaa nit kuu ndaa yalnaban thitanax”. [Ez. 47:1; Zac. 14:8]

39 Kon re diiz ree ngwalaaz Jesús gagab Jesús lo re zha: Loka zha kuu yelaaz Jesús, kayaa zha Mbi Nayon, per ter yaad Mbi Nayon, tak ter bretab Jesús yibaa tsya.

40 Tsa lee chop tson zha kuu mbin kona nzhab:

―Wlipaa lee zha ree nak thib zha kuu ni Diox lo, profet nak zha.

41 Tedib net zha mbez:

―Zha ree nak Crist Kuu Mtaal Diox Nabee.

Per lee tedib net zha mbez:

―Leet zhay, tak lee Crist Kuu Taal Diox Nabee, root Zha yezlyu Galilea. 42 Tak lee lo xkiiz Diox nzhab lee Crist Kuu Taal Diox Nabee, ndoblo gak zha, zha raz chaan rey David, ne ndoblo gak zha, zha yez Belén, leeka yez pa ngol rey David.

43 Kona ngok rol re men kwent chaan Jesús. 44 Nzo cho zha ngwalaaz gago zha Jesús tsib, per neeka thib zha mtsowte.

45 Tsa lee re zha kuu nkenap gwodoo mre ta nzi re fariseo ne re ngwleyy kuu nataak, ne mnaabdiz re zhaʼa lo re zha kuu nkenap gwodoo:

―¿Chebee ndyaadnot goo mbyiʼa?

46 Lee re zha kuu nkenap gwodoo mkab ne nzhab:

―¡Neeka thib zha ndedizt taxal ndediz mbyiʼa!

47 Tsa lee re fariseo nzhab:

―¿Chu noga goo mkediʼa mbyiʼa? 48 Si neeka thib re zha kuu nabee ne neeka re fariseo, ngwalaazt lee mbyiʼa nak Crist, Zha Kuu Ne Diox Yaad Nabee. 49 Per pasya re men kuu nlebeet ley chaan Moisés, tak mkayaa zha mbyiʼa taxal Zha Kuu Mtaal Diox Nabee.

50 Tsa lee Nicodemo, kuu nak thib fariseo kuu ngwatediz lo Jesús thib welt, mkab ne nzhab:

51 ―Lee ley chaanaa mbez: Gagt kekiʼaa thib zha, os ter gonaa kuu ne zha, tsa neʼaa naa kwan mtsow zha.

52 Lee re zha mkab nzhab:

―¿Chu noga lu nak zha Galilea? Bteed xkiiz Diox, tsa yena neeka thib profet ndroot yezlyu Galilea.

53 Tsa kadta thib thib zha ndya zha liz zha.