1 Leettsa ndoraa xoop wiz tsin ani Paskw, tsa myaad Jesús yez Betania ta nzo Las kuu lee Jesús mteroban. 2 Ne tya mdexkwaa zha thib rtsee par Jesús, lee Mart mloo komid leen yann, ne lee Las nak thib re zha kuu mndob roo mes ndow kon Jesús. 3 Tsa lee Mari ndyaadno teeka garol litr perfum kuu chul ndetsi, kuu natexkwaa kon ya kuu le nardo ne kwathoz naape, tsa mloo Mari perfum nii Jesús ne kon yitsek Mari mtekwiiz Mariy. Ne dita leen yuu mndetsii tsii perfum. 4 Tsa lee Judas Iscariote, thib re zha kuu ngeteed lo Jesús, kuu mtsowa xgab taa Jesús lo re zha kuu nayii ne Jesús, nzhab:

5 ―¿Chebee mdot perfum ree por tson gayoo denario, par gakaa re probe?

6 Per nzhabt Judas kona tak ntsow Judas xgab re prob, sinke tata nzhab zha tak wann nak zha, ne lee zha natsaal bols temi, ne nlowann zha temi kuu ngoo re zha leen bols. 7 Tsa nzhab Jesús lo Judas:

―Laaʼa Mari, tak mlotsow Mari perfum ree, tsa chul tetsin leettsa kaats zha na. 8 Lee re prob thibka nzi zha lo goo, per lee na ndotʼn lo goo thitanax.

9 Tyen re zha Israel mbin lee Jesús ndo yez Betania, tsa ngwa zha tya, par wii zha Jesús ne par wii zha Las kuu lee Jesús mteroban. 10 Tsa lee re ngwleyy kuu nabee lo re ngwleyy myaan zha re zha diiz kuth zha Las, 11 tak por lee Las naroob re zha Israel ngwalaaz Jesús ne mlaa zha re ngwleyy.

12 Ne lee tedib wiza, lee naroob re men kuu ngwa lo ani Paskw, leettsa mbin re zha lee Jesús ndetsin Jerusalén, 13 tsa mga re zha la yin, ne mroo zha mkayaa zha Jesús, ne nex nzhab re zha:

―¡Aka wen nak Diox! ¡Aka wen nak zha kuu ndyaad kon yalnabee chaan Zha Nabee! ¡Golaa lo zha kuu nak rey lo re zha Israel!

14 Tsa mzal Jesús thib burr yeen ne mke Jesús dits maa, tsa gak kuu mbez lo xkiiz Diox:

16 Per lee re zha kuu ngeteed lo Jesús, myent zha neeka thib re koree, per bluz leettsa lee Jesús ndya yibaa, tsaraa mtelaaz re zha re kuu ngok, re kuu ndaa xkiiz Diox kwent chaan Jesús.

17 Ne lee re zha kuu ndo kon Jesús, leettsa mrez Jesús Las roo baa, ne mteroban Jesús Las, re zhaʼa mndaa kwent kuu mwii zha mtsow Jesús. 18 Kona lee re men mroo ngwaxiinet Jesús, tak mbin zha re milagr thoz kuu mtsow Jesús. 19 Per lee re fariseo mbez lo re altaa:

―¿Chu ngwiit goo yent kwan tak tsowaa? Reta men ndeke dits zha.

20 Ne xid re zha kuu ngwayol lo Diox lo ani yez Jerusalén, ngwa chop tson zha kuu nak zha gryeg. 21 Lee re zhaʼa mbig lo Lip, kuu nak zha yez Betsaida, thib yez chaan yezlyu Galilea, ne nzhab re zha lo Lip:

―Nlaaz nee wii nee Jesús.

22 Ora lee Lip ngwa nzhabe lo Ndres ne ngwa rop zha nzhab zhay lo Jesús.

23 Tsa nzhab Jesús lo rop zha:

―Mzina or kuu lee Diox tsow nataak xgann. 24 Wlipaa na nin, os lee thib bin nzob xtil yot lo yu ne os leey gathte par lene, thibe yaane ne taate nzob xtil, per os leey yoy lo yu ne lene naroob nzob xtil taay. 25 Lee zha kuu nke leettsoo yalnaban chaan teluux zhay, per lee zha kuu nket leettsoo yalnaban chaan lo yezlyu ree, tetsow zhaʼa gan yalnaban kuu thitanax yibaa. 26 Os lee thib zha nlaaz tsow rtsin na, ndoblo teke zha ditsʼn, ne loka pa ta ndon no zha kuu ntsow rtsin na ndo tya. Ne lee re zha kuu ntsow rtsin na, lee Xutʼn tsow nataak zhaʼa.

27 ’¡Kwathoz nalatt nzo leettsoon nalor! Ne netʼn kwan gapʼn: “Xutʼn, laata riidʼn yalti ree”. ¡Per par kona ndyalʼn! 28 Xutʼn, btsow nataak leʼa.

Tsa ora mbin na thib bos kuu mroo lobee, kuu nzhab:

―Mtsow nataaka nay, ne tetsow nataak nay tedib welt.

29 Ne mbin re zha kuu nzi tya bosa, tsa nzhab re zha, bi ngundiiy, per lee tedib net zha nzhab:

―Thib mandad chaan Diox mni lo zha.

30 Tsa nzhab Jesús lo re men kuu nzi tya:

―Mniit bosa por na, sinke por goo mniy. 31 Ne nal nak or kuu naab Diox kwent lo re men yezlyu ree, ne nal koo Diox Maxuuy kuu nabee lo yezlyu ree. 32 Per leettsa roban na, tsa tsowʼn lee re men yelaaz na.

33 Ne tenzhee mod mndaa Jesús kwent naa xomod gath Jesús. 34 Lee re men mkab lo Jesús ne nzhab:

―Nee ne lee lo ley kuu mkee Moisés mbez, lee Crist Kuu Taal Diox Nabee, thitanax ban zha ne gatht zha. ¿Kona chebee mbeza lee Zha Kuu Mzin Ngok Men ndoblo roban? Ne ¿cho nak Zha Kuu Mzin Ngok Men?

35 Tsa nzhab Jesús lo re zha:

―Nal bee ndo xni lo re goo telut. Bte goo lo xni nalt raa kuu bee ndobke xni, tsa tsint yalkow chatta lo goo taxal thib kuu ngebeta goo, tak lee zha kuu ndiy lo yalkow, net zha pa nda zha. 36 Gwalaaz goo xni nalt raa bee ndobkey lo goo, tsa gak goo zhiinn zha kuu nak xni.

Or ngwalo nzhab Jesús re koree, tsa nda Jesús ne mkaslo Jesús lo re men.

37 Ne tegal mtsow Jesús re milagr thoz lo re zha, per ngwalaazt re zha Jesús, 38 tak tabaa mrolo kuu mkee profet Isaí lo re men, leettsa nzhab profet:

42 Ne tegal tatay, kwathoz re zha Israel ngwalaaz Jesús, ne asta chop tson re gobyern ngwalaaz Jesús, per nzeb re zha gab zhay, tak nzeb zha ne zha re fariseo, tak os lee zha gab zhay, tsa lee re fariseo koo zha ta nkaltaa re zha nteed zha xkiiz Diox. 43 Tak mas nlaaz zha tsow nataak re men zha, nake tsow nataak Diox zha.

44 Tsa nex nzhab Jesús:

―Loka cho nyelaaz na, nyelaazt zha beeta na, sinke noga Xutʼn kuu mtaalʼn nyelaaz zha. 45 Ne loka zha kuu ngwii lon noga ngwii zha zha kuu mtaalʼn. 46 Na nak taxal xni, ne ndyalʼn lo yezlyu ree, tsa loka zha kuu yelaaz na yaant lo yalkow. 47 Per lee zha kuu nzhon xkizʼn, ne nzhont diize, nat naab kwent lo zha, tak ndyaltʼn par naabʼn kwent lo re men, sinke leen ndyalʼn par telaan re men lo yalguth. 48 Lee zha kuu nyelaazt na ne ntsowt re kuu nin, napa zhaʼa cho naab kwent lo zha, leeka re diiz kuu mnin naab kwent lo zha wiz bluz. 49 Tak mnitʼn kuu nlazʼn; sinke re kuu mnabee Xutʼn kuu mtaalʼn, kona mnin. 50 Ne, nen lee kuu mnabee Xutʼn nak, tsow re men gan yalnaban kuu thitanax. Kona reta kuu nin, ni nay taxal mnabee Xutʼn lon.