Diiz Chul chaan Jesucrist kuu mkee
Luk
1
Chebee mkee Luk yeets ree lo Tyof
Tsan Tyof, zha kuu kwathoz nataak.
Kwaro zha ngwalaaz gakee reta kuu ngok lo re nee, taxal ngoke, re zha kuu mwii re kuu ngok kon prop lo zha, ne mwii zha xomod mndelo re koree ndala, re zhaʼa mkayaa tsiin par taa zha kwent xkiiz Diox, ne mne zhay lo re nee. 3-4 Kona mnaabdiza na wen wen naa xomod nak kwent ree, ne ndakʼn wen keen thibgay lo yeets taxal ngoke, tsa neʼa xomod mndelo re kuu wli kuu mloo zha loʼa amig Tyof.
Thib mandad chaan Diox nzhab lee Juan gal
Leettsa lee Herodes nak rey yezlyu Judea, tsya ngoo thib ngwleyy kuu le Zacarí, thib zha kuu nak zha partid chaan ngwleyy Abías. Ne lee tsaal Zacarí le Elisabet kuu nak zha raz Aarón. Rop tsaalta zha nali ndo nyelaaz Diox, nzhon zha diiz reta kuu nabee ley chaan Zha Nabee, tata mod neeka thib kuu gagt keki re men rop zha. Per napt rop tsaal zha mbet, tak mndaat Diox mbet lo Elisabet, ne zha gola rop zha.
Thib wiz, leettsa mdiinn re zha partid Zacarí tsow zha tsiin lo Diox leen gwodoo chaan Diox, ne lee kostumr re zha nak koo zha swert, ne Zacarí mdiinn tab leen gwodoo chaan Zha Nabee, par teyy zha straak lo Diox. 10 Ne or lee straak ngeyeek, lee re men nzi lee ngenaab lo Diox. 11 Tsa lee thib mandad chaan Diox ngwani lo Zacarí, ndeli lad ban lo bkoog ta nteyy zha straak. 12 Ne or mwii Zacarí lo mandad, kwathoz mzegey leettsoo Zacarí ne mzeb Zacarí. 13 Per lee mandad nzhab lo Zacarí:
―Zacarí, tsebta, tak mbina Diox kuu mnaaba lo Diox, lee tsaala Elisabet gap thib mbet, ne Juan tob leʼa mbet. 14 Ne kwathoz naley yo leettsooʼa, ne noga kwathoz men naley yo leettsoo tak lee mbet gal, 15 tak lee xganna gak thib zha nataak lo Zha Nabee. Ne gut zha xit ub ne neeka thib re nit kuu nzo xtuz, ne leettsa bee ter gal mbet lee Mbi Nayon chaan Diox nabeeʼa leettsoo mbet. 16 Ne lee xganna tsow, tsa kwaro re zha Israel bre lo Diox kuu nak Zha Nabee. 17 Ne Juan tener lo Zha Nabee, ne keno Juan leeka Mbi Nayon ne yalney chaan Lí, zha kuu ngok profet ndala. Tsa lee re zha wen kwin zha kon re zhiinn zha, ne lee re zha kuu nzhont diiz, teed gon diiz. Tenzhee mod tolist Juan leettsoo re men, tsa kayaa re men Zha Nabee.
18 Tsa mnaabdiz Zacarí lo mandad ne nzhab Zacarí:
―¿Xomod nen wli kuu neʼa lon? Tak zha gola rop tsaal nee.
19 Tsa lee mandad mkab, ne nzhab lo Zacarí:
―Na nak mandad Gabriel, na ntsow tsiin lo Diox. Ne lee Diox mtaalʼn par tedizʼn loʼa, tsa nin re kuu wen ree loʼa. 20 Per nal, tak ngwalaazta kuu nin, kona yaana mud, ne gagt tediza asta wiz kuu gak re koree.
21 Ne lee re men ngebet Zacarí lee roo gwodoo, ne naabdiz zha lo re altaa zha, naa chebee ntsan Zacarí leen gwodoo. 22 Ne leettsa mroo Zacarí gagt raa tediz Zacarí, tsa myeen re zha lee Zacarí mwii thib kwaa leen gwodoo, ne kon seny mni Zacarí lo re zha, tak myaan Zacarí mud.
23 Ne leettsa ngozhoob wiz kuu mtsow Zacarí kuu ndoblo tsow Zacarí leen gwodoo, tsa ndya Zacarí liz Zacarí. 24 Bluz leettsa ngwalo mriid re koree, lee tsaal Zacarí Elisabet ngoo zhiinn, ne thitanax mroot ngot liz ngot dita thib gaay mbee, tak mtsow ngot xgab: 25 “Mtsow Zha Nabee ayudʼn, mlat leettsoo zha mne zha na, ne mkib zha yalnathoy da lo re men”.
Lee mandad Gabriel ngwanii lo Mari
26 Xoop mbee bluz lee Diox mtaal mandad Gabriel yez Nazaret kuu nzi yezlyu Galilea, 27 ne ngwa mandad lo thib nzaa yeen kuu le Mari, kuu ter gak rop kon neeka thib mbyi, ne nzaa ree naka diiz tseya kon thib mbyi kuu le Che, kuu nak thib zha raz chaan rey David. 28 Tsa mndaab mandad ta nzo Mari ne nzhab mandad:
―¡Tsan Mari, naley bloo leettsooʼa, tak kwathoz wen nzo leettsoo Diox ne Diox lu! Ne lee Zha Nabee ndo kon lu.
29 Per or mbin Mari kuu nzhab mandad chaan Diox lo Mari, neeka net Mari naa kwan tsow Mari, tsa mtsow Mari xgab na chebee tata nzhab mandad lo Mari.
30 Tsa lee mandad nzhab:
―Mari, tsebta, tak wen nzo leettsoo Diox ne Diox lu. 31 Nal lee lu yo zhiinn ne gapa thib mbet ne tob leʼa mbet Jesús. 32 Lee mbet gak thib zha kuu kwathoz nataak lo Diox, ne Xgann Diox kuu ndob yibaa tob le re men mbet, ne lee Diox kuu nak Zha Nabee, tsow tsa nabee zha taxal mnabee David tey zha, zha ndala, 33 tsa thitanax nabee zha lo re zha Israel. Ne lee yalnabee chaan zha luxt thitanax.
34 Tsa lee Mari mnaabdiz lo mandad, ne nzhab:
―¿Xomod tak gak koree? Tak lee na ter gakʼn kon neeka thib mbyi.
35 Lee mandad mkab, ne nzhab:
―Lee Mbi Nayon ne lee yalney chaan Diox kuu ndob yibaa la ditsa taxal thib xkow. Kona lee zhiinna kuu gal role Xgann Diox. 36 Noga Elisabet zha liza gap thib mbet, tegal zha gola Elisabet, ne tegal mndaat Diox mbet lo Elisabet. Per ndaʼa xoop mbee nzo zhiinn Elisabet. 37 Tak lee Diox nzhaak ntsow reta kwaa.
38 Tsa lee Mari nzhab:
―Na nak mos chaan Zha Nabee, ndoblo tsow Diox lon taxal neʼa lon.
Oraaka lee mandad ndya.
Mari ngwatwii lo Elisabet
39 Ne leeka thib re wiza, kwathoz nyob leettsoo Mari ngwa Mari thib yez kuu nzi leen yii yezlyu Judea, 40 ne or mzin Mari liz Zacarí, mni Mari “diox” lo Elisabet. 41 Ne leettsa mbin Elisabet mni Mari “diox” lo Elisabet, lee mbet Elisabet kwathoz naley ngoo leettsoo, ne mwin mbet leettsoo Elisabet, ne oraaka lee Mbi Nayon mnabee leettsoo Elisabet. 42 Tsa lee Elisabet nex nzhab:
―¡Kwathoz wen nzo leettsoo Diox ne Diox lu nake tedib net re ngot, ne kwathoz wen nzo leettsoo Diox ne Diox xganna! 43 ¿Cho nakʼn par ndyaada ndyaadtwiiʼa lon xnaa Zha Nabee lon? 44 Tak leettsa mbin na mniʼa “diox” lon, kwathoz naley ngoo leettsoo mbet da ne mwiin mbet leettsoon. 45 ¡Kwathoz wen ndaʼa, tak ngwalaaza lee Zha Nabee tsow re kuu ne zha tsow zha loʼa!
46 Tsa lee Mari nzhab:
Lee yalnaban da nzhool lo Zha Nabee,
tak lee zha nzhaak ntsow reta kwaa,
47 ne lee xbi da kwathoz naley nzo leettsoo ne Diox, kuu koon lo yalguth ne lo re falt da.
48 Ne tegal nataagt, per lee Diox mlin,
ne desde nal lee re men telo ni lon zha nataak,
49 tak lee Diox nap yalney, kona mtsow Diox re kuu thoz lon.
¡Ne Nayon nak le Diox!
50 Thibka nlat leettsoo Diox ne Diox re zha kuu nzhon diiz lo Diox.
51 Ne mtsow Diox re kuu thoz, kon yalney chaan Diox.
Ne mluux Diox re xgab re zha kuu naro nak.
52 Mkib Diox yalnataak lo re zha kuu nabee,
ne mtsow nataak Diox re zha kuu nataagt, kuu nadoo nak.
53 Kwaro kwaa mndaa Diox lo re zha kuu nlann,
per lee lo re zha rik yent kwan mndaa Diox lo re zha.
54 Mtsow Diox ayud re nee, zha Israel,
ne mlat leettsoo Diox mne Diox nee,
mnithlaazt Diox re nee zha kuu nak mos Diox,
55 taxal nzhab Diox lo teyaa Abraham zha ndala,
lo Abraham ne lo re zha raz Abraham.
56 Tsa mlet Mari teeka tson mbee liz Elisabet, tsaraa ndya Mari liz Mari tedib welt.
Leettsa ngol Juan
57 Ne leettsa mzin wiz gal zhiinn Elisabet, ngop Elisabet thib mbet bi. 58 Tsa mbin re zha liz Elisabet ne re zha kuu nzo gaxta liz Elisabet, lee Diox mlat leettsoo mne Elisabet, tsa ngwatwii re zha lo Elisabet ne mndaa re zha texkix lo Diox. 59 Ne leettsa mzaal mbet xon wiz, lee chop tson zha liz Zacarí ngwa mkee seny mbet, kuu nak seny re zha Israel. Ne ngwalaaz re zha gatob le zha mbet Zacarí taxal le xut mbet. 60 Per lee xnaa mbet nzhab:
―Rolet mbet tabaa, Juan role mbet.
61 Tsa lee re zha nzhab lo Elisabet:
―Neeka thib zha liza let tabaa.
62 Tsa kon seny mnaabdiz zha lo xut mbet, tsa naa xomod nlaaz xut mbet role mbet. 63 Per lee Zacarí xut mbet mnaab thib le tabl, tsa kee Zacarí lee mbet lo tabl, tsa mkee Zacarí lo tabl: “Juan role mbet”. Ne reta zha kwathoz mzegey leettsoo zha mbin zha kona. 64 Ne oraaka lee Zacarí mre mndediz tedib welt, ne mndelo Zacarí mbil lo Diox. 65 Ne reta zha kuu nzo gax liz Zacarí kwathoz mzeb zha por kuu ngok, ne reta zha kuu nzo re yez kuu nzi leen yii chaan yezlyu Judea, mndediz zha re kuu ngok. 66 Ne reta zha kuu mbin re kuu ngok nda leettsoo zha, ne nzhab zha: “¿Cho nak mbet ree?” Tata mtsow re zha xgab, tak lee Zha Nabee mtsow re kuu thoz lo mbet.
Zacarí mbil lo Diox
67 Ne lee Mbi Nayon mnabee leettsoo Zacarí xut mbet, tsa mndaa Zacarí kwent kuu nzhab Diox lo Zacarí, ne nzhab Zacarí:
68 ¡Kwathoz wen nak Zha Nabee, Diox kuu nak Diox reʼaa zha Israel,
tak myaad Diox lo reʼaa kuu wlipaa nak zha yez Diox, ne mtelaa Diox reʼaa lo re faltaa!
69 Ne mtaal Diox thib zha kuu tak kooʼaa lo yalguth, ne tuyy zha re falt chaanaa kon yalney chaan zha.
Zha ree ndyaad lo raz chaan rey David kuu ngok teyaa, ne kuu ngok mos Diox.
70 Koree nak kuu nzhab re profet kuu ngoo ndala, re zha kuu nambi mndo lo Diox.
Leettsa nzhab zha:
71 Diox nak cho telaaʼaa lo re zha kuu nayii neʼaa, ne lo re zha kuu went nzo leettsoo neʼaa. [Sal. 106:10]
72 Ne loo Diox xa nlat leettsoo Diox ne Diox reʼaa, tak mnithlaazt Diox re diiz kuu nzhab Diox lo re teyaa, zha ndala.
73 Ne koree nak kuu nzhab Diox lo teyaa Abraham:
74 Nzhab Diox lee Diox telaaʼaa lo re zha kuu nayii neʼaa, tsa tsebtaa tsowaa rtsin Diox.
75 Ne ndoblo thibka nambi ne nali toʼaa lo Diox, reta wiz kuu nabanaa.
Tsa nzhab Zacarí lo xgann Zacarí:
76 “Lee lu nak profet chaan Diox kuu ndob yibaa, tak lu tener lo Zha Nabee,
tsa xaala xnet zha,
77 ne taaʼa kwent lo re zha kuu nak zha yez chaan Diox,
lee Diox tuyy re falt zha,
ne taa Diox yalnaban kuu thitanax lo re zha.
78 Tak nlat leettsoo Diox ne Diox reʼaa,
kona ndaa Diox tedib xni kuu taxal xni wiz lo reʼaa,
79 tsa la xni ree lo re zha kuu nzo lo yalkow,
ne lo re zha kuu nzo xann xkal chaan yalguth,
ne ko Diox reʼaa net kuu wen kwinaa.”
80 Ne lee mbet ndezhen raa ne nzhak ney mbet lo Mbi Nayon chaan Diox, ne wan ngoo zha, asta wiz kuu mndelo zha mndaa kwent xkiiz Diox lo re zha Israel.