6
Re sey
1 Tsa mwiin lee Mbak zhiil mchat thib sey. Ne mbin na lee thib re maa nabana mni taxal nzhats ngundii ne:
―¡De nzhee!
2 Tsa mwiin ne ngwani thib kabay naguz lon; ne lee zha kuu ndob dits maa nzo thib ark yaa zha. Ne mkayaa zha thib koron, ne mroo zha taxal thib soldad kuu nda lo zhoo, kuu mtsow gan ne tsow gan.
3 Leettsa lee Mbak zhiil mchat sey mrop, tsa mbin na lee maa mrop kuu nabana nzhab:
―¡De!
4 Tsa mroo thib kabay nane, ne lee zha kuu ndob dits maa mkayaa yalnabee, tsa tsow zha yo zhoo lo yezlyu, tsa kuth altaa re men taben men; ne mkayaa zha thib espad naro.
5 Ne leettsa lee Mbak zhiil mchat sey myon, tsa lee myon maa nabana nzhab:
―¡De!
Tsa mwiin thib kabay yaat, ne lee zha kuu ndob dits maa, nzo thib bex yaa. 6 Ne ndrol lo thap maa nabana mbin na thib bos kuu nzhab:
―Thibka kil nzob xtil, nak kuu ntsow zha gan ke zha tsiin thib wiz, ne tson kil cebad nak kuu ntsow zha gan ke zha tsiin thib wiz; per tetsaata aseyt ne neeka xit ub.
7 Or lee Mbak zhiil mchat sey mdap, tsa mbin na lee maa naban kuu mdapa nzhab:
―¡De!
8 Tsa mwiin thib kabay kuu guts na, ne lee zha kuu ndob dits maa le yalguth, ne lee dits zha ndeke Hades. Ne lee zhaʼa mkayaa yalnabee, tsa luux zha thib part lo thap part lo yezlyu, tsa kuth zha re men kon zhoo, kon win, kon yiz ne kon re maa nayii kuu nzhow men.
9 Ne lee Mbak zhiil mchat sey gaay. Tsa mwiin lee re zha kuu nguth kwent chaan xkiiz Diox, nzi xann bkoog chaan Diox, tak mndaa zha kwent chaan Jesucrist. 10 Ne dib gan re zhaʼa mbez zha:
―Lu nak Zha Nabee, nayon ne nali naka, ¿pol naaba kwent lo re men yezlyu, ne tetiʼa re zha taxal mtsowno zha nee?
11 Tsa mndaa Diox lar naguz mdok re zha, ne nzhab Diox lo re zha:
―Bee taneyy raa goo telut, asta yelo kaltaa re wets goo ne re btan goo kuu gath taxal nguth goo, tak reta goo ntsow rtsin na.
12 Leettsa lee Mbak zhiil mchat sey xoop. Tsa mwiin mwin thib zho thoz. Ne lee lo wiz mkow taxal na lar yaat ne lee lo mbee myaan taxal ren, 13 ne lee re mbel kuu nzib lobee mrethin mla lo yu, taxal ndrethin re ig yeen lo ya ig, leettsa kwathoz nzhax mbi. 14 Ne lee lobee mnith taxal thib yeets kuu nduz, ne reta yii ne reta yezlyu kuu nzi leen nitdoo, mwine ta ndobe. 15 Ne lee re rey yezlyu ree mkaslo leen re kelyoo, ne re leen re kedoo, leen yii, kon re zha kuu nataak lo yezlyu, kon re rik, kon re zha kuu nabee lo re soldad, kon re zha kuu nap yalnabee, kon reta zha kuu nak mos ne kon re zha libr; 16 ne mbez zha lo re yii ne lo re ke:
―Bla goo dits nee, ne bkaatslo goo nee lo Diox, ne bkaatslo goo nee lo yalti kuu taal Mbak zhiil.
17 Tak mzina wiz kuu kwathoz nathoz rid re men yalti; ¿ne cho xek rid re yalti ree?