19
1 Leettsa ngwalo mriid re koree, tsa mbin na bos chaan naroob men leen yibaa, kuu nzhab:
¡Golaa lo Zha Nabee!
Lee yalnaban kuu thitanax, xni ne yalney nak chaan Diox reʼaa,
2 tak wlipaa nali naab Diox kwent;
tak mnaaba Diox kwent lo ngot, kuu kwathoz nzib xkiiz ngok rop kon re men,
ngot kuu mtetsaa re men yezlyu kon re kuu went kuu mtsow ngot;
ne mnaaba Diox kwent lo ngot por ren re zha kuu ngok mos Diox.
3 Ne tedib welt nzhab zha:
―¡Golaa lo Zha Nabee! Ne lee laann kuu ngeyeek ngota thib nkendab.
4 Tsa lee re galbthap zha gola ne re thap maa kuu nabana, mkiits yek lo yu ne mbil lo Diox, ta ndob Diox nabee Diox, ne nzhab re zha:
―¡Tata gake! ¡Golaa lo Zha Nabee!
5 Tsa lee ta ndob Diox mroo thib bos kuu nzhab:
¡Bil goo lo Diox reʼaa,
reta goo kuu ntsow rtsin Diox ne nzeb ne Diox,
re zha nataak ne re zha nataagt!
Yaltseya chaan Mbak zhiil Diox
6 Noga mbin na thib bos kuu taxal bos naroob men, kuu nke bi taxal thib yoo kuu kwathoz naro, ne taxal bi ngundii, kuu mbez:
¡Golaa lo Diox!
Tak lee Diox reʼaa kuu kwathoz ney, mndeloʼa nabee.
7 Naley ne wen yo leettsooʼaa ne golaa lo Diox,
tak mzina wiz kuu lee Mbak zhiil Diox tseya,
ne lee tsaal Mbak zhiil lista ndo.
8 Ne mndaa zha diiz,
gok tsaal Mbak zhiil lar kuu wen, nambi ne nzhuyy.
Tak lee lar wena, nak re kuu wen kuu mtsow re zha kuu nak zha yez chaan Diox.
9 Tsa lee mandad chaan Diox ne lon:
―Bkee koree lo yeets: “Wen nda re zha kuu mrez zha ya lo fandan chaan Mbak zhiil”.
Ne noga ne mandad lon:
―Wlipaa xkiiz Diox nak re diiz ree.
10 Ne mtobxubʼn xann nii mandad par golʼn lo mandad, ne lee mandad ne lon:
―Tsowta kobaa, lo Diox bil; tak lee na nakʼn mos chaan Diox taxal lu ne taxal re wetsa ne re btana, kuu nali ndo ndaa kwent xkiiz Jesucrist. Tak reta kuu wli chaan Jesús mtsow lee re profet mndaa kwente taxal ndobloy.
Zha kuu ndob dits kabay naguz
11 Tsa mwiin lee lobee ndezhaal, ne mloo thib kabay naguz lon, ne lee zha kuu ndob dits kabay le Zha Nali ne Zha kuu ni kuu wli, tak nali naab zha kwent ne nali ngyo zha. 12 Lee ngutlo zha nla xni taxal loz bel, ne lee yek zha ndob tyen koron, ne nap zha thib le zha kuu beeta lee zha nlebee. 13 Ne nok zha thib lar kuu nayi ren, ne lee le zha nak xkiiz Diox. 14 Ne lee re soldad yibaa ndeke dits zha, ne nok xab re soldad kon lar kuu kwathoz wen, kuu naguz ne nambi na, ne ndob re soldad dits kabay naguz. 15 Ne lee roo zha ndroo thib espad kuu kwathoz nale, ne kon espada luux zha reta yez kuu nzi lo yezlyu. Ne nabee zhay kon thib bar yiib. Ne taxal ntii zha ub, naab zha kwent lo re men, kon yalnayii chaan Diox kuu kwathoz ney. 16 Ne lo xab zha ne cho kor zha nke le zha kuu nzhab: “Rey kuu nabee lo reta rey, ne Zha Nabee kuu nabee lo reta zha kuu nabee lo yezlyu”.
17 Ne mwiin thib mandad kuu ndeli dits wiz, ne dib gan zha nzhab zha lo re min kuu ndab lobee:
―¡De goo kaltaa goo lo rtsee naro chaan Diox, 18 tsa wu goo beel chaan re rey, beel chaan re zha kuu nabee lo re soldad, beel chaan re zha kuu ney leettsoo, beel chaan re kabay, beel re zha kuu mndob dits kabay, beel reta zha kuu ngogt mos ne re zha kuu ngok mos, re zha nataak ne re zha nataagt!
19 Tsa mwiin maa kuu kwathoz nathoz na ne re rey yezlyu kon re soldad re rey, reta rey mkaltaa, par tsow zhoo lo zha kuu ndob dits kabaya ne kon re soldad zhaʼa. 20 Ne lee zha kuu ndob dits kabay naguza, mniit maa kuu kwathoz nathoz na ne zha kuu wlit nak profet, kuu mtsow kwathoz re kuu thoz kon yalney chaan maa kuu kwathoz nathoz na. Ne kon re kuu thoza mkedi zha kwaro men, kuu mke sey chaan maa kuu kwathoz nathoz na, ne re zha kuu mbil lo imaj chaan maaʼa. Tsa lee maa kuu kwathoz nathoz na ne zha kuu wlit nak profet, naban zha mlobi zha zha lo bel kuu nzheek kon azufre. 21 Ne lee tedib net zha nguth kon spad, kuu ndroo roo zha kuu ndob dits kabay naguza, ne lee re min kuu nzhow beel mze leettsoo maa ndow maa beel re mena.