10
1 Re goo wetsʼn ne btan na, lee kuu kwathoz nlazʼn ne naabʼn lo Diox nak, tsow re tawlazʼn zha Israel gan yalnaban kuu thitanax. 2 Ne nzon fabor zha, tak nen kwathoz nlaaz zha tsow zha tsiin lo Diox, per ntsowt zhay taxal ndobloy, tak nlebeet zha kuu wlipaa. 3 Ne net zha naa xomod ntsow nali Diox men lo Diox; leel mtsow zha re kuu nlaaz zha par nali to zha lo Diox, ne tak tata mtsow zha kona mbint zha diiz nali gato zha lo Diox, 4 tak Jesucrist mtsow reta kuu mbez lo ley, tsa loka zha kuu yelaaz Jesucrist tsow zha gan gak zha, zha nali lo Diox.
5 Loka zha kuu nlaaz nali to lo Diox, tak nlaaz zha tsow zha kuu nzhab lo ley kuu mndaa Diox lo Moisés, ndoblo tsow zha re kuu nzhabe, tak tenzhee mkee Moisés: “Loka zha kuu gon diiz reta kuu nzhab lo ley, taban zha”. [Lv. 18:5] 6 Per lee zha kuu nali ndo lo Diox, nyelaaz zha Diox. Kona ndoblot ta leettsoo zha gab zha: “¿Cho tsow gan kendab yibaa? Koree nak nlache zha Crist lo yezlyu; 7 o ¿cho la leen yeerdoo? Koree nak teroban zha Jesucrist xid re zha nguth.” 8 Kona lee xkeets Diox nzhab: “Gax loʼa ndo Diiz Chul chaan Diox, gax rooʼa ne gax leettsooʼa ndoy”. [Dt. 30:12-14] Koree nak Diiz Chul kuu ndaa nee kwent. 9 Tak os leeʼa kon rooʼa gaba lee Jesucrist nak Zha Nabee, ne kon leettsooʼa nyelaaza lee Jesús mroban xid re zha nguth, tetsowa gan yalnaban kuu thitanax. 10 Tak kon leettsoo men nyelaaz men lee Diox mteroban Jesucrist, kona nak men zha nali lo Diox, ne kon roo men ndoblo ni men lee Jesucrist nak Zha Nabee, tsa tsow men gan yalnaban kuu thitanax.
11 Tak lo xkeets Diox nzhab: “Reta zha kuu yelaaz Jesucrist, thoyt zha ne zha Diox”. [Is. 28:16] 12 Tak lo Diox lalka nak re zha Israel kon re zha kuu nagt zha Israel. Tak lee Diox nak Zha Nabee lo reta zha, ne wen nak Diox lo reta zha kuu naabe lo Diox. 13 Tak tenzhee nzhab lo xkeets Diox: “Reta zha kuu mbez Zha Nabee, tetsow zha gan yalnaban kuu thitanax”. [Joél 2:32] 14 Ne ¿xomod tak tediz zha lo Diox, os lee zha nyelaazt zha Diox? ¿Ne xomod yelaaz zha Diox os ter gon zha xkiiz Diox? ¿Ne xomod gon zha xkiiz Diox, os yent cho taa kwente lo zha? 15 ¿Ne xomod taa zha kwent Diiz Chul lo tedib zha, os yent cho taal zha? Taxal nzhab lo xkeets Diox: “¡Kwathoz wen nak leettsa ndyaad thib zha kuu ndaa kwent Diiz Chul chaan Zha Nabee!” [Is. 52:7]
16 Per ret men ndaa yek gon Diiz Chul. Taxal mkee Isaí lo xkeets Diox: “Zha Nabee, ¿neeka thib zha ngwalaazt xkiza kuu mndaa nee kwent?” [Is. 53:1] 17 Kona neeka thib men gagt yelaaz Jesucrist, os yent cho taa kwent chaan Jesucrist lo zha.
18 Ne ¿kwan ntsow goo xgab? ¿Chu mbint re men xkiiz Diox? ¡Wlipaa mbin zhay! Tak lo xkeets Diox nzhab Diox:
Reta zha kuu nzi lo yezlyu mbin xkiiz Diox kuu mndaa re zha kwent,
asta ta mas tith lo yezlyu mbin zhay. [Sal. 19:4]
19 Noga naabdizʼn lo goo, ¿kwan ntsow goo xgab? ¿Chu myent re tawlazʼn zha Israel koree? Wlipaa myen zhay, tak ner Moisés mndaa kwent xkiiz Diox, ta nzhab Diox:
Na tsow gak celos goo, leettsa wii goo naa xa nkenapʼn tedib net re zha kuu nagt zha yez ree;
ne tsowʼn tsa yii goo ne goo tedib net re zha,
kuu nlaazt yene. [Dt. 32:21]
20 Noga mkee Isaí kuu nzhab Diox:
Lee re zha kuu mkwaantʼn, mzalʼn lo zha;
ne lee re zha kuu mnaabdizt na, mlebee zhaʼa na. [Is. 65:1]
21 Ne Isaí mndaa kwent chaan re zha Israel ne nzhab Isaí: “Dita wiz mtabʼn yaan ne mrezʼn goo, per mndaat goo yek goo gagon goo diiz xkizʼn ne mlaa goo na”. [Is. 65:2]