2
Wlenza Espíritu Sant
1 Chene wdxiin lni Pentecostés, wdop yrandxee mén ne rlaleedx Jesucrist tebegue lugar. 2 Tebegue won men te be ne wruu axtegue gyeybaa, zegnak chene kesentyent rlen mee, wuu be guin ydendxee lenyuu ledne ndxin men. 3 Lex wlalo ndal zegnak loz mén, nako zegnak bël, wrëëtso xtoo men te te men. 4 Kesentyent waknonen Espíritu Sant men yrandxee men, wzelo men rnii men ste klas diiz zegne wlaan Espíritu Sant ne ynii men.
5 Ndalyaa men-Israel ne rlaa zegne rlaan Dëdyuzh ndxin Jerusalén dxe guin; noze yde lo gyëzlyu wruu men wdxiin men Jerusalén. 6 Chene won men be guin, wdop men wa men wii gan koxo. Chene wdxiin men nga, ni nandet men pe wuu lextoo men, porke ron men rnii yra mén guin ne rlaleedx Jesucrist xdiiz men ne rnii men te te men. 7 Kesentyent wzee wzak men axtegue nandet men pe nlaa men, lex re men lo xkompanyer men:
―¿Pe let men-Galileadet nak yra ménree ne kanii? 8 ¿Pezee rnii men xdiiz be te te be? 9 Nee ndxin men-Partia, men-Media, men-Elam, men-Mesopotamia, men-Judea, men-Capadocia, men-Ponto, men-Asia, 10 men-Frigia, men-Panfilia, men-Egipto, no le men-Libia ne nak guex Cirene, no le men-Roma. Gwrol ménree nak men-Israel axtegue ne wal men. Gwrol zeg men gyed wlaleedx Dëdyuzh zegne rlaleedx men-Israel Dëdyuzh. 11 No ndxin ke men-Creta no le men-Arabia. ¡Per yrandxee be ron be rzëët men kon xdiiz be yra gyelenzoon ne rlaa Dëdyuzh!
12 Kesentyent wzee wzak yrandxee mén guin axtegue nandet men pe wuu lextoo men, lex wnabdizlsaa men, re men:
―¿Goxleg rna yra neree?
13 Per nuu men lel wzhidxno, re men:
―¡Rzudxen yra ménree!
Diiz ne re Bëd lo mén
14 Lex wzuli Bëd tese yra Bëd schibteb poxter, ndípse wnii Bëd, re Bëd:
―Men-Israel no le yra mén ne nuu Jerusalén, gugaknan neree yra de no wen wenendxee gugon logne yna noo lo de. 15 Yra ménree rzudxden men zegne nuu lextoo de, porke penendxee beygaa rsil. 16 Neree ne kayak, laa we nga wzëët profet-Joel chene re men:
17 Re Dëdyuzh: “Chene che lultim dxe
yxaal noo XEspíritu noo gaknonen yrandxee mén.
Yra zhingaan men no le yra zhinzaap men yzëët diiz ne guu noo lextoo men;
yra menyu, nuu ne ylalo lo men;
le yra mengol nexgyëëlen lo mkaal.
18 Chene ydxiin dxe guin, yxaal noo XEspíritu noo gaknonen yra mgyeey no le yra wnaa ne kalaa xdxiin noo,
lex yzëët men diiz ne guu noo lextoo men.
19 Le gyeybaa konyoo noo ne yzee sak mén,
le gyëzlyu tsuu beey
ne nak zegnak ren, zegnak bël, zegnak bëwguux.
20 Gaknkeb lo ngbiz,
le mëëw gak zegnak ren
antes ne ydxiin dxe ne nzhoo no ne nzoon
ne chiid Crist.
21 Yrandxee mén ne ynab lo Dëdyuzh, sláá men lo dol.”
22 ’Men-Israel, gugon yra diizree ne yzëët noo lo de: Wbonyoo Dëdyuzh xgyelnon Jesus men-Nazaret por yra gyelmilaguer ne wlaa Ne nes lo de yra de no le yra beey ne wzee wzak de, no nan de ne nli we. 23 Wlaa de Jesus zegne che wlebleedx Dëdyuzh no zegne che nan Dëdyuzh axtegue chekwlo. Wnëëz de Ne yra de wdekwent de Ne lo menmal chen ykaa men Ne lo kruz guet Ne. 24 Per wneban Dëdyuzh Ne no wselaa Dëdyuzh Ne lo gyelgut, porke gundet gyelgut gan lo Ne. 25 Laa xkwent Ne nga re rrey-David chene re men:
Noo syemper rwii noo zu Dëdyuzh lo noo;
wii noo zu Ne koo noo ladbëë; por neguin bet gundet gan lo noo.
26 Por neguin kesentyent rzhiilen lextoo noo no rzhiilen noo rolbaan noo,
zet noo, per tebli nuu lextoo noo, porke che nan noo ne sban noo,
27 porke ydeedet de si gyan noo lenbaa
no ydeedet de si xiin xkwerp XPee de ne bet dol rlaadet.
28 Laa de wlaa ne waknan noo nëz ne gak ydxiin noo lo Dëdyuzh ledne gap noo gyelembán.
Kesentyent yzhiilen noo ne kwii noo de.
29 ’Men-Israel, yzëët noo logne nli lo de: David ne nak xpenkwlal be, wet men, wgugyeer mén men, no benak nex xbaa men nee axtegue naaree. 30 Te profet wak men no wkanzaleedx men ne re Dëdyuzh lo men ne lad xfamilye men yruu Crist ne sob ynebééy. 31 Axtegue antes che nan men neree; por neguin re men ne sban Crist no ne gyandet Ne lenbaa, ni xiindet xkwerp Ne. 32 Naaree naa le Dëdyuzh che wneban Jesus guin; no wii noo yra noo ne nli wban Ne. 33 Sya Ne gyeybaa koo Dëdyuzh ladbëë no wkakwent Ne Espíritu Sant ne che re Dëdyuzh; orrenaa le Ne che wxaal Espíritu Sant lo noo yra noo; laa we nee nak ne kawii de yra de no ne kayon de. 34 Porke let Davidet wyeep gyeybaa, porke David ke re:
Dëdyuzh re lo XDëdyuzh noo:
“Gusob koo noo ladbëë
35 axtegue ne ylaa noo ne gyichnii de yrandxee mén ne rlaa lo de.”
36 ’Yrandxee de ne nak de men-Israel, gugaknanwen ne Jesus ke ne wkaa de lo kruz, Dëdyuzh wlaa ne laa Ne rnebééy no wlaa Dëdyuzh Ne Crist.
37 Chene won yra mén ne ndxin nga diizree, wdenles lextoo men. Orguin wnabdiiz men lo Bëd no le lo stebëd poxter, re men:
―¿Pagox nak ne ylaa noo?
38 Wke Bëd, re Bëd:
―Gusaan xgyelmal de no gurobnis te te de por la Jesucrist, chen gun Dëdyuzh perdon xdol de no chen yseleedx Ne Espíritu Sant lo de yra de. 39 Porke diiz guin ne re Dëdyuzh, por laa de yra de nako no le por yra zhiin de no le por yrandxee mén ne nuu nat no le por yrandxee mén ne rlaantee Dëdyuzh kwëz Ne.
40 Yra diizree wnii Bëd lo men yra men no ndalre diiz ne wnino Bëd men, re Bëd:
―¡Guruu lad menmal ne nuu naaree!
41 Yra mén ne wlaleedx diiz ne wzëët Bëd, wrobnis men. No dxe ke guin wdee zeg stsonmil mén lad men ne rlaleedx Jesucrist. 42 Kesentyent nulyaaz men yra ne rneluu poxter lo men, tebegue nak men yra men no ra men ru men gyëtxtil tese yra men zegne wkyeen Jesus no rnab men lo Dëdyuzh.
Zegne wbán yra mén ne primer wlaleedx Jesucrist
43 Kesentyent rzee rzak yrandxee mén por yra gyelmilaguer no le por yra gyelenzoon ne rlaa poxter. 44 Yrandxee mén ne wlaleedx Jesucrist, tebegue wak men yra men no runelsaa xyudar xkompanyer men kon logne rapendxee men. 45 Rtoo men xelyu men no rtoo men logne rapendxee men, lex rgyiiz men med lo xkompanyer men segun lyaaz ne rzak men te te men. 46 Yzhe yzhendxee rdop men lenxeydoo Dëdyuzh no axtegue nzoon nuu lextoo men ra men gwdu ruxyuu xkompanyer men ydebgyiky ydeblextootee men. 47 Rzaknon men Dëdyuzh, no ryaan yrandxee mén men. Yzaandxee dxe zalandalre Dëdyuzh yra mén ne yláá lo dol.