1 Zhich guin wlalo Jesus lo tebëd xpén Ne ste chene ndxin men runis-Tiberias. Zeree wlalo Ne: 2 Te chene zu Simon-Bëd yra Simon-Bëd Tmazh ne rnii mén Mzhoz, no le Natanael men-Caná gyëz ne nak lo lyu ne la Galilea, no le yrubech xpee Zebedew, no le stxup xpén Ne, 3 re Simon-Bëd lo men:

―Le noo tsa gozmël.

Re men:

―No noo saa tsa be.

Lex wdxiin men ledne zob bark, wdee men leeno za men, per bet mël wzuundet lo men gyëël guin. 4 Chene zëdyenii lyu, wlalo Jesus lo men runis, per nandet men ne Jesus ne. 5 Lex re Ne lo men:

―Zhiin, ¿pe ni te mël gardet yzuun lo de?

Wke men re men:

―Axtegue ni te maa.

6 Orguin re Ne lo men:

―Gutxoon xgyix de koo bark ladbëë, suun maa.

Lex wtxoon meno, le chene nboo meno, axtegue rakdet koo meno tant ndal mël wzuun. 7 Lex wbig xpoxter Ne ne kesentyent ryaan Ne, re men lo Simon-Bëd:

―¡Jesus ne!

Zegne won Simon-Bëd ne Jesus ne, wak xab men, porke nakdet meno, lex wyab men lo nis. 8 Le stebëd xpén Ne wdxinno bark runis, kakamloy men gyix yzaa mël lengyix, porke zobdet bark nat, zeg tebgwyuu ke meter zobo kwlo runis. 9 Chene wruu men lenbark, wii men le gyi che rul, te mël che zhoob lo gyi no le gyëtxtil. 10 Lex re Ne lo men:

―Gutano tebëd mël ne gyed wzuun lo de.

11 Orguin wdee Simon-Bëd lenbark, wgobzengye men gyix axtegue lo yuzh, yzaa mëlnzhoo leeno, tebgwyuuno-txupchibtson ma nuu leeno; no mase lal ma nga nuu, no wrëzdet gyix. 12 Lex re Ne lo men yra men:

―Gutaa yxenzhen de.

No ni te men wyezhdet nnabdiiz lo Ne ne nye men: “¿Txu laa de?”, porke nan men ne Jesus ne. 13 Orguin wbig Ne, wgoob Ne gyëtxtil wdee No lo men; zenga ke wlaa Ne mël.

14 Laa ne wak tson tir ne wlalo Ne lo yra xpén Ne nee chene che wban Ne.

15 Chene wluzh wxenzhen men, re Jesus lo Simon-Bëd:

―Simon xpee Jonás, ¿pe ryaandee de noo ke lo yra menree?

Wke Simon-Bëd, re Simon-Bëd:

―Ryaan noo de Dechey. Laa de nan de ne ryaan noo de.

Lex re Ne:

―Gugapkwent xpén noo bes.

16 Zhich guin re Ne lo Simon-Bëd ste:

―Simon xpee Jonás, ¿pe ryaan de noo?

Wke Simon-Bëd, re Simon-Bëd:

―Ryaan noo de Dechey. Laa de nan de ne ryaan noo de.

Lex re Ne:

―Gugapkwent xpén noo bes.

17 Ne wyon tir ne re Ne lo Simon-Bëd:

―Simon xpee Jonás, ¿pe ryaan de noo?

Wdenles lextoo Simon-Bëd por ne wnabdiiz Ne tson tir gan pe ryaan Simon-Bëd Ne. Lex re Simon-Bëd lo Ne:

―Dechey, laa de nan de yrandxoo; nan de ne ryaan noo de.

Lex re Ne lo Simon-Bëd:

―Gugapkwent xpén noo bes. 18 Nligue yna noo lo de ne chene benak menyu de, wak de xab de, wa de ledne wlaantee de, per chene gyuux de, yzegaa nya de, wren men ne ynegak xab de, tsano men de ledne rlaandet de tsa de.

19 Ne re Ne zenga, wzëët Ne gan pezee guet Simon-Bëd chen por xgyelgut Simon-Bëd gaknyoor xgyelenzoon Dëdyuzh. Wluzhse re Ne zenga, lex re Ne lo Simon-Bëd:

―¡Gutanal noo!

20 Chene wcheree lo Simon-Bëd, wii Simon-Bëd no ke xpoxter Jesus ne kesentyent ryaan Ne zanal Ne, men ne wzob ke koo Ne chene wuxsëë men yra men Ne, no ne wnabdiiz ke lo Ne, ne re: “Dechey, ¿txuzh nak ne ydekwent de?” 21 Ne wii Simon-Bëd men, re Simon-Bëd lo Ne:

―Dechey, zhan gwa naa, ¿pezee sak zhaa?

22 Wke Ne re Ne:

―Belne nako ne rlaan noo ne ybán zhaa axtegue ne yberee noo, tsuudet de lyaaz neguin. Noze ne gutanal noo.

23 Por neguin wrëëts diiz lad yra xpén Ne ne guetet xpén Ne men guin. Per redet Ne ne guetet men, sinke le Ne re: “Belne nako ne rlaan noo ne ybán zhaa axtegue ne yberee noo, tsuudet de lyaaz neguin.”

24 Laake xpén Ne men guin nak ne rzëët yra neree no ne wkaa yra neree. No nan be ne nli ne rzëët men.

25 Ndalre ne wlaa Ne belne nako ne nkaa we tegue tegoo, pazer ni ngadet gyëzlyu nyuu yra liber ne nkaa we lo. Zengaw.