Xdiznzoon Jesucrist
ne Wkaa San Marcos
1
Wzëët Xwa xdiiz Dëdyuzh denbidx
(Mt. 3:1-12; Lc. 3:1‑9, 15‑17; Jn. 1:19-28)
1 Zeree wzelo wakzëët xdiznzoon Jesucrist XPee Dëdyuzh.
2 Wakzëëto zegne zëëd lo liber ne wkaa profet-Isaías ledne re:
Noo yxaal te mén ne saner lo de
chen ylaxnëz men xnëz de.
3 Te rëz rlen denbidx, re we:
“Gulaxnëz xnëz Men ne rnebééy, guxal te nëz ne tebli.”
4 Zenga wak chene wdxiid Xwa ne rtxobnis, wa Xwa denbidx, re Xwa lo mén ne yrobnis men no ysaan men xgyelmal men chen gun Dëdyuzh perdon xdol men. 5 No yrandxee mén ne nuu lo lyu ne la Judea no le men-Jerusalén rruu ra ron ne rzëët Xwa. Lex rxobdol men, rluzh nga rtxobnis Xwa men rugyow-Jordán.
6 Kon xgyits kamey nzhexkwaa xab Xwa, le sinturon ne ruu txu Xwa nak gyed, le ne ru Xwa nak miich no le dxin ne nuu den. 7 Rzëët Xwa xdiiz Dëdyuzh lo mén, re Xwa lo men:
―Te men ne gyed zëëd, axtegue ni xgyël men rzëëldet noo ychil noo nii men porke mazre rapdee men poder ke lo noo. 8 Noo noze kon nis wtxobnis noo de yra de, per le mén guin kon Espíritu Sant ytxobnis men de.
Ne wrobnis Jesus
(Mt. 3:13-17; Lc. 3:21-22)
9 Cheguin ke wruu Jesus gyëz-Nazaret ne nak lo lyu ne la Galilea, lex wtxobnis Xwa Ne rugyow-Jordán. 10 Zegne wruu Ne lo nis, wii Ne wyal gyeybaa no wii Ne zëdtseeb Espíritu Sant, wyab Espíritu Sant led Ne zegnak te mëër, 11 no wlen te rëz gyeybaa, re we:
―Laa de nak XPee noo ne ryaan noo; kesentyent rnesak de lextoo noo.
Wlaa Bzelo Jesus preb gan pe slaa Ne dol
(Mt. 4:1-11; Lc. 4:1-13)
12 Zhich guin wano Espíritu Sant Jesus denbidx. 13 Nga wkaa Jesus txuplal gbiz lad maa ne ndux; ne ka Ne nga wlaa Bzelo Ne preb gan pe slaa Ne dol. Zhich guin wdxiin tebëd angel wdee ne wu Ne.
Diiz ne wzëët Jesus lo mén Galilea
(Mt. 4:12-17; Lc. 4:14-15)
14 Chene che nuu Xwa chegyiib, wa Jesus lo lyu ne la Galilea wazëët Ne zegne rkyeen Dëdyuzh, 15 re Ne:
―Le or che wdxiin no che wyob gak ne rkyeen Dëdyuzh. Gusaan xgyelmal de; gulaleedx xdiznzoon Dëdyuzh.
Wbëz Jesus tap mén ne rkaa gozmël
(Mt. 4:18-22; Lc. 5:1-11)
16 Chene za Jesus tebrunis-Galilea, wii Ne zu Simon no le Ndrizh bech Simon, katxoon men xgyix men lo nis porke gozmël rkaa men yrup men. 17 Lex re Ne lo men:
―Gutanal noo; noo ylaa ne ylaa de mén xpén Dëdyuzh.
18 Orgueguin wsan men xgyix men, zanalgue men Ne.
19 Lex wzaa Ne stebla, wii Ne yrubech xpee Zebedew, Jacob no le Xwa, kalaxnëz men xgyix men lenbark. 20 Wbëzgue Ne men, orguin wsan men xuz men lenbark yra xuz men men ne kalano men dxiin, zanal men Ne.
Wneseyaken Jesus te men ne nuu menzab lextoo
(Lc. 4:31-37)
21 Wdxiin Jesus gyëz-Capernaum yra Ne men; lex dxe ne rne men-Israel, wdee Ne lenydoo, wzelo Ne wneluu Ne mén. 22 Axtegue wzee wzak mén por yra ne rneluu Ne, porke rneluu Ne zegnak te men ne rnebééy, rneluudet Ne zegne rneluu maxter ley. 23 Lenydoo guin zob te mgyeey ne nuu menzab lextoo. Wzelo menzab rderëz menzab, 24 re menzab:
―¿Penak rdee de lad noo Jesus men-Nazaret? ¿Pe zëëd de yluzh de noo? Rnebeey noo de no nan noo ne nakdet de mendol, XPee Dëdyuzh nak de.
25 Orguin wakndux Jesus lo menzab guin, re Ne:
―¡Gusoow ruu de! ¡Guruu lextoo ménree!
26 Orguin wlaa menzab ne wlen xgyiz mén guin ste, noze robtsadii menzab wruu menzab lextoo men. 27 Yrandxee mén wzee wzak, rnabdizlsaa men, re men:
―¡Pagoxlegree! ¿Pe ne kwebzheree rneluu ménree? ¡Gukwii gante, rap ménree poder rnebééy men axtegue lo menzab, no ron menzab xdiiz men!
28 No ydendxee lo lyu ne la Galilea gyiid gyiidske wrëëts diiz yra neguin ne rlaa Jesus.
Wneseyaken Jesus xnasweguer Simon-Bëd
(Mt. 8:14-15; Lc. 4:38-39)
29 Zegne wruu Jesus lenydoo, wa Ne yra Ne Jacob no le Xwa ruxyuu Simon yrup Simon Ndrizh. 30 Le xnasweguer Simon nex lo loon rlen men xlaa, lex re mén lo Jesus ne rzhuun wnaa guin. 31 Orguin wbig Jesus lo men, wnëëz Ne nya men wnesobli Ne men; orgueguin wruu xlaa led men. Lex wdee men ne wu Ne yra Ne xpén Ne.
Wneseyaken Jesus ndal mengyiz
(Mt. 8:16-17; Lc. 4:40-41)
32 Chene che waaz ngbiz or ne che zëdnit lyu, wano mén yrandxee mengyiz lo Jesus no le mén ne nuu menzab lextoo. 33 No yrandxee mengyëz guin wdxiin ruyuu guin. 34 Lex wneseyaken Jesus ndal mén ne rzak noze wren wren gyelgyiz, no wboo Ne menzab lextoo yra mén ne nuu menzab lextoo; per wdeedet Ne si nnii menzab guin porke nan Ne ne che nan menzab guin gan txu nak Ne.
Le Jesus rzëët xdiiz Dëdyuzh lo men-Galilea
(Lc. 4:42-44)
35 Te rsil benakre nkeb waxee Jesus, wruu Ne lenlgyëz guin wa Ne te ledne yëtet mén chen ynab Ne lo Dëdyuzh. 36 Lex waye Simon Ne yra Simon xkompanyer Simon. 37 Chene wzël Ne lo men, re men lo Ne:
―Le yrandxee mén ka kaye de.
38 Per wke Ne re Ne:
―Yoo tsa be yra ledne nak guex nee chen yzëët noo xdiiz Dëdyuzh no nga, porke por neguin zëëd noo.
39 Zenga wkaa Jesus ydendxee lo lyu ne la Galilea wzëët Ne xdiiz Dëdyuzh lenydoo te te gyëz, no wboo Ne menzab lextoo yra mén ne nuu menzab lextoo.
Wneseyaken Jesus te men ne rzak gyiz ne la lepra
(Mt. 8:1-4; Lc. 5:12-16)
40 Wbig te men ne rzak gyiz ne la lepra, wzuzhib men lo Jesus, wnab men lo Ne, re men:
―Belnaal yna de zun de gan yneseyaken de noo.
41 Orguin wles lextoo Jesus men, wzegaa Ne nya Ne wtee No led men, re Ne:
―Sna noo. Gugyaken.
42 Orgueguin wyaken led mén guin, axtegue nya wyan led men. 43 Orguin wguli Jesus men nëz sya men, per re Ne lo men:
44 ―Che nan de rut lo guedet do, nonchee lo fxuz gutsa gutsaluu led de no gutsaron xgoon de ne che wakndaa de nes lo Dëdyuzh zegne zëëd lo ley ne wdee Dëdyuzh lo Moises chen gaknan mén ne che wyaken led de.
45 Per zegne wruu mén guin nga, wzelogue men wuu men diiz lo mén neguin ne wak. Por neguin nak ne nuudetre nkanyoo Jesus ni ste gyëz, sinke teblose fwer lenlgyëz wkaa Ne ledne yëtet mén. Per mase zenga, gyëzree gyëzrotee rruu mén rdxiin mén lo Ne.