1 Wluzh wak yra neree, wii noo ste angel, wruu ne gyeybaa zëdtseeb ne. Kesentyent rap ne poder; ydendxee gyëzlyu wyenii kon xebtsa ne. 2 Kesentyent fwert wnii ne, re ne:

―Che wluzh gyëzroo, che wluzh gyëzroo ne la Babilonia; le we che nak ledne nuu menzab no ledne nuu yralondxee espíritu mal, le we che nak xeftxëës mamal ne rzhobee no ne nzaz. 3 Porke yrandxee mengyëzlyu wak zegnak men ne rzudxen, wlaa men ne rlaan led men yra men mengyëz guin, no le yra rrey ne nuu gyëzlyu wlaa ne rlaan led yra men mengyëz guin; yrandxee mén ne nuu gyëzlyu ne rkaa gwtoo wakrik por tant wdee mengyëz guin lo beey wzii men.

4 Zhich guin won noo wlen ste rëz gyeybaa, re we:

―Guruu gyëz gwa yra de ne nak de xpén noo, chen ylaadet de dol yra de men ne nuu wa no chen sakzidet de zegne sakzi men; 5 porke che kesentyent wakndal xdol men, axtegue gyeybaa wdxiino, no kanzaleedx Dëdyuzh yrandxee ne mal ne wlaa men. 6 Gulaa men zegne wlaa ke men ste mén; txup tir gugyizh yka men por te te ne wlaa men; guzakzi men txup lal ne wzakzi men ste mén. 7 Gulaa ne kesentyent sakzi men no ne baanske ylaa men zegne wugya ke lextoo men no zegne wlaa ke men logne wlaantee men, porke re men lenlextoo men: “Noo zob nee zegnak men ne rnebééy; nakdet noo byud no nunk kwiidet noo gyelenles.” 8 Por neguin tese dxe sakzi men lo yrandxee neree: lo gyelgut, lo gyelenles, lo gbiin, no tseeky men lo gyi; porke kesentyent rap Dëdyuzh poder ne ylaa Ne men zenga.

9 Yrandxee rrey ne nuu ydendxee gyëzlyu ne wdee si wsegyee mengyëz guin lextoo ne wlaa rrey ne bat rkyiindet no ne wlaa rrey logne wlaantee rrey, goon rrey guin no baanske ylaa men chene kwii men ylen guux ne kayeeky gyëz guin. 10 Axtegue nat su men por tant gyelerdxeeb ne kazakzi gyëz guin, lex gue men:

―¡Prob de, prob de gyëz-Babilonia, gyëzroo ne kesentyent wap poder! Porke tebrrategue wluzh de.

11 Yrandxee mengyëzlyu ne rkaa gwtoo, goon men no baanske ylaa men por gyëz guin, porke gakyëtetre mén ne yka ne rtoo men. 12 Rtoo men: ne or, ne plat, gyezhaandxee, perla, lërlino ne fin, lërsed, lërmorad, lërnloo, no le yralondxee yag ne nzoon rree, no le ne nzhexkwaa kon leey tegzhol, no le ne nzhexkwaa kon yagzhaandxee, no le ne nzhexkwaa kon brons, no le ne nzhexkwaa kon gyiib, no le ne nzhexkwaa kon mármol, 13 no le kanel, no le yralondxee ne nzoon rree, no le ne nak zegnak yaal, no le mirra, no le perfum, no le bin, no le seyt, no le rin ne kesentyent nyu, no le zhobxtil, no le maa ne reey yúú, no le mëkzhiil, no le kabay, no le karret no axtegue mén. 14 No gue yra mén guin ne rkaa gwtoo:

―¡Che yëtenre de yra ne kesentyent rtseleedx de; wluzh yrandxee xgyelrik de no le yrandxee ne zhaandxee ne wap de! Nunk gapdetre do.

15 Yrandxee mén ne rkaa rtoo yra neguin no ne wakrik por gyëz guin, su men axtegue nat por tant gyelerdxeeb ne kwii men pezee rak mengyëz guin sufrir, baanske ylaa men, goon men, 16 gue men:

―¡Prob gyëzroo gwa! ¡Prob gyëzroo gwa! Wa wuu mén ne wak lërlino ne fin, lërmorad, no le lërnloo, no le ne nzhexkwayaa kon ne or no le kon perla no le gyezhaandxee. 17 ¡Per tebrrategue wluzh yrandxee xgyelrik gyëz gwa!

Yrandxee men ne rnexoon bark no le yrandxee men ne za lenbark no le yra men ne rlaa dxiin lenbark no le yra men ne rlaa dxiin lo nisdoo, wzu men axtegue nat, 18 chene wii men wlen guux ne kayeeky gyëz guin, kesentyent fwert re men:

―¿Pe nuuleg ste gyëzroo ne rzaglo gyëzroo gwa?

19 Lex wdxiib men yudi xtoo men, baanske rlaa men, roon robtsaatee men, re men:

―¡Prob gyëzroo gwa! ¡Prob gyëzroo gwa! Kon xgyelriko wakrik yrandxee mén ne rap bark, ¡per tebrrategue wluzho!

20 Yrandxee de ne nuu de gyeybaa, guzhiilen por yra ne wzak gyëz gwa, no guzhiilen laa de ne nak de xpén Dëdyuzh no le laa de ne nak de poxter no le laa de ne nak de profet; porke gyelextis wlaa Dëdyuzh lo mengyëz gwa por yra ne wlaa men de.

21 Zhich guin wlis te angel ne kesentyent ndíp te gyeroo ne nak zegnak xgye molin, wtxoon no lo nisdoo, re ne:

―Babilonia gyëzroo, zeree ke nitlo de no nunk kwiidetre mén de. 22 Nunk gondetre mén gool musk ruxnëz de, musk ne rool arpa, musk ne rool flawt, musk ne rool trompet, ni tsuudetre ni te mén ne rlaa dxiin wa, ni xgye molin yzheedxdetre wa. 23 No nunkre ykaadetre bnii wa, ni dooy tsuudetre wa; porke yra xpén de ne wkaa gwtoo wa, laa men nak ne mazre waknondee ydendxee gyëzlyu porke wkade de mén ne nuu ydendxee gyëzlyu kon xgyelebruj de.

24 Laa gyëz gwa nak ne rap dol ne wket mén yra profet no le yra xpén Dëdyuzh no le yrandxee mén ne wet ydendxee gyëzlyu.