3
Libán runëʼ Juan, bönniʼ ruquilëʼ bönachi nisa
(Mt. 3:1-12; Mr. 1:1-8; Jn. 1:19-28)
1 Cateʼ chiguca chinu iz rinná béʼenëʼ Tiberio César idútë yödzölió, rinná bëʼë Poncio Pilato luyú Judea, ateʼ Herodes rinná bëʼë caʼ luyú Galilea. Felipe, bö́chëʼë Herodes naʼ, rinná bëʼë luyú Iturea, en luyú Traconite, ateʼ Lisanias rinná bëʼë luyú Abilinia. 2 Yuguʼ dza naʼ nácagaquiëʼ bixúz lo Anás, en Caifás, ateʼ laʼ náʼasö Dios bë́ʼlenëʼ Juan, zxíʼinëʼ Zacarías, didzaʼ cateʼ niʼ zoëʼ Juan lu lataj cáʼasö. 3 Ridë́ʼ Juan ni yúguʼtë lataj nacuáʼ raʼ yegu Jordán, runëʼ libán ca ral-laʼ ilaʼdila nisa nupa tuʼbíʼi ládxiʼgaca para uniti lahuëʼ Dios dul-laʼ nabágaʼgaca. 4 Guca caní ca naʼ nazúaj lu guichi láʼayi yuguʼ didzaʼ bëʼë Isaías, bönniʼ bëʼë didzaʼ uláz queëʼ Dios, rnna:
Riyö́n chiʼë bönniʼ rulidzëʼ lu lataj cáʼasö, rnnëʼ:
“Buliʼpáʼa nöza lu icja ládxidoʼoliʼ para idxín Xanruʼ queë́liʼ.
Buliʼbéaj li yuguʼ nöza lasi ga tödëʼ.
5 Ral-laʼ ulígaca yúguʼtë gapa naca rögaʼ,
en uluʼhuöáca lachiʼ yúguʼtë guíʼa sibi, en guíʼadoʼ.
Ral-laʼ uluʼrúaj li nöza nayecja nabíʼigaca,
ateʼ uluʼhuöáca dxiʼa nöza guiö́j.
6 Ilaʼléʼeni yúguʼtë bönachi Bönniʼ naʼ isö́l-lëʼë Dios,
Nu usölá bönachi.”
7 Cateʼ bilaʼrúaj bönachi zián para ilaʼdila nisa lu nëʼë Juan, lëʼ gudxëʼ légaquiëʼ:
—Libiʼiliʼ, diʼa dza quégacabaʼ bëla síniaʼ. ¿Zoa nu buluíʼi libíʼiliʼ ral-laʼ izxúnnajliʼ yöl-laʼ rusiúdxi siʼ gaca quégaca bönachi? 8 Naʼa, guliʼgún le ilaca bëʼ chibubíʼi ládxiʼliʼ, en bitiʼ saʼ ládxiʼliʼ, bitiʼ innaliʼ: “Nácatuʼ tsahuiʼ tuʼ nácatuʼ diʼa dza queëʼ Abraham”, tuʼ reaʼ libíʼiliʼ, huáca quélëʼë Dios yuguʼ guiö́j ni, en gunëʼ ga uluʼhuöáca diʼa dza queëʼ Abraham. 9 Nácaliʼ ca yuguʼ yaga. Chizóa riböza guíë huága para ichugu yuguʼ yaga. Yúguʼtë yaga bitiʼ taʼbía le naca dxiʼa, ilaʼchúguiëʼ yaga naʼ, en ilaʼguʼë léguequi lu guíʼ.
10 Níʼirö bönachi nacuáʼ niʼ gulaʼnabi lëʼ, taʼnná:
—¿Nacxi gúntsatuʼ?
11 Bubiʼë didzaʼ Juan, rëʼ légaquiëʼ:
—Nu dë chopa cöʼ zxe ral-laʼ unödzaj que nu bitiʼ dë que, ateʼ nu dë le gagu, lëscaʼ caní ral-laʼ quisi quégaca nupa bitiʼ dë le ilágugaca.
12 Bal-lëʼ bönniʼ tuʼquizxjëʼ lázagaca bönachi uláz que yödzö ziʼtuʼ bilaʼdxinëʼ caʼ niʼ para ilaʼdilëʼ nisa, ateʼ gulaʼnábinëʼ lëʼ, taʼnnë́ʼ:
—Bönniʼ usëdi, ¿nacxi gúntsatuʼ netuʼ?
13 Juan gudxëʼ légaquiëʼ:
—Bitiʼ uquízxjaröliʼ tsca le chigunnë́ʼ bönniʼ yúʼuliʼ lu nëʼë.
14 Bal-lëʼ bönniʼ röjáquiëʼ gudil-la gulaʼnábinëʼ caʼ lëʼ, taʼnnë́ʼ:
—¿Nazxi netuʼ, nacxi guntuʼ?
Juan gudxëʼ légaquiëʼ:
—Bítiʼrö gun gádxiliʼ bönachi para cúaliʼ le dë quéguequi. Bítiʼrö innëliʼ quégaca bönachi le cabí nácatë para gunliʼ ga ilaʼguizxaj libíʼiliʼ, pero guliʼtsaza ládxiʼliʼ tsca rázxjaliʼ.
15 Taʼzáʼ ládxiʼgaca bönachi naʼ taʼböza Bönniʼ naʼ ral-laʼ isö́l-lëʼë Dios, channö náquiëʼ Juan naʼ Bönniʼ lëʼ Cristo. 16 Bubiʼë didzaʼ Juan, gudxëʼ yúguʼtëʼ, rnnëʼ:
—Le nácatë nedaʼ ruquilaʼ libíʼiliʼ nisa, pero zëʼë Bönniʼ gunëʼ le ruluíʼisö yöl-laʼ ridila nisa ni, ichíziëʼ libíʼiliʼ Dios Böʼ Láʼayi, en le naca guíʼ queëʼ. Bönniʼ ni náparëʼ yöl-laʼ unná bëʼ ca nedaʼ, ateʼ nedaʼ bitiʼ nacaʼ lesacaʼ ilecjaʼ le nudë́ʼë niʼe. 17 Zönëʼ lu nëʼë böcö́ʼ queëʼ, ateʼ ulubëʼ ga rilubi zxoaʼ xtila queëʼ, lë ni ruluíʼi le gaca quégaca bönachi. Utubëʼ zxoaʼ xtila, en cuʼë le xilataj, pero bëbu que uzéguiʼë lu guíʼ le catu caz ulu.
18 Ca nácagaca didzaʼ ni, en iaʼzícaʼrö zián didzaʼ le guchíziëʼ icja nágagaca bönachi, benëʼ libán Juan lógaquiëʼ que didzaʼ dxiʼa. 19 Juan naʼ buzéguiʼë didzaʼ Herodes, bönniʼ rinná bëʼë, tuʼ zóalenëʼ-nu Herodías, nigula queëʼ Felipe, bönniʼ bö́chëʼë, encaʼ tuʼ runëʼ zián le ruáʼ döʼ. 20 Níʼirö benëʼ Herodes tu le nácarö huiáʼ döʼ, guluʼë Juan naʼ lidxi guíë.
Ridíleʼ Jesús nisa
(Mt. 3:13-17; Mr. 1:9-11)
21 Dza naʼ cateʼ cabí nadzunëʼ Juan lidxi guíë, cateʼ niʼ ruquilëʼ bönachi nisa, bidilëʼ caʼ Jesús nisa. Cateʼ niʼ rulidzëʼ Dios, guyalaj lúzxiba, 22 ateʼ bötjëʼ Dios Böʼ Láʼayi, bidxinëʼ ga naʼ zoëʼ Jesús. Buluíʼi lahuëʼ, rinë́ʼë ca rináʼ tubaʼ guʼdödoʼ, ateʼ biyö́n chiʼi Nu ruíʼi didzaʼ yehuaʼ yubá, rnna:
—Liʼ nacuʼ Zxíʼinaʼ. Nadxíʼidaʼ Liʼ, en raza ládxaʼa Liʼ.
Yuguʼ xuz xinëʼe gudödi queëʼ Jesús
(Mt. 1:1-17)
23 Cateʼ gusí lahuëʼ runëʼ xichinëʼ Jesús, yuʼë ca chi uruáʼ iz. Téquiguequi bönachi náquiëʼ zxíʼinëʼ José. Jesús náquiëʼ zxíʼini xiʼsóëʼ Elí,
nu naʼ náquiëʼ xúzinu María, nigula queëʼ José naʼ.
24 Elí naʼ gúquiëʼ zxíʼinëʼ Matat,
nu ni guca zxíʼinëʼ Leví,
nu ni guca zxíʼinëʼ Melqui,
nu ni guca zxíʼinëʼ Jana,
nu ni guca zxíʼinëʼ iaʼtúëʼ José.
25 José ni gúquiëʼ zxíʼinëʼ Matatías,
nu ni guca zxíʼinëʼ Amós,
nu ni guca zxíʼinëʼ Nahum,
nu ni guca zxíʼinëʼ Esli,
nu ni guca zxíʼinëʼ Nagai.
26 Nagai naʼ gúquiëʼ zxíʼinëʼ Mat,
nu ni guca zxíʼinëʼ iaʼtúëʼ Matatías,
nu ni guca zxíʼinëʼ Semei,
nu ni guca zxíʼinëʼ iaʼtúëʼ José,
nu ni guca zxíʼinëʼ Judá.
27 Judá naʼ gúquiëʼ zxíʼinëʼ Joana,
nu ni guca zxíʼinëʼ Resa,
nu ni guca zxíʼinëʼ Zorobabel,
nu ni guca zxíʼinëʼ Salatiel,
nu ni guca zxíʼinëʼ Neri.
28 Neri naʼ gúquiëʼ zxíʼinëʼ iaʼtúëʼ Melqui,
nu ni guca zxíʼinëʼ Adi,
nu ni guca zxíʼinëʼ Cosam,
nu ni guca zxíʼinëʼ Elmodam,
nu ni guca zxíʼinëʼ Er.
29 Er naʼ gúquiëʼ zxíʼinëʼ Josué,
nu ni guca zxíʼinëʼ Eliezer,
nu ni guca zxíʼinëʼ Jorim,
nu ni guca zxíʼinëʼ iaʼtúëʼ Matat.
30 Matat naʼ gúquiëʼ zxíʼinëʼ Leví,
nu ni guca zxíʼinëʼ Simeón,
nu ni guca zxíʼinëʼ Judá,
nu ni guca zxíʼinëʼ iaʼtúëʼ José,
nu ni guca zxíʼinëʼ Jonán,
nu ni guca zxíʼinëʼ Eliaquim.
31 Eliaquim naʼ gúquiëʼ zxíʼinëʼ Melea,
nu ni guca zxíʼinëʼ Mainán,
nu ni guca zxíʼinëʼ Matata,
nu ni guca zxíʼinëʼ Natán.
32 Natán naʼ gúquiëʼ zxíʼinëʼ David,
nu ni guca zxíʼinëʼ Isaí,
nu ni guca zxíʼinëʼ Obed,
nu ni guca zxíʼinëʼ Booz,
nu ni guca zxíʼinëʼ Salmón,
nu ni guca zxíʼinëʼ Naasón.
33 Naasón naʼ gúquiëʼ zxíʼinëʼ Aminadab,
nu ni guca zxíʼinëʼ Aram,
nu ni guca zxíʼinëʼ Esrom,
nu ni guca zxíʼinëʼ Fares,
nu ni guca zxíʼinëʼ iaʼtúëʼ Judá.
34 Judá naʼ gúquiëʼ zxíʼinëʼ Jacob,
nu ni guca zxíʼinëʼ Isaac,
nu ni guca zxíʼinëʼ Abraham,
nu ni guca zxíʼinëʼ Taré,
nu ni guca zxíʼinëʼ Nacor.
35 Nacor naʼ gúquiëʼ zxíʼinëʼ Serug,
nu ni guca zxíʼinëʼ Ragau,
nu ni guca zxíʼinëʼ Peleg,
nu ni guca zxíʼinëʼ Heber,
nu ni guca zxíʼinëʼ Sala.
36 Sala naʼ gúquiëʼ zxíʼinëʼ Cainán,
nu ni guca zxíʼinëʼ Arfaxad,
nu ni guca zxíʼinëʼ Sem,
nu ni guca zxíʼinëʼ Noé,
nu ni guca zxíʼinëʼ Lamec.
37 Lamec naʼ gúquiëʼ zxíʼinëʼ Matusalén,
nu ni guca zxíʼinëʼ Enoc,
nu ni guca zxíʼinëʼ Jared,
nu ni guca zxíʼinëʼ Mahalalel,
nu ni guca zxíʼinëʼ iaʼtúëʼ Cainán.
38 Cainán naʼ gúquiëʼ zxíʼinëʼ Enós,
nu ni guca zxíʼinëʼ Set,
nu ni guca zxíʼinëʼ Adán,
nu ni guca ca zxíʼini cazëʼ Dios.