1 Dios, nacuáʼ bönachi izáʼa lu xiyúgaca bönachi quiuʼ.

Nucáʼanagaca cáʼasö yudoʼ láʼayi quiuʼ,

en nusunítigaca yödzö Jerusalén.

2 Buluʼcáʼanëʼ bönachi quiuʼ nátigaca luyú para ilágubaʼ bíchulab léguequi,

en bëlaʼ rön quégaca huen xichinuʼ ga ilágubaʼ böaʼ guixiʼ le.

3 Buluʼlaljëʼ xichö́ngaca bönachi quiuʼ ca nisa idútë lu yödzö Jerusalén,

ateʼ cuntu nu bugáʼana nu ucacheʼ léguequi.

4 Bönachi yuguʼ dzaga luyú queë́tuʼ tuʼtitaj netuʼ.

Tuʼzxidxëʼ, en tuʼdidzaʼ yudxi netuʼ.

5 ¿Naruʼ tsaz ilenuʼ netuʼ, Xan?

¿Naruʼ sóaticaʼsö yöl-laʼ rilé quiuʼ ca tu guíʼ ruzegui netuʼ?

6 Gulégaca bönachi yuguʼ yödzö ziʼtuʼ bitiʼ tun Liʼ bal,

encaʼ bönachi bitiʼ tuʼlidza Liʼ.

7 Bë́tigaca bönachi quiuʼ nácagaca zxíʼini xiʼsóëʼ Jacob,

en nusunítigaca xiyutuʼ ga zoa cazuʼ Liʼ.

8 Bitiʼ gunuʼ netuʼ xiguiaʼ tuʼ nözi dul-laʼ gulunëʼ xuz xtóʼotuʼ.

Buéchiʼ ladxiʼ netuʼ naʼa, tuʼ rudú ládxiʼtuʼ.

9 Gúcalen netuʼ, Dios, Nu rusölá netuʼ, para guntuʼ bal Loʼ.

Busölá netuʼ, en buniti lo netuʼ ca naca dul-laʼ nabágaʼtuʼ para idxíʼituʼ Loʼ.

10 ¿Bizx que taʼnabi bönachi yuguʼ yödzö izáʼa netuʼ,

taʼnná: “Gázxitë zoa Dios queë́liʼ”?

Bëʼ lataj iléʼetuʼ, en ben ga gaca bëʼ lógaca yúguʼtë bönachi

rizíʼ loʼ nupa tuʼlalaj xichö́ngaca huen xichinuʼ.

11 Buzë́ naguʼ ca taʼnnë́ ládxiʼgaca nupa nadzúngaca.

Len yöl-laʼ huáca zxön quiuʼ busölá nupa naʼ narugu quéguequi ilátigaca,

12 en bubíʼi quégaca bönachi yuguʼ dzaga yödzö queë́tuʼ

iaʼgadxi cöʼlö caʼ tsca naca didzaʼ ziʼ gulaʼnnë́ quiuʼ Liʼ, Xan.

13 Netuʼ, bönachi quiuʼ, encaʼ böʼcuʼ zxilaʼ ruyú cazuʼ Liʼ,

guíëticaʼstuʼ Liʼ: “Xclenuʼ”,

en cúʼuticaʼstuʼ Liʼ yöl-laʼ ba naʼa dza, en dza siʼ zaca.