1 Dxel gunabee Pilato gudijn ree suldad Jesús. 2 Abiꞌ beenchaaw reeman coron guiëjch, badxeꞌ reeman laan guijcaman, bascajcw reeman laaman tijb lajd xniayaꞌs. 3 Dxel gubig reeman lojman, rëbgaj reeman:

―¡Guibanri xrey ree bén Israel!

Dxel rëëzgaj reeman lojman.

4 Brii Pilato stijb, abiꞌ rëbaman loj ree bén Israel guin:

―Gol baguiaa, gabën laax din gagbeedi, achet xguialquiax radxejlan.

5 Dxel brii Jesús, yuꞌ coron guiëjch guin guijcaman, najcw tëëman lajd xnia guin. Abiꞌ rëb Pilato:

―Laax guie.

6 Dxel bixhioz rniabee ree në ree bén rajp roꞌ yadooroꞌ Jerusalén, chi baguiaa reeman laaman, guzuloj rbixdiaj reeman, rëb reeman:

―¡Bacaax loj crüjz! ¡Bacaax loj crüjz!

Rëb Pilato loj reeman:

―Gol chinëx, lëjt gol bacaax loj crüjz, achet xtolix radxejlan.

7 Badxiꞌ reeman laan rëb reeman:

―Laa tijb dux leyan yuꞌ, rëb lojn rayal guiëtix, guial nax najx Xiꞌn Dios.

8 Chi biguienman ni rëb reeman, mazri bidxebaman. 9 Bayuman lën palas guin zatijb, gunabdiidxaman loj Jesús rëbaman:

―¿Ban xin lüj?

Per ad badxiꞌt Jesús laan. 10 Zeel rëb Pilato:

―¿Nid zadxiꞌl ni rnin ya? ¿Nid ragbeel ya caꞌn guialrniabee din gucan lüj loj crüjz o guslaan lüj ya?

11 Dxel rëb Jesús:

―Achetczi guialrniabee nitiaꞌl bal id Dios nunee laan. Zianan zeel mazri zien xtol bén bidnë naj guie yuꞌ guial lojl.

12 Diizd hor zii gajc raguiil Pilato mod, xhienaag guslaaman Jesús, per rbidxaꞌ ree bén rigaꞌ yagaj, rëb reeman:

―¡Bal guslaal laax, ad najtil xmiw bén na̱j César! ¡Din chutëëz bén rajc rey rzuj contr César!

13 Chi biguien Pilato rëb reeman zian, gunabeeman babëë reeman Jesús, dxel gurej lod rniabeeman, lod la Gabata con diidx hebreo, rën guiëban Lod yuꞌ ree guiaj. 14 Chi guixiez gal lanij pascw, cost garol dxej rëb Pilato loj ree bén Israel:

―¡Laa xreydi guie!

15 Per rbidxaꞌ reeman rëb reeman:

―¡Guiëtix! ¡Guiëtix! ¡Bacaax loj crüjz!

Gunabdiidx Pilato loj reeman, rëbaman:

―¿Wen gucan xreydi loj crüjz ya?

Badxiꞌ ree bixhioz rniabee laan, rëb reeman:

―Achut dux reyan yuꞌ, tijbzi César.

16 Dxel bayü Pilato Jesús loj ree suldad din gucaa reex laaman loj crüjz, dxel zinë reex laaman.

17 Briinë reex Jesús, nüüman crüjz, binë reex laaman lod la Calaver, diidx hebreo lan Gólgota. 18 Ni bacaa reex laaman loj crüjz con zatioꞌp ree bejn, tijb gaj reeman ca cwëꞌman. 19 Gunabee Pilato cwa lejtr guijc crüjz guin, rëban: “Jesús bén Nazaret, xrey ree bén Israel.” 20 Dád zien ree bén Israel biil lejtr guin, guial na̱j luar zii gajxh loj ciuda, guiáad lejtr guin can con diidx hebreo, diidx latin në diidx grieg. 21 Rëb ree bixhioz rniabee ree bixhioz loj Pilato:

―Ad rucaal: “Xrey ree bén Israel”, bacaa: “Bén rëb na̱j xrey ree bén Israel.”

22 Badxiꞌ Pilato laan rëbaman:

―Ni ma bacan yayaꞌnan zian.

23 Chi gulox bacaa ree suldad guin Jesús loj crüjz, bacaꞌ reex xabaman, gudixyaꞌ reexan tajp laꞌ, dxel cwaꞌ reex tib laꞌ gajn. Në stijb xabaman cwaꞌ reex, ad nadiibtan, najcchaaw diizd yëjnan xt guiaꞌn, najn tijbzi lajd. 24 Zeel rëb loj lasaꞌ reex:

―Ad zarooxt reen, yadxiꞌt ree suert din guidoon chu yayal laan.

Zian gojc cumplid ni ca loj xtiidx Dios, rëban: “Balaꞌ reeman da xaban, gudxijt tëë reeman suert guijcan.” Zeel been ree xinsuldad guin zian.

25 Gajxh cwëꞌ crüjz ca Jesús zaꞌ xniaaman con xbël xniaaman con Li xbéngunaa Cleofas con Li bén gunee reeman Magdalena. 26 Chi baguiaa Jesús xniaaman, zaꞌ tijb ree xbejnman cwëꞌman, bén rën daꞌtaman, rëb loj xniaaman:

―Na, laa xiꞌnl yagaj.

27 Dxel rëb loj xbejnman:

―Laa xniaal yagaj.

Diizd dxej zii bignëman xniaa Jesús lidxaman.

28 Chi gulox rëb Jesús zian, gogbeeman ma gojc gran cumplid. Per din gac cumplid ni ca loj xtiidx Dios, rëbaman:

―Reꞌcan nijs.

29 Yagaj zaꞌ tijb re yuꞌn vin noꞌchan vinagr, zeel bagajdx reex tijb xiil loj vin guin, bacaa reexan loj tijb yag, dxel badxig reexan roꞌman. 30 Chi ma guꞌman laan, dxel rëbaman:

―Ma gojc gran cumplid.

Dxel basajb lojman luyuj, güjtaman.

31 Ma cayüjn ree bén Israel porvinid din guixiez gal lanij pascw. Zeel ad guyënt reeman nayaꞌn ree cuerp guin loj crüjz dxej raziiladx reeman, din dád rajp reeman dxej guin respejt. Zeel biguiedx reeman loj Pilato din nabeeman quiꞌch ree suldad guin xdxijt ree bén ca loj crüjz din guiët reeman yalet tëë reex laa reeman. 32 Zeel wej reex. Yaloj gudiꞌch reex xdxijt bén ca cwëꞌ Jesús, dxel gudiꞌch reex xdxijt bén ca stiblad cwëꞌman. 33 Chi gubig reex lod ca Jesús, baguiaa reex ma güjtaman, zeel ad gudiꞌcht reex xdxijtaman.

34 Per tijb suldad guin guxhal ladaman con guiib caꞌx, dxel briin rejn con nijs. 35 Bén rü diidx guie baguiaaman, zeel ragbeeman najn diidxli, rüman laan din në lëjt chililadx. 36 Gra nine gojc din gac cumplid ni ca loj xtiidx Dios, rëban: “Ad rayalt gach xdxijt xiildoo.” 37 Stiblajt rëb: “Guguiaa reeman bén guxhalnë reeman guiib lad.”

38 Chi gulox gojc zian, wej Xiëb, bén zëëd guiedx la Arimatea, bignabaman diidxbee loj Pilato din yaletaman xcuerp Jesús din chiquieꞌchaman laaman. Në bén la Xiëb bililadx Jesús, per ralanzi, guial bidxebaman bejn ree. Badëëd Pilato diidxbee, zeel wej Xiëb bigxiiman xcuerp Jesús. 39 Në Nicodemo wej, bén bigneenë Jesús tijb guxhin, bidxinnëman cost gajlbichii quil ni la mirra, noꞌchan aloe, rureen nejxh. 40 Bagajdxnë reeman laan lajd batüüb reeman laaman, ziꞌc rüjn ree bén Israel chi ruquieꞌch reeman bengüt. 41 Lod cwa Jesús loj crüjz nagaꞌ tijb guidxliuj lod yuꞌ ree yag. Yagaj na̱j tijb baa cüb lod achutczi waguieꞌch. 42 Yagaj gudixh reeman xcuerpaman, guial najn gajxh, guial ma suloj tëë dxej raziiladx reeman.