7
Benne' biche Jesús quebe dxeléajle̱'e̱ chee̱'
Gudé na' gudé Jesús naga nababa Galilea. Quebe guca lazre̱' tee̱' naga nababa Judea lawe' da dxelaca lazre' judío blau zaj zre̱'e̱ na' xelútie̱' Le̱'. Ba za laní gate judío ca' dxelezúe̱' lu xu'u laga' ca'. Chee̱ le̱ na' bi biche Jesús gulé̱'e̱ Le̱':
―Quebe xegá'anu' nigáze. Bexíaj Judea, chee̱ cá'anqueze benne' ca' dxeléajle̱ chiu' zaj zre̱'e̱ na' gaca xelelé'ene̱' ca da dxunu'. Che nu benne' dxaca lazre̱' xelúnbe'e bénneache le̱', quebe dxune̱' da ca' bagácheze. Lawe' da dxunu' Lue' da caní, be̱n na lau xúgute̱ bénneache.
Caní gulenné̱' lawe' da quebe dxeléajle̱ benne' biche̱' ca' chee̱ Jesús. Nadxa Jesús guzre̱' benne' ca':
―Quebe ne zrin zra cha'a na'. Chee̱le le'e bítete̱ze zra waca chéajle. Benne' ca' zaj naca chee̱ xe̱zr la xu nigá quebe gaca xelecuídene̱' le'e. Dxelecuídene̱' neda' lawe' da dxulé'eda' neda' naca da cale̱la da dxelún benne' ca'. Le chjaca le'e laní na'. Quebe sa'a neda' na'a lawe' da quebe ne zrin zra cha'a.
Ca gudé guzre Jesús benne' ca' da nigá, na' begá'ane̱' naga nababa Galilea na'.
Jesús dxezrine̱' laní gate judío ca' dxelezúe̱' xu'u laga' ca'
10 Ca gudé besiá'aca benne' biche Jesús, na' cá'anqueze Le̱' guxíaje̱' laní na'. Bagácheze guxíaje̱' chee̱ quebe nu le'e Le̱'. 11 Benne' xíchaje̱ chee̱ judío ca' belexílaje̱' Jesús lu laní na'. Dxelenné̱':
―¿Gazra zua bénnea'?
12 Ládujla benne' zan ca', benne' zan buluchálaje̱' ca naca chee̱ Jesús. Bal-le̱' gulenné̱': “Naque̱' benne' xrlátaje.” Xebal-le̱' gulenné̱': “Quebe naque̱' xrlátaje lawe' da dxezí xe̱'e̱ bénneache.”
13 Quebe nu benne' bchálaje̱' caníqueze ca naca chee̱' lawe' da dxelezrebe̱' da xelún benne' xíchaje̱ ca' chee̱ judío ca'.
14 Ba zeaj gachaj laní na' gate guxú'u Jesús lu chale'aj xudau', na' guzú lawe̱' dxusé̱dene̱' benne' zaj zre̱'e̱ na'. 15 Belexebane benne' judío ca', dxelenné̱':
―¿Ájazra na' benne' nigá da zante̱ nézene̱', ne quebe bsé̱die̱' chee̱ xudau'?
16 Beche̱be Jesús:
―Da dxusé̱deda' neda' le'e quebe naca na cheé̱zqueza'. Naca na chee̱ Xra' nasel-le̱' neda'. 17 Che nu benne' dxaca lazre̱' gune̱' ca da dxaca lazre' Dios, na' wanézene̱' che da dxusé̱deda' naca na chee̱ Dios, u che dxennéa' ca da naca cheé̱zqueza'. 18 Benne' dxuchálaje̱' da naca cheé̱zqueze̱' dxune̱' na chee̱ xelapa bénneache le̱' ba lá'ana. Bénnea' dxue lazre̱' xelapa bénneache ba lá'ana bénnea' gusel-le̱' le̱', benne' nigá dxenné̱' da li, ne quebe bi dxenné̱' da naca na da we̱n lazre'.
19 ’Moisésqueze be̱nne̱' le'e da nadxixruj bea na, na' netule le'e quebe dxuzúale dizra' chee̱ da nadxixruj bea na na'. ¿Bizr chee̱ na' dxaca lázrele gútele neda'?
20 Belexeche̱be benne' zan ca':
―Xu'u lue' be' xriwe̱'. ¿Núzraqueze dxaca lazre' gutie̱' lue'?
21 Jesús guzre̱' benne' ca':
―Tu xel-la' waca be̱na' lu zra dxupá'anale, na' xúgute̱le le'e dxebánele. 22 Moisés be̱nne̱' da zéajle̱le, dxechúgule late' weaj be̱la' chee̱ be̱l-la' dxen chee̱ zrí'inele bi biudu ca' chee̱ xelexegá'anabe' xrlátaje lau Dios. Da nigá da dxunle quebe guzú lau na gate na' zua Moisés. Guzú lau na gate zaj zra' xra xrtau Moisés cá'ante̱. Chee̱ le̱ na' le'e dxechúgule late' be̱la' chee̱ be̱l-la' dxen chee̱ tu bi biúdau' chee̱ xegá'anabe' xrlátaje lau Dios lácala naca zra dxupá'anale. 23 Che caní dxunle lu zra dxupá'anale chee̱ quebe gusanle ca naca da bdxixruj be'e Moisés, ¿bizr chee̱ na' dxezrá'ale neda' lawe' da bexuna' dute̱ be̱l-la' dxen chee̱ tu benne' gate naca zra dxupá'anale? 24 Quebe guchí'ale le'e chee̱ tu da dxun benne' ca naca da dxelé'ezele. Gate bi da guchí'ale, le gun na lu da naca xrlátaje.
Jesús dxuchálaje̱' chee̱ naga ze̱'e̱
25 Nadxa bal-la benne' ca' zaj zre̱'e̱ Jerusalén gulezú lawe̱' dxuluche̱be ljwezre̱':
―¿Quegá benne' nigá bénnea' dxelexílaje̱' chee̱ xelútie̱' le̱'? 26 Nigá zue̱' dxuchálaje̱' láwela bénneache, na' quebe nu bi dxe̱ Le̱'. ¿Zaj neze benne' xíchaje̱ ca' da li naca benne' nigá Cristo, Bénnea' nasel-la Dios? 27 Netu' nézentu' ga za' benne' nigá. Gate xida Cristo, quegá nu neze ga ze̱'e̱.
28 Jesús zue̱' dxusé̱dene̱' benne' ca' chale'aj xudau', na' gate benne̱' da nigá, na' gunné̱' zizraj:
―Dxennale núnbeale neda', ne dxennale nézele ga za'a. Bla'a nigá, quegá cheé̱zqueza'. Bénnea' nasel-le̱' neda' naque̱' li lazre', na' Bénnea' quebe núnbeale le'e. 29 Neda' núnbe'a Le̱' lawe' da za'a naga zua Le̱', na' Le̱' gusél-le̱' neda'.
30 Nadxa gulaca lazre̱' xele̱l-le̱' Jesús. Quebe nu gude̱la Le̱' lawe' da quebe ne zrin zra chee̱ xelútie̱' Le̱'. 31 Benne' zan guléajle̱'e̱ chee̱ Jesús, na' gulenné̱':
―Gate xida Cristo, ¿gúnljadxe̱' xel-la' waca zrente̱ ca da dxun benne' nigá?
Benne' fariseo ca' dxelesel-le̱' xra'aga we̱n zrin chee̱' chee̱ xele̱l-le̱' Jesús
32 Benne' fariseo ca' belenne̱' ca da dxelenná bénneache ca naca chee̱ Jesús, na' le̱', ne benne' xíchaje̱ ca' chee̱ bxruze ca' gulesel-le̱' xra'aga we̱n zrin chee̱ xudau' chee̱ xele̱l-le̱' Jesús. 33 Nadxa gunná Jesús:
―Wazúale̱na' le'e xetú chí'idau', na' xezrínqueza' naga zua Bénnea' gusél-le̱' neda'. 34 Le'e wexílajle neda', na' quebe xezrélele neda', lawe' da quebe gaca sa'le naga sua' neda'.
35 Nadxa benne' judío ca' gulezú lawe̱' dxuluche̱be ljwezre̱':
―¿Gazra cheaj benne' nigá, naga quebe gaca xezreldxu Le̱'? ¿Waxíaje̱' naga zaj zra' benne' judío ca' zaj nase dínnaje̱' ládujla benne' xe̱zr la xu ca' chee̱ gusé̱dene̱' benne' quebe zaj naque̱' judío? 36 ¿Bizra zéaje̱ da nigá guzre̱' dxi'u: Wexílajle neda', na' quebe xezrélele neda' lawe' da quebe gaca sa'le naga sua' neda'?
Jesús dxuchálaje̱' chee̱ xe̱gu nisa da dxunna xel-la' nabán li lazre'
37 Zra bze̱be chee̱ laní na' naca na zra blaudxa. Lu zra na' guzé̱ Jesús, na' gunné̱' zizraj:
―Che nu benne' dxebílene̱', dxal-la' xide̱' naga zua' neda', na' xí'aje̱'. 38 Naca na ca naxúaj na lu xiche chee̱ Dios, dxenné̱': “Benne' dxéajle̱'e̱ chia', lu lázrdawe̱' galaj xe̱gu nisa da gunna na xel-la' nabán.”
39 Da nigá gunná Jesús ca naca chee̱ Be' Lá'azxa, Bénnea' xelezí' benne' ca' xeléajle̱'e̱ chee̱ Jesús, lawe' da quebe ne la' Be' Lá'azxa lawe' da quebe ne xegá'ana szren Jesús naga zua Xre̱'.
Bénneache dxelaque̱' chupa la'a
40 Bal-la bénneache, gate belenne̱' da nigá, gulenné̱':
―Da li benne' nigá naque̱' Bénnea' guchalaje̱' waláz chee̱ Dios, Bénnea' dxal-la' xide̱'.
41 Xebal-le̱' gulenné̱':
―Benne' nigá naque̱' Cristo, Benne' guche̱be lazre' Dios sel-le̱'.
Xebal-le̱' gulenné̱':
―¿Waca Cristo benne' Galilea? 42 Lu da naxúaj na lu xiche chee̱ Dios dxenná na gaca Cristo zri'ine zre sua David, ne gaque̱' benne' xe̱zre Belén, xe̱zre na' naga gulaj David.
43 Ca'an guca, gulaca benne' ca' chupa la'a ne̱ chee̱ Jesús. 44 Bal-le̱' gulaca lazre̱' xele̱l-le̱' Jesús, na' quebe nu bexazre gune̱' na.
Benne' xíchaje̱ ca' chee̱ judío ca' quebe dxeléajle̱'e̱ chee̱ Jesús
45 Xra'aga we̱n zrin ca' chee̱ xudau' belexezrine̱' naga zaj zra' fariseo ca', ne benne' xíchaje̱ ca' chee̱ bxruze ca', na' benne' caní buluche̱be̱' xra'aga we̱n zrin ca':
―¿Bizr chee̱ na' quebe guche̱le bénnea'?
46 Belexeche̱be xra'aga we̱n zrin ca':
―Quebe ne guchalaj nu bénneache ca dxuchalaj benne' nigá.
47 Nadxa fariseo ca' gulé̱'e̱ xra'aga we̱n zrin ca':
―¿Cá'anqueze le'e be̱le lataj guzí xe̱'e̱ le'e? 48 Quebe nu ne chéajle̱ chee̱ bénnea', benne' xíchaje̱ caní, ne cá'anqueze benne' fariseo ca'. 49 Benne' ca' dxeléajle̱'e̱ chee̱ bénnea' quebe zaj núnbe'e̱ da nadxixruj bea na, ne zaj nabía xi'e̱.
50 Nicodemo, bénnea' guxíaje̱' xeajnné̱'e̱ Jesús chizrela naque̱' tu benne' fariseo ca', na' guzre̱' benne' ca':
51 ―Cate̱ze dxenná da nadxixruj bea chee̱dxu quebe gaca guzría xidxu tu benne' che quebe ne xénedxu xeche̱be̱' chee̱ nézedxu che bi da nabague̱'e̱.
52 Nadxa belexeche̱be benne' ca':
―¿Nácaquezu' lue' benne' Galilea? Gunná' xanne' da naxúaj na lu xiche chee̱ Dios, na' le'enu' netú benne' dxuchalaje̱' waláz chee̱ Dios quebe ne gálaje̱' naga nababa Galilea, naga zaj zra' bénneache quebe zaj naca xánnie̱' judío.
53 Nadxa tu tu benne' ca' xeajxaque̱' lizre̱'.