1 Ca gudé na', Xránadxu guqué̱'e̱ xegaxún chi benne' ca', na' gusél-le̱' chupa weaje̱' xelebía lawe̱' lau Le̱' xúgute̱ xe̱zre, ne xé̱zredu ca' naga dxal-la' chéaje̱' Le̱'. 2 Guzre̱' benne' ca':

―Da li dxennéa', lina da zren naca na, na' benne' we̱n zrin bábaze zaj naque̱'. Chee̱ le̱ na' le naba lau Xrane zrin na' sel-le̱' benne' we̱n zrin ca' xelexequé̱'e̱ lina na'. 3 ¡Le chjaca! Le nna'xque, neda' dxesel-la' le'e, gácale ca zríla'du ca' ládujla becu' xi'a ca'. 4 Quebe gúale xixruj, ne dumí, ne zrélale, ne quebe gagale la neza nu guchálajle̱le. 5 Gate chu'ule tu lu xu'u, na' gugápale diuzre, nnale: “Xel-la dxebeza zri lazre' gaca chee̱ benne' zaj zre̱'e̱ lu xu'u nigá.” 6 Che zaj zra' na' benne' dxelebeza zri lazre̱', na' da gunábale gaca chee̱ benne' ca', san che quebe nu chilá' naca caní, le naba quebe gaca da ba gunábale. 7 Le xegá'ana lu xu'u ná'queze, na' le xi'aj le gagu ca da xelunne̱' lawe' da benne' we̱n zrin quebe te le tune̱'. Quebe cheajsúale tu xu'u xetú xu'u. 8 Gate zrinle tu xe̱zre naga xelezí' lu ne̱'e̱ le'e, le gagu ca da xelunne̱'. 9 Le xexún benne' zaj xu'e̱ xízrawe̱' zaj zre̱'e̱ na', na' le xe̱'e̱: “Xel-la dxenná bea chee̱ Dios ba zua nen le'e.” 10 Che zrinle tu xe̱zre naga quebe xelezí' lu ne̱'e̱ le'e, le xedxúaj la neza chee̱ xe̱zre na', na' nnale: 11 “Ca naca bxrtedu' da' ní'antu' dxexebíbentu' na chee̱ gaca tu da gulé'e na le'e nabágale zria lau Dios. Dxal-la' nézele ba bla' ládujla le'e xel-la dxenná bea chee̱ Dios.” 12 Dxapa' le'e, ca lu zra guchi'a Dios, da xelezaca benne' zaj zre̱'e̱ lu xe̱zre nigá gácadxa na xel-la zi' ca da xelezaca benne' xe̱zre Sodoma, xe̱zre na' bzria xi' Dios.

13 Na' gunná Jesús:

―¡Edxugúa le'e, benne' xe̱zre Corazín! ¡Edxugúa le'e, benne' xe̱zre Betsaida! Chela lu xe̱zre Tiro, ne lu xe̱zre Sidón belelé'ene̱' ca naca xel-la waca chee̱ xabáa da ba gulaca ládujla le'e, gate na'te ba belexebí'i lazre̱', belácue̱' zra lane̱' tuzruj, ne buluzríe̱' de xíchaje̱'. 14 Lu zra guchi'a Dios da dxaca, na' sácadxale le'e xel-la zi' ca da xelezaca benne' Tiro, ne Sidón. 15 Na' le'e, benne' xe̱zre Capernaum, ¿dxéquele waxásale zrínte̱le xabáa? ¡Lataj chúl-lala xétajle!

16 Nadxa guzre̱' benne' ca' dxusé̱dene̱':

―Benne' xenne̱' chee̱le le'e, chia' neda' xenne̱', na' benne' guzúe̱' le'e chalá'ala, neda' na' gusaque̱' ca', na' benne' guzúe̱' neda' chalá'ala, Dios, Bénnea' gusel-le̱' neda', guzúe̱' chalá'ala.

17 Benne' gaxún chi ca' belexezrine̱' lu xel-la dxelebé, dxelenné̱':

―Xran, be' xriwe̱' ca' dxuluzúaqueze na dizra' chee̱ntu' gate dxuchínentu' Lau'.

18 Jesús guzre̱' benne' ca':

―Ca' naca, na' neda' ble'eda' da xriwe̱' be̱xruj na zran xabáa ca tu xesa da dxeajsúa na lu xu. 19 Neda' ba be̱nna' le'e xel-la dxenná bea chee̱ guléajle be̱ snia ca', ne bé̱xrujni, ne chee̱ guchúchujle dute̱ xel-la dxenná bea chee̱ da xriwe̱', na' quebe bi seque gune na le'e. 20 Quebe bele lawe' da dxelún be' xriwe̱' ca dxennale le'e, san le be lawe' da ba naxúaj lale xabáa na'la.

21 Lu zra ná'queze gubéle̱'e̱ Jesús, zúale̱ Be' Lá'azxa Le̱', na' gunné̱':

―Dxue lá'ana' Lue', Xrae, Xrane xabáa ne xe̱zr la xu, lawe' da ba blé'enu' bénne'du caní da bcácheu' chee̱ benne' sina ca', ne benne' dxeléajni'ine̱'. ¡Ca' naca, Xrae, lawe' da ca'an guca lazru' Lue'!

22 ’Xra' ba be̱nne̱' neda' xúgute̱. Quegá nu neze nu na' naca Zrí'ine̱', san tuze Xrá'queza', ne quegá nu neze nu na' naca Xra', san tuze Zrí'inequeze̱', ne nu benne' ca' dxaca lazre' Zrí'ine̱' guzéajni'ine̱' le̱' Nu na' naca Xre̱'.

23 Nadxa guné̱'e̱ benne' ca' dxusé̱dene̱', na' guzre̱' benne' cá'anze:

―Ba neza naca na chee̱ benne' ca' dxelelé'ene̱' ca da dxelé'ele le'e, 24 lawe' da dxapa' le'e, zánete̱ benne' ca', benne' buluchálaje̱' waláz chee̱ Dios, ne benne' wenná bea ca' gulaca lazre̱' xelelé'ene̱' ca da dxelé'ele le'e, san quebe belelé'ene̱' na. Gulaca lazre̱' xelenne̱' ca da dxenle le'e, san quebe belenne̱' na.

25 Nadxa tu benne' dxuxuzájle̱'e̱ da nadxixruj bea Dios bdxúaje̱', ne guxíaje̱' xeajchálajle̱ne̱' Jesús chee̱ gaca guzúa zrie̱' Le̱', na' bche̱be̱' Le̱':

―Benne' Wese̱de, ¿bizra dxal-la' guna' chee̱ gata' chia' xel-la nabán da zeajlí canna?

26 Jesús beche̱be̱':

―¿Bizra da naxúaj na lu da nadxixruj bea Dios? ¿Aja dxéquenu' da dxulabu'?

27 Bénnea' dxuxuzájle̱'e̱ da nadxixruj bea Dios beche̱be̱':

―Bzri'i Xranu' Dios dute̱ lázrda'u, ne nen dute̱ bénne'du xu'u, ne nen dute̱ xel-la dxun zi' lazre' chiu', ne nen dute̱ xel-la dxulaba lazre' chiu', na' bzri'i le sa' ljwezru' ca nazrí'i cuinu'.

28 Nadxa gunná Jesús, guzre̱' le̱':

―Cháwe'le̱'e̱ beche̱bu'. Che dxunu' caní, na' gapu' xel-la nabán na'.

29 Bénnea' dxuxuzájle̱'e̱ da nadxixruj bea Dios guca lazre̱' gucá'ana chawe' cuine̱', na' guzre̱' Jesús:

―¿Nuzra na' le sa' lwezra'?

30 Beche̱be Jesús:

―Tu benne' guzé̱'e̱ Jerusalén, bétaje̱' zíaje̱' Jericó. Lu neza na' xu'e̱, na' gule̱la gubán le̱', ne gulebane̱' ca naca da nape̱', ne zra lane̱'. Na' buluzálaje̱' le̱', ne besiá'que̱' zaj nucá'ane̱' le̱' ca benne' gate. 31 Nadxa gudé tu bxruze neza na', na' gate blé'ene̱' le̱', gudée̱' chalá'ala. 32 Cá'anqueze gudé na' tu benne' xrtia Leví, benne' dxune̱' zrin chee̱ xudau', na' gate blé'ene̱' bénnea', gudée̱' chalá'ala. 33 Nadxa tu benne' Samaria gudée̱' neza na', na' gate blé'ene̱' le̱' bexache lazre̱' le̱'. 34 Gubigue̱' cuita benne' na', ne btupe̱' tu da za lu we̱' chee̱', ne xrise uva wal-la, na' bchele̱' na ladxe'. Nadxa bcuene̱' le̱' cuzru bea chee̱', na' beche̱'e̱ le̱' tu lu xu'u naga xegá'ane̱', ne bxue̱' le̱' na'. 35 Zra xula, ca bezá' benne' Samaria na', na' guléaje̱' chupa dumí da bnézruje̱' xrane xu'u na', ne guzre̱' le̱': “Bxue benne' nigá, na' che ba gucá'adxa xelate' dumí chiu', neda' xexunna' na gate xelá'a.”

36 Nadxa Jesús guzre̱' benne' dxuxuzájle̱'e̱ da nadxixruj bea Dios:

―¿Nula benne' chunna caní guque̱' le sa' ljwezre bénnea' gule̱la gubán ca'?

37 Na' gunná bénnea' dxuxuzájle̱'e̱ da nadxixruj bea Dios:

―Bénnea' bexache lazre̱' le̱'.

Nadxa Jesús guzre̱' le̱':

―Bexíaj lue', na' gúnquezu' ca'.

38 Jesús bexu'e̱ neza, na' bezrine̱' tu xé̱zredau', na' lu xe̱zre na' zua tu nu'ula le̱' Marta, na' gulu'e̱ Jesús lizre̱'. 39 Marta na', zua tu bi bile̱' le̱' María, na' María na' gudxé'e̱ zran ni'a Jesús chee̱ xenne̱' da dxuchálaje̱'. 40 Marta dé̱le̱'e̱ da dxune̱', na' bzrine̱' lau Jesús, ne guzre̱' Le̱':

―Xran, ¿quebe dxexache lazru' neda' lawe' da dxucá'ana bi bila' neda' chee̱ guna' tuza' zrin chee̱ntu'? Guzre-be' gácale̱be' neda'.

41 Jesús beche̱be̱':

―Marta, Marta, dxezé̱le̱'e̱nu' gunne xue, ne zu' ste̱be ca naca chee̱ da ca' dxunu', 42 san de̱ tuze da dxun na ba xen nu gun. María ba bezrelne̱' da cháwedxa, na' netú benne' quebe seque' cue̱' na.