6
Dxulé'e Jesús ca naca da xrlátaje da dxelún bénneache
Caní gunná Jesús:
―Le guxúe xanne' cuínale chee̱ quebe gunle da naca chee̱ xel-la' benne' xudau' chee̱le lau bénneache chee̱ xelelé'ene̱' na. Che ca'an dxunle, na' Xrale Dios zue̱' xabáa québequeze bi gunne̱' le'e. Chee̱ le̱ na', gate lue' dxácale̱nu' benne' dxelexázrjene̱', quebe guzennu' xúgute̱ bénneache ca da dxunu', ca dxelún benne' ca' dxelune̱' xrlátaje cúzreze la neza, ne lu xu'u naga dxulucá'ana szren benne' judío ca' Dios. Dxelune̱' da caní chee̱ xelenné̱ bénneache xrlátaje chee̱'. Da li dxapa' le'e, ba dé̱queze lazruj chee̱'. Gate lue' gunézruju' late' chee̱ benne' dxelexázrjene̱', be̱n na luéze chee̱ quebe neze le sa' ljwezru'. Be̱n da caní bagácheze, na' Xrau' Dios, Bénnea' dxelé'ene̱' ca da dxunu' bagácheze, Le̱' gunne̱' lazruj chiu'.
Jesús dxusé̱dene̱' ca dxal-la' gundxu xel-la' dxuláwizra Dios
(Lc. 11.2-4)
Na' gunná Jesús:
―Gate le'e gunle xel-la' dxuláwizra Dios, quebe gunle ca dxelún benne' ca' dxelune̱' xrlátaje cúzreze. Dxeledánene̱' dxelune̱' xel-la' dxuláwizra Dios zaj ze̱ze̱' lu xu'u naga dxulucá'ana szren benne' judío ca' Dios, ne la neza, chee̱ xelelé'e bénneache da dxelune̱'. Da li dxapa' le'e, ba dé̱queze lazruj chee̱'. Gate lue' dxuláwizru' Dios, guxú'u lu xu'u chiu'. Bsezxuj dxa xu'u chiu', na' bláwizra Dios guchálajle̱nu' Xrau' Dios zúale̱ne̱' lue' naga zu' tuzu'. Nadxa Xrau' Dios, Bénnea' dxelé'ene̱' ca da dxunu' bagácheze, Le̱' xuzri'e̱ chiu'.
’Gate dxuláwizru' Dios dxuchálajle̱nu' Le̱', quebe tuz ca da nneu' zánete̱ lasa ca dxelún benne' ca' quebe zaj núnbe'e̱ Dios. Dxeléquene̱' wen Dios chee̱' lawe' da dxelenné̱le̱'e̱. Quebe gunle ca dxelún benne' ca', lawe' da Xrale Dios ba nézquezne̱' ca da dxechínnele le'e nédxula ca za nábale na. Chee̱ le̱ na', le guláwizra Dios nnale caní:
Xrantu' Dios, zu' xabáa,
gaca lá'azxaqueze Lau'.
10 Gudá nna be'u lu xe̱zr la xu nigá.
Gaca lu xe̱zr la xu nigá ca dxaca lazru' Lue',
cáte̱ze dxaca xabáa.
11 Be̱nna netu' da gáguntu' na'a.
12 Bnite lau chee̱ntu' ca naca da cale̱la da be̱ntu',
ca netu' ba bnite launtu' chee̱ benne' belune̱' chee̱ntu'
da cale̱la.
13 Quebe gu'u lataj nu gun zréaje netu',
2 san bselá netu' lu na' da xriwe̱'.
Naca chiu' gápaquezu' xel-la' dxenná bea,
ne xel-la' waca,
ne da xabáa chadía chacanna. ¡Ca'an gaca na!
14 ’Che le'e gunite laule chee̱ benne' belune̱' chee̱le da cale̱la, na' Xrale Dios zue̱' xabáa gunite lawe̱' chee̱le le'e. 15 Che le'e quebe gunite laule chee̱ benne' ca', na' Xrale Dios quebe gunite láuqueze̱' chee̱le le'e ca naca dul-la da nabágale.
Jesús dxusédene̱' ca dxal-la' gundxu gubasa
16 Na' gunná Jesús:
―Gate le'e dxunle gubasa, quebe guzúale baxache' laule ca dxelún benne' dxelune̱' xrlátaje cúzreze. Benne' caní dxelune̱' ca' chee̱ xelelé'e bénneache le̱' dxelune̱' gubasa. Da li dxapa' le'e, ba dé̱queze lazruj chee̱ benne' ca'. 17 Lue', gate dxunu' gubasa, bza xíchaju' chawe', ne gudibe lau', 18 chee̱ quebe xeléquebe'e bénneache dxunu' gubasa. Tuze Xrau' Dios na', Bénnea' zúale̱ne̱' lue' naga zu' tuzu', Le̱' dxennátequeze̱', na' gunne̱' da naca na chiu'.
Jesús dxusédene̱' chee̱ da gunní'a chee̱ xabáa
(Lc. 12.33-34)
19 Na' gunná Jesús:
―Quebe gutúpale da gunní'a lu xe̱zr la xu nigá, naga guteba' na, ne da ca' dxelebía xi na, na' xelú'u gubán ne xelebane̱' na. 20 Le'e, le gun da xrlátaje, da gaca na ca guzrá cháwele da gunní'a xabáa, naga quebe guteba' na, ne da ca' quebe bi xeleque na, na' québequeze xelú'u gubán chee̱ xelequé̱'e̱ na. 21 Naga nuzrale da gunní'a chee̱le, na' zúaqueze lázrdaule.
Jesús dxusédene̱' chee̱ tu xi' da xú'udxu
(Lc. 11.34-36)
22 Na' gunná Jesús:
―Xiaj laule zaj naca na ca tu xi' chee̱ be̱l-la' dxen chee̱le. Che xiaj laule zaj naca na chawe', dute̱ ca naca be̱l-la' dxen chee̱le naxaní'. 23 Che xiaj laule quebe zaj naca na chawe', dute̱ ca naca be̱l-la' dxen chee̱le nachul-la na. Cá'anqueze che xi' da xu'ule xexaca na tu da chul-la, chúl-lale̱'e̱dxa súaquezle.
Jesús dxusédene̱' chee̱ Dios, ne chee̱ da gunní'a
(Lc. 16.13)
24 Na' gunná Jesús:
―Netú benne' quebe séquene̱' guzúa cuine̱' lu na' chupa xrane̱', lawe' da wazré̱'e̱ tu xrane̱' ne wazrí'ine̱' xetúe̱', u wéquene̱' ba lá'ana tu xrane̱' na' xetúe̱' guzúe̱' chalá'ala. Quebe séquele guzúa cuinle lu na' Dios, ne lu na' da gunní'a.
Jesús dxusédene̱' ca dxun Dios, dxuxúe̱' xúgute̱ bi chee̱' ca'
(Lc. 12.22-31)
25 Na' gunná Jesús:
―Chee̱ le̱ na' dxapa' le'e, quebe cue'le gunne xue ga sa' da gágule da xí'ajle chee̱ gaca banle, ne ga sa' zra lánale da gácule. Zácadxa xel-la' nabán chee̱le ca da dxágule, ne zácadxa be̱l-la' dxen chee̱le ca zra lánale. 26 Le nna'xque bxínnedu ca' dxeledaba' lu be'. Quebe dxelázaba'. Quebe dxelelápaba'. Quebe ga dxuluxuzrá cháweba' na. Xrale Dios zue̱' xabáa dxunézruje̱' da dxeláguba'. Zácadxale le'e ca bxínnedu ca'. 27 ¿Nuzra benne' ládujla le'e gaca gusetunna cuine̱' xate' lawe' da dxe'e̱ gunne xue?
28 ’¿Bizr chee̱ na' dxe'le le'e gunne xue chee̱ zra lánale? Le nna'xque ca dxelegula xiaj ca' zaj ze̱ le̱'e̱ xixre'. Quebe dxelún na zrin, ne quebe dxelache na du. 29 Dxapa' le'e, Salomón benne' wenná bea na' quebe gucue̱' ca da xrtan chee̱ xiaj caní, na' le̱' gúta'le̱'e̱ chee̱' da gunní'a. 30 Che Dios dxudxe̱ne̱' xrtánle̱'e̱ xiaj caní da ca' zaj zua na na'a le̱'e̱ xixre', na' wxre xelezxe na lu xi', quegá gundxe̱' da chawe' chee̱le le'e, benne' québete̱ ca dxeajlí lazre'. 31 Chee̱ le̱ na', quebe cué'tecale gunne xue, nnale: “¿Ga sa' da gágudxu? ¿Ga sa' da xí'ajdxu? ¿Ga sa' da gácudxu?” 32 Chee̱ da caní zaj dxe' gunne xue benne' quebe zaj núnbe'e̱ Dios, san le'e, zua tu Xrale xabáa ba nézquezne̱' ca naca xúgute̱ da dxechínnele. 33 Zria laudxa cuele gunne xue chee̱ nna bea Dios lu xichaj lázrdaule, ne chee̱ gunle da xrlátaje da xezaca ba lazre' Dios, na' sile xúgute̱ da ca' dxechínnele. 34 Quebe cuele gunne xue na'a da naca na chee̱ wxre, lawe' da wxre ca'an gáta'queze da cuele gunne xue. Tu zra tu zra dé̱queze da guchaga laudxu.