1 Gate bexetaj Jesús lu xi'a na', benne' zante̱ zjácale̱ne̱' Le̱'. 2 Na' bzrin tu benne' we̱' dxuzru lu xpe̱le̱', ne bzu zribe̱' lau Jesús. Dxe̱'e̱ Le̱':

―Xran, che dxaca lazru', waca xexunu' neda'.

3 Nadxa Jesús guxrúa ne̱'e̱ bénnea'. Dxe̱'e̱ le̱':

―Dxaca lazra'. Na'a dxexuna' lue'.

Ca gunné̱' caní, benne' we̱' na' bexácate̱' ca naca xízrawe̱' chee̱'. 4 Na' Jesús guzre̱' le̱':

―Gunná' xque. Quebe nu xu'u ca'. Bexíajze na'a xeajxelé'e cuinu' lau bxruze, ne xeajnezruj guna' ca da dxenná bea lu da bdxixruj be'e Moisés, chee̱ xelelé'e benne' ca' ba bexacu' na'a.

5 Ca bexú'u Jesús lu xe̱zre Capernaum, na' bzrin lawe' tu benne' Roma, benne' dxenná be'ene̱' benne' ca' dxjaque̱' wedil-la, na' guta' xuene̱' Le̱', 6 dxe̱'e̱ Le̱':

―Xran, bi we̱n zrin chia' de̱be' lizra'. Naxrú'unebe' bine, ne dxezácale̱'e̱be'.

7 Jesús dxe̱'e̱ le̱':

―Wazá'a xexuna'-be'.

8 Benne' dxenná be'e̱ na' gunné̱':

―Xran, quebe naca chia' chu'u lizra'. Cun gunne̱ze, na' xexaca bi we̱n zrin chia'. 9 Caní waca gunu' lawe' da zua benne' dxenná bé'ene̱' neda', ne cá'anqueze neda' dxenná be'eda' benne' ca' dxjaque̱' wedil-la. Gate dxapa' tube': “Guxíaj”, na' dxéajbe'. Na' gate dxapa' bi xula: “Gudá”, na' dxídabe'. Na' gate dxuchíneda' bi we̱n zrin chia' chee̱ bi da gunbe', na' dxunbe' na.

10 Gate bene Jesús da nigá, bebánene̱', na' guzre̱' benne' ca' zjácale̱ne̱' Le̱':

―Da li dxapa' le'e, ládujla benne' Israel quebe nu ne xezrelda', benne' dxéajle̱'e̱ chia' ca dxun benne' nigá. 11 Neda' dxapa' le'e, zá'aca benne' zante̱ chalá'a naga dxalaj gubizra, ne xechalá'ala naga dxebía gubizra, na' xelebé'e̱ tu zren xelawe̱' nen Abraham, ne Isaac, ne Jacob naga dxenná bea Dios xabáa. 12 Benne' ca' gucá'a zga'ale Dios chee̱ xelu'e̱ naga dxenná bea Le̱', guzale̱' benne' ca' lataj chul-la naga xelebezre̱', ne xeláguxa'ate̱ lazxe̱'.

13 Nadxa Jesús guzre̱' benne' dxenná be'e̱ na':

―Bexíaj lizru'. Waca ca da ba guxéajle̱'u.

Ca lu zra ná'queze bexácate̱ bi we̱n zrin chee̱'.

14 Guxíaj Jesús lizre Pedro, na' blé'ene̱' xrna zru'ule̱' de̱' lu da'a, xu'e̱ da la. 15 Xeajté̱' ne̱'e̱, na' bedxúaj da la da xu'e̱. Nadxa nu'ula na' guxase̱', ne guzú lawe̱' dxusení'e̱ da xelagu benne' ca'.

16 Ca guzría gubizra, na' belezrín benne' zante̱ lau Jesús, zaj naché̱'e̱ benne' zaj xu'e̱ be' xriwe̱' ca'. Nen dízra'ze da gunná Jesús, bebéaje̱' be' xriwe̱' ca', ne bexune̱' xúgute̱ benne' we̱' ca'. 17 Da nigá guca na ca da gunná Isaías, benne' bchálaje̱' waláz chee̱ Dios, gunné̱': “Le̱' bequé̱'e̱ xízrawe̱' ca' da nápadxu, ne gubague̱' ca da dxezácadxu.”

18 Gate na' ble'e Jesús benne' zante̱ zaj naxéchaje̱' Le̱', na' guzre̱' benne' ca' dxusé̱dene̱' gulelague̱' xechalá'a nísadau' tu lu da dxedá lawe' nisa. 19 Na' bzrin lau Jesús tu benne' dxuxuzájle̱'e̱ da bdxixruj be'e Dios, na' dxe̱'e̱ Le̱':

―Benne' Wesede, dxaca lazra' sále̱na' Lue' gátete̱ze chéaju'.

20 Na' Jesús guzre̱' le̱':

―Beza' zaj zua bluaj chee̱ba', na' bxinne zaj zria xrú'uneba', san neda', Benne' Gulje̱' Bénneache, ne naga xrua xíchaja' quebe ga zua.

21 Bzrin xetú benne' naque̱' benne' ba bsé̱dequeze Jesús, na' guzre̱' Le̱':

―Xran, be̱nna neda' lataj xexá'a nedxu chee̱ cheajxecacha' xra'.

22 Nadxa Jesús guzre̱' le̱':

―Gudále̱n neda'. Be̱' lataj benne' gate ca' xulucache ljwezre̱'.

23 Nadxa guxú'u Jesús lu da dxedá lawe' nísadau', na' benne' ca' dxusé̱dene̱' belune̱' Le̱' tu zren. 24 Na' guzú lau dxaca tu be' bdunu' lawe' nísadau', na' xeajxruza chee̱ nísadau' guxú'u na lu da dxedá lawe' nísadau' na', dxácate̱ dxase Jesús. 25 Nadxa benne' ca' dxusé̱dene̱' bulusebane̱' Le̱', na' dxelé̱'e̱ Le̱':

―Xránantu'. Bselá netu'. Ba dxázentu' lu nisa.

26 Jesús guzre̱' le̱':

―¿Bizr chee̱ na' dxezrébele̱'e̱le? Nácale benne' látega dxeleajlí lázre' Dios.

Nadxa guxasa Jesús. Gudil-le̱' be' bdunu', ne nísadau', na' la belebé zrite̱ na. 27 Benne' ca' belexebánene̱', gulenné̱':

―¿Núzraqueze benne' nigá? Dxuluzúa be', ne nísadau' dizra' chee̱'.

28 Gate bezrín Jesús xechalá'a nísadau' na' lu xe̱zr la xu chee̱ benne' Gadara, na' chupa benne' biu belexedxúaje̱' lu bluaj chee̱ benne' gate, na' belezrine̱' lau Jesús. Dxúpate̱ benne' ca' zaj xu'e̱ be' xriwe̱', ne zaj naque̱' benne' sníale̱'e̱, na' netú benne' quebe dxexázrene̱' xedée̱' la neza na'. 29 Na' gulezú lawe' dxelebézrexe̱'e̱. Dxelenné̱':

―¿Bizr chee̱ na' za'u naga zúantu', Jesús, Zri'ine Dios? ¿Za'u nigá chee̱ gusaca zi'u netu', ne quebe ne zrin zra?

30 Tu chi na' zra tu cue' cuche dxeláguba'. 31 Be' xriwe̱' ca' gulata' xue na Jesús, gulenná na:

―Che Lue' xebéaju' netu' nigá, be̱nna lataj cheajchú'untu' lu cuche ca'.

32 Nadxa Jesús guzre̱' na:

―Le chjaca xca'.

Nadxa be' xriwe̱' ca' belexedxúaj na lu benne' ca', na' belexú'u na lu cuche ca'. Nadxa xúgute̱ cuche ca' belelázruba' tu dxu'a xi'a zren, na' xeajlecházeba' lu nísadau' naga gulázeba' nisa, na' guláteba'.

33 Benne' ca' buluxúe̱'-ba' belezrebe̱', na' besá'aca chégüe̱', ne belexezrine̱' lu xe̱zre. Buluchálaje̱' ca guca xúgute̱ da caní, ne ca guca chee̱ benne' ca', belexedxúaj be' xriwe̱' zaj xu'e̱. 34 Nadxa xúgute̱ benne' zaj zre̱'e̱ lu xe̱zre na' beledxúaje̱', ne belezrine̱' naga zua Jesús. Na' ca belelé'ene̱' Le̱', gulata' xuene̱' Le̱' xezé̱'e̱ lu xe̱zr la xu chee̱'.