24
Chee̱ Dios naca xe̱zr la xu nigá ne xúgute̱ da zaj de̱ lawe na.
Naca chee̱' xe̱zr la xu, ne xúgute̱ bénneache zaj zre̱'e̱ ga na'.
Bzue̱' na lawe' nísadau',
ne bzale̱' lane na sítujla zran nísadau'.
¿Nu seque' cuen xi'a chee̱ Xránadxu?
¿Nu seque' chu'u xudau' lá'azxa chee̱'?
Waca benne' ca' zaj naque̱' du lazre' ca naca da dxelune̱',
ne ca naca da dxulaba lazre̱'.
Benne' ca' quebe ne xelechisa ne̱'e̱ lau bedáu' xiaj xaga ca',
ne quebe bi ne xeleche̱be lazre̱' da naca we̱n lazre'.
Xránadxu gune̱' da chawe' chee̱ benne' caní.
Dios guchi'e̱ chee̱ benne' caní, ne guselé̱' le̱'.
Caní zaj naca bénneache dxelebigue̱' lau Le̱',
benne' ca' dxelexu'e̱ naga zua Dios chee̱ Jacob.
 
Le salaj dxa xu'u chee̱ xudau'.
Le salaj dxa xu'u chawe' ca',
na' chu'u Wenná Bea szrente̱.
¿Nuzra na' Wenná Bea szrente̱ nigá?
Naque̱' Xránadxu, Benne' wal-la,
Bénnea' nape̱' dute̱ xel-la' waca.
Naque̱' Xránadxu, Bénnea' dxedxúaje̱' chawe' lu wedil-la.
 
Le salaj dxa xu'u chee̱ xudau'.
Le salaj dxa xu'u chawe' ca',
na' chu'u Wenná Bea szrente̱.
10 ¿Nuzra na' Wenná Bea szrente̱ nigá?
Naque̱' Xránadxu, Benne' dxenná bé'ene̱' xúgute̱ da zaj zua.
Le̱' naque̱' Wenná Bea szrente̱ na'.