33
1 Le be le'e, benne' xrlátaje, lau Xránadxu Dios.
Xrtante̱ naca lau Dios da dxelúe lá'ana benne' xrlátaje ca' Le̱'.
2 Le gucá'ana szren Dios nen da zríadi'i na du da dxínnele.
Le gúl-laqueze chee̱' nen da dxúl-lale̱nle,
ne nen tu da nua na chi du.
3 Le gul-la chee̱ Le̱' tu da cube.
Le gul-la cháwedau', quínnele dute̱ xel-la' dxebé.
4 Li lazre' naca xrtizra' Xránadxu Dios,
na' nune̱' dute̱ lu xel-la' li lazre' chee̱'.
5 Le̱' nazrí'ine̱' da naca xrlátaje, ne da naca du lazre'.
Zaj núnbea bénneache xel-la' dxexache lazre' chee̱ Xránadxu
du gabí'i xe̱zr la xu.
6 Ne̱ chee̱ xrtizra' Xránadxu Dios, be̱ne̱' xabáa,
na' xúgute̱ belaj da zaj nalá' zran xabáa be̱ne̱'
nen be' dxedxuaj dxu'e̱.
7 Le̱' dxuxutube̱' nísadau', ne dxexune̱' na ca tu xi'a nisa.
Dxegá'a chawe̱' nisa lu da situj ca' naga nucueze̱' chee̱ na.
8 Le zrebe Xránadxu Dios, xúgute̱le zrale xe̱zr la xu nigá.
Le zrebe lau Le̱', xúgute̱le le'e zrale lu xe̱zr la xu
9 lawe' da gunne̱ze̱', na' guca xe̱zr la xu.
Gunná be'ene̱' na, na' zúaqueze na.
10 Xránadxu Dios dxune̱' dxexaca dácheze dizra' zaj nun
bénneache xe̱zr la xu ca',
ne dxune̱' dxelaca níteze da ca' zaj nune̱' xelune̱'.
11 Dizra' ba nun Xránadxu Dios tu súazqueze
na chadía chacanna.
Da dxegú'u be'e̱ lu lázrdawe̱' tu wadíazqueze na
lau xúgute̱ bénneache.
12 Ba neza zrente̱ naca na chee̱ benne' xe̱zr la xu ca'
Xránadxu naque̱' Dios chee̱ le̱',
benne' xe̱zr la xu ca' gucá'a Dios chee̱ xelaque̱' benne' chee̱'.
13 Naga zue̱' xabáa chee̱' dxenná' Xránadxu Dios,
na' dxelé'ene̱' xúgute̱ cuen bénneache.
14 Naga zue̱' lataj lá'azxa chee̱' dxenné̱'e̱,
na' dxelé'ene̱' ca zaj zra' bénneache lu xe̱zr la xu.
15 Le̱' be̱ne̱' xichaj lázxdau xúgute̱ benne' ca',
na' dxenné̱'e̱ xúgute̱ da dxelune̱'.
16 Quebe la benne' wenná bea ne̱ chee̱ benne'
dxjaque̱' wedil-la zante̱ chee̱',
ne quebe la benne' wal-la ne̱ chee̱ xel-la' wal-la da nape̱'.
17 Quebe nu benne' le̱' ne̱ chee̱ bzrina',
ne quebe nu la ne̱ chee̱ xel-la' wal-la zren chee̱'.
18 Le na' xque, dxuxúe Xránadxu Dios benne' ca' dxelezrebe̱' Le̱'.
Dxuxúe̱' benne' ca' dxelebeza lazre̱' Le̱' xexache lazre̱' le̱'
19 chee̱ guselé̱' le̱' lu xel-la' gute,
ne chee̱ gugawe̱' le̱' gate dxaca gubina'.
20 Dxebeza lázredxu Xránadxu Dios.
Le̱' naque̱' Bénnea' dxácale̱ne̱' dxi'u, ne dxucu'uje̱' dxi'u.
21 Chee̱ le̱ na' du lázredxu béle̱'e̱quezdxu lau Le̱',
lawe' da tu dxuxrén lázrezquezdxu La lá'azxa chee̱'.
22 Bexache lazre' netu', Xránantu',
lawe' da dxebeza lázrentu' Lue'.