36
1 Da zrinnaj da dxun benne' dxuzúa chalá'ala Dios
dxuchálajle̱ na le̱' lu xichaj lázrdawe̱'.
Quebe dxezá lázrequeze̱' gape̱' Dios ba lá'ana.
2 Chee̱ le̱ na' dxulé'e cuine̱' ca tu benne' zrente̱.
Dxéquene̱' quebe dxelé'e Dios da zrinnaj da dxune̱',
ne quebe dxecuide Dios le̱'.
3 Da tu dxuchálajzqueze̱' naca na da zrinnaj, ne da we̱n lazre'.
Québedxa dxéajni'ine̱', ne québedxa dxune̱' da xrlátaje.
4 Dxulaba lazre̱' ca naca da cale̱la gune̱' gate de̱' naga dxate'.
Xu'e̱ neza da quebe naca neza chawe'.
Quebe dxecuídene̱' da cale̱la.
5 Xrana' Dios, zrente̱ naca xel-la' dxexache lazre' chiu'
da dxezrinte̱ na xabáa,
na' dxezrinte̱ lu beuj xel-la' li lazre' chiu'.
6 Da xrlátaje chiu' naca na ca tu xi'a zren chiu',
na' ca dxuchi'u naca na ca tu nísadau' sítujte̱.
Xrana' Dios, tu dxuxúezquezu' bénneache, ne be̱ xixre' ca'.
7 Xrdante̱ naca xel-la' dxexache lazre' chiu', Dios.
Chee̱ le̱ na' dxuluxrén lazre' bénneache Lue' ca dxelún
bedxuj dxé'enedu ca' dxelexezraba' zran xrila bedxuj.
8 Welélajquezne̱' chee̱ da de̱le̱'e̱ lizru',
na' Lue' gunézruju' xelé'aje̱' da naca ca tu xe̱gu da
naca na da dxezaca ba lazru' Lue'.
9 Naga zu' Lue' zua beaj naga dxalaj nisa da dxunna na
xel-la' nabán.
Lu xel-la' naxaní' chiu' walé'entu' da naca lení'.
10 Bexache lazre' benne' ca' zaj núnbe'e̱ Lue',
ne bzua chee̱ benne' li lazre' ca' da xrlátaje chiu'.
11 Quebe gu'u lataj tábaga benne' dxucá'ana szren cuina neda',
ne quebe gutá benne' dxun da cale̱la neda'.
12 Xeajlechaze benne' ca' dxelune̱' da zrinnaj.
Lue' be̱nu' xeajlechaze benne' ca', na' quebe gaca xelexase̱'.