59
Bselá neda' lu na' benne' ca' dxeledábague̱' neda', Dios chia'.
Bselá neda' lu na' benne' ca' dxelune̱' chia' da cale̱la.
Bselá neda' lu na' benne' ca' dxelune̱' da zrinnaj.
Bselá neda' lu na' benne' ca' dxelutie̱' benne',
lawe' da dxelilaj lazre̱' xelútie̱' neda'.
Zaj nazraga benne' wal-la ca' chee̱ xeledíl-lale̱ne̱' neda',
quegá lawe' da bi zria nabaga', ne quegá ne̱ chee̱
dul-la nuna' neda', Xran.
Lácala quebe bi be̱na' chee̱ benne' ca',
zá'aca chégüe̱', ne dxulucueze̱' bi xelune̱' chia'.
Bebán chee̱ xidu' naga zua', na' le'enu' da dxelune̱'.
Lue', Xran, Dios chee̱ benne' zan dxjaque̱' wedil-la,
ne Dios chee̱ benne' Israel ca',
bebán chee̱ gudéu' ba xa' benne' xúgute̱ cue' xe̱zr la xu.
Quebe xexache lazru' xúgute̱ benne' ca' dxeledábague̱' Lue',
ne dxelune̱' da zrinnaj.
 
Xelelé̱'e̱ gate cuía gubizra, ne xelebezre xe̱'e̱
ca dxelún becu', na' xeléchaje̱' xe̱zre.
 
Gunná' xque, da dxuluchálaje̱' naca na ca da dxelexexe̱be̱'.
Dizra' dxelenné̱' zaj naca na ca xia zaj nalá na,
lawe' da dxelenné̱': “¿Nuzra xene?”
Lue', Xran, guzrizru' chee̱ benne' ca'.
Gun lau' chee̱ benne' xúgute̱ cue' xe̱zr la xu ca'.
Zaj naca wal-la benne' ca' dxeledábague̱' neda'.
Cueza lazra' Lue' lawe' da dxucu'uju' neda', Dios.
 
10 Dios, Bénnea' dxexache lazre̱' neda', cuía lawe̱' lawa' neda'.
Dios gune̱' le'eda' gaca chee̱ benne' ca' dxeledábague̱' neda'
ca da dxezá lazra'.
11 Quebe gutiu' benne' ca', chee̱ quebe xelal-la lazre'
bénneache chia' ca da gunu'.
Be̱se dinnaj benne' ca' nen xel-la' waca chiu'.
Lue', Xran, Benne' dxucu'uj netu', ben cheajlecházie̱'.
12 Be̱n xeledule̱' lu xel-la' dxulucá'ana szren cuine̱',
ne̱ chee̱ dul-la dxelune̱' lu da dxuluchálaje̱',
ne ne̱ chee̱ dizra' schanni', ne da we̱n lazre' da dxelenné̱'.
13 Bzria xi'e̱ lu xel-la' dxezrá'a chiu'.
Bzria xi'e̱ chee̱ québedxa xelezúe̱'.
Dios, be̱n xeleque be'ene̱' dxenná be'enu' zri'ine zre sua Jacob.
Dxenná be'u du ca naca xe̱zr la xu.
 
14 Dxelelé̱'e̱ gate dxebía gubizra, ne dxelebezre xe̱'e̱
ca dxelún becu', ne dxeléchaje̱' xe̱zre.
15 Dxeledé̱' ca benne' dxeledaze̱', dxelílaje̱' da xelawe̱',
na' che quebe dxeléljane̱', na' du xe̱la dxelawe̱' zria tue̱' xetúe̱'.
 
16 Neda' gúl-laqueza' chee̱ xel-la' waca chiu',
na' che zílala güe lá'ana' xel-la' dxexache lazre' chiu',
lawe' da gúcale̱nu' Lué'queze neda',
ne bcu'uju' neda' gate guzúa' lu da sté̱bele̱'e̱.
17 Lue' dxutipu' lazra', na' gúl-laqueza' chiu',
lawe' da nacu' Lue', Dios, Bénnea' dxucu'uje̱' neda',
ne Dios, dxexache lazru' neda'.