1 Chawe' naca dxue lá'anantu' Lue', Xrana' Dios,

ne gúl-lantu' da dxucá'ana szren na Lue', Dios szrente̱.

2 Chawe' naca dxuzénentu' bénneache tu zra tu zra

na' dxe̱la dxulé'entu' nacu' li lazre'.

3 Dxúl-lantu' da caní, dxínnentu' da dxúl-lale̱ntu'

ne dxínnentu' da con zríadi'i na du da dxenné̱le̱'e̱ xrtandau'.

4 Xrana' Dios, ne̱ chee̱ da dxunu' Lue', dxunu' dxebéle̱'e̱da'.

Ca zaj naca da nun na'u zua' lu da ba neza.

5 Da zrente̱ zaj naca da nunu', Xrana' Dios.

Da zrénle̱'e̱ zaj naca da dxugú'u lazru' gunu'.

6 Québequeze neze benne' lázxdau zide',

ne quebe dxéajni'i benne' xala ca naca da nigá.

7 Gate dxelegula benne' dxelebéaj xíchaje̱' Dios

ne dxe̱pe ban da dxelún benne' we̱n da zrinnaj,

naca na chee̱ xelebía xi'e̱ tu chí'izqueze.

8 Lue', Xrana' Dios, tu nácazquezu' Dios szrente̱.

9 Dxunna bea na ca gaca chee̱ benne' dxedábague̱' Lue',

Dxunna bea na xelebía xi' benne' ca' dxeledábague̱' Lue'.

Xelase dinnaj xúgute̱ benne' ca' dxelune̱' da zrinnaj.

10 Lue' dxunu' dxezrendxa xel-la' wal-la chia' ca naca

Dxugú'u da za xíchaja' da dxutipa na lazra'.

11 Dxal-la' le'eda' xelezrá' zran ni'a benne'

na' xenda' xelebezre xache' benne' ca' guledíl-lale̱ne̱' neda',

benne' ca' dxelune̱' da cale̱la.

12 Welexán benne' xrlátaje ca' ca dxun xaga zina'.

Xelegule̱' ca dxun xaga cedro lu xi'a Líbano.

13 Zaj naque̱' ca tu xaga ze̱ na lu xudau' chee̱ Xránadxu Dios,

da dxegúlale̱'e̱ na lu chale'aj chee̱ xu'u lizre Dios chee̱dxu.

14 Zaj naque̱' ca xaga ca' dxelebía da zixre chee̱ na gate

ba zaj nagula na, ne zaj naca na xaga xa'a wal-la.

15 Benne' caní xuluzenne̱' bénneache naca li lazre'

Xrana' Dios, Bénnea' dxuzé̱ chúchue̱' neda',

ne quebe bi zúale̱ Le̱' da quebe naca xrlátaje.