99
Naca Xránadxu Dios Benne' Wenná Bea,
na' dxelezrize xúgute̱ bénneache lau Le̱'.
Dxe'e̱ lataj blau chee̱' da zua na láwela querubín ca',
na' dxezrú' lu xe̱zr la xu.
Szrente̱ naca Xránadxu lu xi'a Sión.
Naque̱' szren lawe' xúgute̱ cue' xe̱zr la xu ca'.
Le güe lá'ana La Xránadxu da naca na szren,
ne da dxal-la' zrébedxu.
¡Lá'azxa naca Le̱'!
Lue', Wenná Bea szrente̱, nazrí'inu' da naca xrlátaje.
Nuzúa chachu' da naca li lazre'.
Ba nunu' da naca xrlátaje, ne da naca li lazre'
ládujla zri'ine zre sua Jacob.
Le gucá'ana szren Xránadxu Dios.
Le guzú zríbele lau Le̱' naga dxe'e̱.
¡Lá'azxa naca Le̱'!
Moisés, ne Aarón gulaque̱' bxruze chee̱' ca'.
Samuel guque̱' tu benne' bchálajle̱ne̱' Le̱'.
Gulenné̱' Xránadxu Dios, na' Le̱' beche̱be̱'.
Tu lu beuj bza bchálajle̱ne̱' benne' ca'.
Buluzúe̱' dizra' da gunná bé'ene̱',
ne da ca' bdxixruj be'ene̱' le̱'.
 
Xránantu' Dios, beche̱bu' lau benne' ca'.
Blé'enu' le̱' nacu' Dios, dxunite lau' chee̱ bénneache,
lácala dxudéu' le̱' xel-la' zi' ne̱ chee̱ dul-la da zaj nabague̱'.
Le gucá'ana szren Xránadxu Dios.
Le guzú zríbele lau Le̱' lu xi'a lá'azxa chee̱',
lawe' da lá'azxa naca Xránadxu Dios.