1 Xrana' Dios, bene da dxenaba' lau',

ne bze̱ naga da dxuláwizra' Lue'.

2 Quebe gucache lau' lawa' neda', lawe' da lu da ste̱be zua'.

Bze̱ naga neda', ne beché̱beche chia' gate dxuláwizra' Lue'.

3 Naca xel-la' nabán chia' ca zren chee̱ xi' da dxexenítete̱.

Xu'u da la lu zrita chia' ca tu xi' da dxálale̱'e̱ na.

4 Dxedú lazra', ne naca lázrdawa' ca tu xixre' da dxecuade,

na' québedxa dxenná na gudagu xeta.

5 Lawe' da dxebezre wé̱'le̱'a ba nazrítale̱'a.

6 Naca' ca tu situgún dxedaba' tu lu xe̱zr la xu bizre,

ne ca tu bzriu zríaba' lawe' tu xu'u ze la'a.

7 Dxíchaja' bchigala, ne naca' ca tu bxinne zríaba' túzeba'

8 Tu zra tu zra tu dxulucháchale̱zqueze benne'

Benne' ca' dxelecuídene̱' neda' dxuluchínene̱' la' neda'

9 Lu waláz chee̱ xeta dxawa' de,

na' nisa dxebezra' dxechixre na da dxé'aja'.

10 Caní dxaca chia' lawe' da dxezra'u neda',

Guca'u neda', na' gudxú'unu' neda'.

11 Naca xel-la' nabán chia' ca tu zrul-la da dxedeze,

na' naca' ca tu xixre' da ba nabizre.

12 Lue', Xrana' Dios, tu chí'izqueze zu',

na' cheajlesá lazre' xúgute̱ cuen bénneache Lau'.

13 Chasu', ne xexache lazru' benne' zaj zre̱'e̱ xe̱zre Sión,

lawe' da ba bzrin zra xexache lazru' benne' ca'.

14 Netu', we̱n zrin chiu', nazrí'intu' xiaj ca' chee̱ xe̱zre na'.

Dxéquentu' zi' lawe' da ba nabía xi na.

15 Nadxa benne' xe̱zr la xu ca' xelezrebe̱' lau Lue', Xran.

Xelezrebe xúgute̱ benne' wenná bea chee̱ xe̱zr la xu nigá

16 gate ba bechisu' xe̱zre Sión, Xran,

ne xelelé'equezne̱' ca naca da xabáa chee̱ na,

17 gate na' guzé̱ nagu' da dxelenaba benne' ca' guleaj xíchaju',

ne québedxa guzú' chalá'ala da dxelata' xuene̱' Lue'.

18 Xuaj da nigá chee̱ xululaba benne' ca' za zá'aca,

na' benne' ca' za xelalaj xelúe lá'ane̱' Xránadxu Dios.

19 Naga zua Xránadxu xabáa gunné̱'e̱.

Naga zue̱' xabáa blé'ene̱' lu xe̱zr la xu nigá.

20 Dxelé'ene̱' benne̱' dxelebezre xache', benne' zaj xu'e̱

na' gusane̱' benne' ca' ba zaj nachugue̱' chee̱' xelatie̱'.

21 Xuluzenne̱' benne' zaj zre̱'e̱ xe̱zre Sión ca szren naca

chee̱ xelúe lá'ane̱' Le̱' lu xe̱zre Jerusalén,

22 gate xelezraga bénneache chee̱ xúgute̱ xe̱zre, ne xúgute̱ cue'

chee̱ xulucá'ana szrene̱' Xránadxu Dios.

23 Xránadxu Dios be̱ne̱' gute ni'a na'a gate ne naca' cuide'.

Xeláteze ca be̱tie̱' neda'.

24 Nadxa gunnía': Dios chia', quebe gutiu' neda',

Lue' tu chí'izqueze zu'.

25 Nédxudaute̱ Lue' bzu' xe̱zr la xu nigá, na' nen na'u

26 Xelebía xi' da ca', san tu zúazquezu' Lue'.

Welexru xúgute̱ da ca' ca tu ladxe'.

Ca dxuchadxu zra lánadxu tuzruj, ca' gucha'u da ca',

27 Túzqueze ca nacu' Lue',

ne québequeze te chiu' Lue'.

28 Zrí'inentu' netu', we̱n zrin chiu', xelezrabe' chawe',

na' guzé̱ chúchuquezu' zri'ine zre súantu' lau Lue'.