108
Ba zúate̱queze lázrdawa', Dios,
chee̱ gúl-laqueza' da güe lá'ana' Lue'.
Da nigá dxugú'u na neda' lu da ba neza.
 
Bebán lazre', bénne'du xu'a, na' le xebán lázrele,
le'e dxínnele da dxúl-lale̱nle, ne da con zríadi'i na du.
Che zílala cheajsá'queza'.
 
Güe lá'anaqueza' Lue' ládujla bénneache chiu', Xran.
Gúl-laqueza' chiu' lau benne' dute̱ xe̱zr la xu,
lawe' da naca xel-la' dxexache lazre' chiu' zrendxa ca xabáa,
na' da li chiu' naca na zrendxa ca beuj bza ca'.
Xegá'ana szrénquezu' xabáa, Dios.
Xel-la' szren chiu' sua na lawe' dute̱ xe̱zr la xu.
Chee̱ xelelá benne' ca' nazrí'iqueznu' Lue',
bselá le̱' dute̱ xel-la' waca chiu', ne bene chia'.
 
Lu lataj lá'azxa chee̱' gunná Dios: “Wabéquezda' neda'.
Gunna' late weaj chee̱le xe̱zr la xu chee̱ benne' Siquem ca',
ne gudixra' chee̱le xe̱zr la xu de̱ cuite xe̱gu Sucot.
Chia' naca xe̱zr la xu Galaad,
ne chia' naca xe̱zr la xu chee̱ zri'ine zre sua Manasés.
Xe̱zr la xu chee̱ zri'ine zre sua Efraín naca na ca tu
da napa chi'i na xíchaja'.
Xe̱zr la xu chee̱ zri'ine zre sua Judá naca na naga dxenná be'a.
Xe̱zr la xu chee̱ benne' Moab naca na ca tu zriga'
da xuzru nisa guná'a,
na' lu xe̱zr la xu chee̱ benne' Edom chu'una' zrela' gula.
Si'a ba neza xe̱zr la xu chee̱ benne' Filistea.”
 
10 ¿Nuzra che̱' neda' chee̱ chu'a xe̱zre da naxechaj ze'e sibe?
¿Nuzra che̱' neda' chee̱ guzétaja' benne' Edom ca'?
11 ¿Quegá Lue' na' che̱'u neda', Dios.
Nacu' Bénnea' bzua netu' chalá'ala,
ne quebe guxéajle̱nu' benne' chee̱ntu' ca', benne' dxjaque̱'
wedil-la, Dios?
12 Gúcale̱ netu' chee̱ séquentu' tíl-lale̱ntu' benne' ca'
dxeledíl-lale̱ne̱' netu',
lawe' da naca dácheze xelácale̱ bénneache netu'.
13 Tu zren nen Dios gundxu tu da zrente̱,
na' Le̱' gulague̱' benne' ca' dxeledil-lale̱ne̱' dxi'u.