115
Quegá netu', Xran.
Quegá cuintu', san Lué'queze dxal-la' xucá'ana szrentu'
ne̱ chee̱ xel-la' zri'i lazre' chiu', ne xel-la' li lazre' chiu'.
¿Bizr chee̱ na' dxun na ba xen xuluche̱be bénneache netu':
“Gazra zua Dios chee̱le?”
 
Dios chee̱dxu zue̱' xabáa.
Dxune̱' ca da dxaca lázrequeze̱'.
Dios ca' chee̱ benne' ca' zaj naca na bedáu' plata,
ne bedáu' oro, da nun ni'a na' bénneache.
Zaj zua dxu'a na, san quebe dxelenné̱ na.
Zaj zua xiaj lau na, san quebe dxelelé'e na.
Zaj zua naga na, san quebe dxelén na.
Zaj zua zrina na, san quebe dxelelé'e na.
Zaj zua na' na, san quebe bi dxelecá'a na.
Zaj zua ni'a na, san quebe dxeledá na.
Quebe dxedxuaj chi'i na lba na.
Ca zaj naca na, zaj naca benne' ca' zaj nune̱' na,
ne benne' ca' dxuluxrén lazre̱' na.
Le guxrén lazre' Xránadxu, le'e, benne' Israel ca'.
Le̱' dxácale̱ne̱' le'e, ne dxuxúe̱' le'e.
10 Le guxrén lazre' Xránadxu, le'e, bxruze chee̱ Dios,
nácale zri'ine zre sua Aarón.
Le̱' dxácale̱ne̱' le'e, ne dxuxúe̱' le'e.
11 Le guxrén lazre' Xránadxu, le'e dxucá'ana szrenle Le̱'.
Le̱' dxácale̱ne̱' le'e, ne dxuxúe̱' le'e.
12 Xránadxu dxajsá lazre̱' dxi'u, na' gune̱' dxi'u da chawe'.
Gune̱' da chawe' chee̱ benne' Israel ca'.
Gune̱' da chawe' chee̱ bxruze chee̱', zri'ine zre sua Aarón.
13 Gune̱' da chawe' chee̱ xúgute̱ benne' dxelape̱' Le̱' ba lá'ana,
benne' blau ca', ne benne' quebe zaj naque̱' blau.
14 Gun Xránadxu chan zri'inu' ca',
ne chan zri'ine bi biu chiu' ca'.
15 Gun Xránadxu da chawe' chiu'.
Naque̱' Bénnea' be̱n xabáa, ne xe̱zr la xu.
16 Chee̱ tuze Xránadxu naca xabáa,
san bnézruje̱' bénneache xe̱zr la xu.
17 Benne' zaj nate quebe gaca xelúe lá'ane̱' Xránadxu,
ne quebe gaca benne' ca' zaj zue̱' lu xe̱dxu ba.
18 Dxi'u, benne' ban, güe lá'anadxu Xránadxu,
na'a zra, ne chadía chacanna.
 
¡Le güe lá'ana Xránadxu!