135
¡Le güe lá'ana La Xránadxu Dios!
¡Le güe lá'ana Le̱', le'e, we̱n zrin chee̱ Xránadxu,
le'e zrale xu'u lizre Xránadxu Dios,
lu chale'aj chee̱ xu'u naga zúaqueze Dios!
¡Le güe lá'ana Xránadxu lawe' da naque̱' xrlátaje!
¡Le gul-la da güe lá'anale La Le̱', lawe' da naque̱' zri'i lazre'!
Xránadxu Dios ba guqué̱'e̱ zri'ine zre sua Jacob.
Guqué̱'e̱ zri'ine zre sua Israel chee̱ xelaque̱' bénneache chee̱'.
Nézquezdxu szrente̱ naca Xránadxu Dios.
Xránadxu naque̱' szrendxa ca xúgute̱ dios chee̱ benne' zitu' ca'.
Xúgute̱ da dxaca lazre' Xránadxu gune̱',
dxune̱' na zran xabáa, ne lu xe̱zr la xu,
ne lu nísadau', ne lu da situj chee̱ nísadau' ca'.
Dxune̱' zá'aca beuj dapa saca chee̱ xe̱zr la xu.
Dxune̱' dxelepe xesa guziu' gate dxaca xiuj.
Dxune̱' dxaca be' gátete̱ze.
Be̱ne̱' gulate bi biu nedxu chee̱ benne' Egipto ca'.
Gulate bi biu nedxu chee̱ bénneache,
ne béadu ca' chee̱ be̱ xixre' chee̱' ca'.
Be̱ne̱' xel-la' waca ca' da za xabáa, ne da zrente̱ ca'
da be̱ne̱' lu xe̱zr la xu chee̱ benne' Egipto ca',
da ca' be̱n Dios da guca chee̱ Faraón,
ne chee̱ xúgute̱ we̱n zrin chee̱ Faraón na'.
10 Bzria xi'e̱ bénneache zánete̱ cue' xe̱zr la xu ca',
ne be̱tie̱' benne' wenná bea ca',
benne' zaj nápale̱'e̱ xel-la' dxelenná bea.
11 Be̱tie̱' Sehón, wenná bea chee̱ benne' amorreo ca',
ne Og, wenná bea chee̱ benne' Basán ca',
ne xúgute̱ benne' wenná bea chee̱ benne' Canaán ca'.
12 Bequé̱'e̱ xe̱zr la xu nigá lu na' benne' wenná bea ca',
na' bnézruje̱' na lu na' bénneache chee̱', benne' Israel ca'.
 
13 Xrana' Dios, chadía chacanna zua lau' Lue'.
Tu cheajlesá lázrezqueze bénneache Lue'.
 
14 Xránadxu Dios guchi'e̱ chee̱ bénneache chee̱',
ne xexache lazre̱' chee̱dxu dxi'u, we̱n zrin chee̱'.
15 Bedau' xia xaga ca' chee̱ benne' xe̱zr la xu ca'
zaj naca na oro, ne plata.
Zaj naca na da belún bénneache.
16 Zaj zua dxu'a na san quebe dxelenné̱ na.
Zaj zua lau na san quebe dxelelé'e na.
17 Zaj zua naga na san quebe dxelén na, ne quebe
dxelecá'a na be'.
18 Benne' ca' dxelune̱' na zaj nácaqueze̱' ca lé̱queze na,
ne caní zaj naca xúgute̱ benne' dxuluxrén lazre̱' na.
 
19 Le'e, benne' xrtía Israel, le güe lá'ana Xránadxu Dios.
Le'e, benne' xrtia Aarón, le güe lá'ana Xránadxu Dios.
20 Le'e, benne' xrtia Leví, le güe lá'ana Xránadxu Dios.
Le'e, núlale dxezrébele Xránadxu Dios, le güe lá'ana
Xránadxu Dios.
21 Le'e, zrale xe̱zre Sión, le güe lá'ana Xránadxu Dios,
Bénnea' zúaqueze̱' xe̱zre Jerusalén.
 
¡Gaca ba lá'azxa Xránadxu Dios!