1 Xrana' Dios, bselá neda' lu na' benne' ca' dxelune̱' da cale̱la.

Bxue neda' chee̱ quebe bi xelún benne' xichaj zra'a ca'

2 Benne' caní dxuluwía lazre̱' da cale̱la ca' da xelune̱'.

Tu zra tu zra dxulutíl-lale̱ne̱' bénneache.

3 Da dxelenné̱' naca na ca lazxa be̱la' da zaj nalále̱'e̱.

Xrtizra' benne' ca' zaj naca na ca nisa snia chee̱ be̱la'.

4 Xrana' Dios, bxue neda' chee̱ quebe bi xelún benne' ca'

Bselá neda' lu na' benne' xichaj zra'a ca',

benne' ca' dxelune̱' ba xuzre cheajcházia'.

5 Benne' ca' dxulucá'ana szren cuine̱' zaj nabeque̱'

Ba zaj nuzale̱' xralaj dxu'a neza.

Ba zaj nabeque̱' da ca' xele̱l-la na neda'.

6 Gucha' Xrana' Dios: Lue' nacu' Dios chia'.

Xrana' Dios, bene chi'a dxuláwizra' Lue'.

7 Xrana' Dios, nacu' weselá chia'.

Lue' bcu'uju' xíchaja' lu zra guca wedil-la.

8 Xran, quebe gu'u lataj gaca ca da dxelezá lazre' benne' ca'

Quebe gu'u lataj chepe ban da dxuluwía lazre̱' xelune̱',

chee̱ quebe xulucá'ana szren cuine̱'.

9 Zaj naxechaj benne' ca' dxelune̱' da cale̱la neda'.

Be̱n gaca chee̱ benne' ca' ca de' da dxelaca lazre̱' gaca

10 Be̱n xexruj xi' lawe' benne' ca'.

Bzra benne' ca' lu xi'.

Bzra benne' ca' lu da sítujle̱'e̱ naga cabátadxa xelexedxúaje̱'.

11 Quebe gu'u lataj xegá'ana lu xe̱zr la xu bénnea' dxenné̱'

Be̱n gaca da cale̱la chee̱ benne' xichaj zra'a, da guzría xi na le̱'.

12 Nezda' xeche̱be Xránadxu Dios waláz chee̱ benne' baxache',

ne guzé̱ chache̱' da zaj xu'u lu na' benne' xache' ca'.

13 Da líqueze benne' xrlátaje ca' xelúe lá'ane̱' Lau' Lue',

na' benne' li lazre' ca' xelezúe̱' naga zu' Lue'.