IGI HIBRU EMO ENO GAEWA
Igi ewiya Yuda emo ge nigao aeno gaewa ara. Arata emo awe mene gaeni, awiya name oko gosinenane. Eeno gaewa ara: Tairo nao seka Yesu mene puro buna amimene tairo nao matu Mose mene tauna awiya daigatiniya. Yesu mene sao tauyao ge Mose mene gaena awiya diungno besugainu aung yena. Noeno okowata, Yesu nung Tuwa Bayaura Mani me. Nung porofete aune angelo aune Mose aune dema daigatinasani Tuwa baina yero noiya. Nupema nung aung yao ine teng oko. Yuda emora pirisa dubu awiya nema mamagayero nowa. Arata Yesu mene zo nao gege noiya. Nung pirisa baina naname mene pasena naname disero baingtinu aung-kamore yena ara. Gabu 11 mene tumo diyaora susuwa keregatiniya.
1
Yesu mene Tuwa Bayaura ge name eno keregairo tugata yena.
Tuwa Bayau mene gitau porofete eno ge benaung gitita nagibo susuwa giti awiya tugata naunu awong ewowo naname eno tugata nasani nauwa. Ora aung yaora be yeme eune zo nung Mani nuna senu name eno ge tugata yena. Mani nung nona apakana auna maung yero naise sena. Gitau Maung mene senu Mani amimene nona apakana yero aung yena. Mani mene asisi ine yero Tuwa Bayaura simao waegaore awiya naname-una pugatinoiya. Nung buro apakana Maung mene noiya deka ayero noiya, arare ge putoungne nuna mene nona apakana soganoi mitowa. Nune pasena disao buro yero besugairo aune witi uritira yero Tuwa Bayau putoungne auna wawong mera atu adungno mitoiya ara.
Angelo awong wosao, arata Tuwa Bayaura Mani nung witao.
Yazo bowire nuna mene angelora yazo bowire daigatinoiya, deka ayero nune angelo apakana daigatinoiya. Tuwa Bayau mene angelo zo eno eyero oko sena,
Ning awiya Mani nana. Na yeme Maung nina nena.
Nupema angelo zo eno eyero oko sena,
Na Maung nuna yero narinena.
Nung Mani nana yero naise.
Tuwa Bayau mene ge awiya angelo zo eno oko sena. Nung Mani nuna eno sena. Nupema nung muwo Mani nuna tawingna iyengtari sero ge eyero senu gaewa,
Tuwa Bayaura angelo dubu awong yazo nuna de ika naese.
Angelo awong eno eyero sao ara,
Nung angelo dubu nuna eno sinoi benaung nunae kapetegairo bisi ine yero nowa. Nung soumani dubu nuna eno sinoi benaung kapetegairo iyao ine yero nowa.
Ora Mani nuna eno eyero sero gaewa,
O Tuwa Bayau, Tuwa yero nao nina awiya tau-tataware yero mitao gege mitariniya. Ning dubu nina iwaing-kawaing diya nosa. Ning tani iwawaing yari ara tapunosa. A nasani tani meko yao awang yero nosa. Arare Tuwa, awiya Tuwa nina, nune ning gao nasani yawa yawa bainakama nina-una atu kasa yaise ning kara puro uweri ning eno suwena. Awiya otao mani nina yazore aeno suwaese sao awiya daigati nasani bainane ning eno suwena.
10 Ge zo nung eno eyero sero gaewa,
O Tuwa, ning tawing yasa. Nupema uriti awiya wawong nina mene yasa.
11 Arare uritire tawingne sisigarineyato, arata nine mene zo nao gege narinesa. Taung wori aso yero nowa deka ayero uritire tawingne aso yarineyato.
12 Taung wori aso ine yayato nine wiwing yarinesa. Uritire tawingne ewe yarineyato, arata nine mene zo ewe oko yarinesa. Nosa deka ayero narinesa. Nao nina oko aung yariniya.
13 Tuwa Bayau mene angelo zo eno eyero oko sena,
Ning buro wawong me nana-una atu adungno mitasa na iwo dubu nina awiya benaung nina-una pugana te paka yero isi yase.
Ge awiya angelo zo eno oko sena. Nung Mani nuna eno sena. 14 Angelo awong nona noiye? Awong Tuwa Bayaura soumani dubu gege. Emo bauno Tuwa Bayau mene sorero pumari sena awiya soremaese iyengtitinoiya ara.