Olwaandiko lwo kubaanza lwa
Yohana
Obweébeembezi
Enyaandiko isatu za Yohana tizikusoomboola izíina lyo omwaandiki waázo, náho neesana nko oóti ni Yohana, omwaandiki we Empola Nzima ya Yohana ne echitabu cho Okusuululilwa, niwe ogwo akaandika enyaandiko ezi. Yohana akaandika enyaandiko ezi obuchilo naatuúla Efeso omu chaalo cha Asia. Ebilo ebi echaalo echo nicheétwa Buturuki. Omu nyaandiko ezi, omwaandiki kaalikugaamba “íichwe,” naayegaámba weényini hamo ne entumwa bazeenzíbe.
Obuchilo Yohana akaandika enyaandiko ezi, akaba yaákokweele. Titwíina bweetegeeleza habwo obwo obuchilo bwo kwaandika, náho ekaba ahagáti yo omwáaka 85–95 yaáhiingwiile ya Kristu kuzaalwa.
Omu nyaandiko ezi isatu omwaandiki naayaandikila Abakristu áabo bakaba nibabugana omu makelezia bunaanka bunaanka omu byaalo bya Asia. Yohana akabéenda bwooli no omu nyaandiko ezi naabeéta “abáana baanze” (1 Yohana 2:1).
Omu lwaandiko lwa mbele, Yohana naayaandikila Abakristu abone kubaha obuhanuuzi habwo obwo bulami bwe Echikristu. Káandi naasohoza ebikaamo habwo ago meégeso ge ebisuba. Hakaba haliho abeégesa bunaanka áabo bakaba baálekileho amakelezia gáabo, baaba nibazoongoloka omu chaalo echo no kusuugaanisa ameégeso ge ebisuba. Obusáago bwa ago, Yohana naakomeenteleza amazima go okwiikiliza ge Echikristu, abone kubagumisa no kubasemeleza abaantu omu kwiikiliza. Omu meégeso goómwe naahoóyela habwo kutúula ne ngoonzi, kweéganyila, kusiimbahalila kusíinga ebiheno, kutúula obulami óobwo obulikumusemeleza Múungu, na habwo obwo bulami bwa buchiile.
1
Yeézu niwe echigaambo cho obulami
1 Nitubamanyisa empola ze Echigaambo cho obulami, éecho echaabeele chiliho kuluga ha bubaandizo.1:1 Osome Okubaanza 1:1; Yohana 1:1-3. Íichwe tukachihulila, tukachibona ha méeso géetu nyini, tukachileeba no kuchikwaataho ne engalo zéetu. 2 Obulami obwo bukeésulukiiza, neechwe twaábubona. Óobu nitukumuucha no kulaanga amazima habwo obulami bwo obucha no obuchiile, óobwo obwaabeele buli hali Isíichwe Múungu, náho óobu bwaásuulwiilwe hali íichwe.1:2 Osome Yohana 1:14. 3 Nitubalaangaanila neemwe nyini empola habwa Yeézu óogwo twaabwéene no kumuhuliiliza, mubóne kwiikala omu búmo neechwe omu kwiikiliza. Obúmo óobwo twiina buli hamo ne Isíichwe Múungu, no Omutábani Yeézu Kristu. 4 Nitubaandikila ebi, tubone neechwe chwéena kuhikiilizwa amanulilwa géetu.
Kutúula omu mwaanga
5 Mbwéenu, ezi niyo empola éezo tuhuliile kuluga hali Yeézu Kristu, niyo tulikubalaanga nka nikwo, Múungu niwe omwaanga,*1:5 Omwaanga: Aháandi nibagaámba ne echeengéezi. náwe tazila nsiimbaazi yoóna yóona omuli weényini. 6 Kábilaaba nitugaámba nka nikwo twiine obúmo náze, kunu nituzeendelela kutúula omu nsiimbaazi, nituba twaágaamba ebisuba, na káandi titukukola amazima. 7 Náho, kábilaaba nitutuúla omu mwaanga, nka Múungu okwo ali omu mwaanga, aho niho tulikuba no obúmo íichwe omuli íichwe. Káandi enságama yo Omutábani Yeézu, neetweéza ebiheno byéetu byóona.
8 Kábilaaba nitugaámba nka nikwo íichwe titwíina ebiheno byoóna byóona, nitweebeéha íichwe nyini, na amazima tigalimo omuli íichwe. 9 Náho, keélaaba nitweegaámba butúnu ebiheno byéetu, Múungu naatuganyila ebiheno byéetu no kutwéeza obubi bwóona, ha kuba weényini no omweésigwa no owa amazima. 10 Keélaaba nitugaámba nka nikwo titukakozile ebiheno, nitumukola Múungu kuba omubéehi, káandi echigaambo choómwe tichilimo omuli íichwe.