Olwaandiko lwo kubaanza lwa Paulo aha
Bateesalonike
Obweébeembezi
Olwaandiko olu no lwa Paulo, entumwa. Akaandika olwaandiko olu ali hamo na Silwaano na Timoteo. Akaandika habwa abeekiliza áabo bakaba bali omu iboma lya Teesalonike. Paulo akaba ali entumwa óogwo akaba naayolekeelela Empola Nzima habwa Yeézu Kristu, ha Bayahudi na ha baantu abo Abanyamahaánga.
Paulo na bazeenzíbe, kabaahikile omu nsi ya Bugiriki, yaáyolekeelela no kugumisa ekelezia omu iboma likúlu lyo omuli Makedonia. Omu iboma éelyo likaba nilyeétwa Teesalonike (Amakúlu ge Entumwa 17). Abaantu be emitulaanilo ezilekéene lekéene bakeekililizana ne empola zoómwe. Paulo kayaagumisize ekelezia ya aho Teesalonike, ebyaágalazo biháango byaábaanza kubaho ha beekiliza. Okwaágalazwa okwo kukaba nikukolwa na Abayahudi. Paulo yaálamula kulugáho chihahwe. Kayaaluguleyo okwo, no kulemwa kusubayo káandi, yaamusiindikáyo muzeenzíwe óogwo akaba ayétwa Timoteo, azeénde Teesalonike kubatiimbya emiganya abeekiliza bo okwo. Paulo weényini talaziileyo okwo, akazeendelela kwoólekeelela amahaánga agáandi. Omwáanya muche kagwaahwéele, Timoteo yaásuba hali Paulo, yaámutwáalila empola habwo okwiikiliza na akeekalile ka Abateesalonike. Paulo káyaahuliile empola ezo, yaánulilwa bwooli, yaabasiindikilayo olwaandiko lwo kubasiingiza, no kuboóngela ameégeso agáandi. Akabagumya emiganya babone kuzeendelela kutúula akeekalile áako kalikumugomookela Múungu. Empola ezo, noozisaánga omu lwaandiko lwo okubaanza lwa Paulo aha Bateesalonike. Akaandika habwo okugima habwe ebyaágalalo, na habwo kuba ne ensoonga nka nikwo, Yeézu alaásuba na abeekiliza balaátúula hamo náze. Paulo akagaamba echigaambo kutegeza, ha kuba ne ensoonga nka nikwo, Yeézu alaásuba.
1
Empola
1 Olwaandiko olu nitubaandikila íinye Paulo, hamo na Silwaano*1:1 Silwaano: Omu chitabu che Amakúlu ge Entumwa naayétwa Sila. na Timoteo. Nitubaandikila íimwe áabo muli omu kelezia yo omu iboma lya Teesalonike, áabo muli embága ya abaantu áabo mumwiikiliize Múungu Isíichwe no Omukáma Yeézu Kristu.
Embabazi no obuhóolo bibe hamo neemwe.
Okusiima habwo obweésige bwa Abateesalonike
2 Nitumusiima Múungu buchiile ha bwéenyu mwéena, na nitubasabila obutóosa. 3 Katulikubasabila hali Isíichwe Múungu, nitwiizuka obutóosa omu méeso goómwe omulimo óogwo mulikukola habwo okwiikiliza. Nitwiizuka echífu chéenyu éecho chilikuluga aha ngoonzi zéenyu, káandi okweégumya kwéenyu okulikulugiilila omu kutegeza óokwo twiina ha kusuba kwo Mukáma wéetu Yeézu Kristu.
4 Íimwe abeekiliza bazeenzi béetu, áabo muli enfula za Múungu, nitusoomboókelwa nkokwo mutooziibwe na Múungu kuba abaantu boómwe. 5 Nitusoomboókelwa tútyo, habwo kuba obuchilo twaayolekeeliile owéenyu Empola Nzima, titulayolekeeliile ha magaambo kanaku goónka. Náho tukoólekeelela ha buhicha na ha Mwooyo Mutakatíifu, twiina ne echihika nka nikwo empola ezo ne eza amazima. Íimwe nimusoomboókelwa óokwo twaabele tuli hamo neemwe, tubone kubahwéela. 6 Nóobwo mukaágalazibwa bwooli habwo okwiikiliza kwéenyu, mukeenaankula empola ezo ha manulilwa áago agalikuluga ha Mwooyo Mutakatíifu. Nka nikwo mwaákozile mútyo, mukasubiiliza omususaniso gwéetu no omususaniso gwo Omukáma Yeézu. 7 Niho omuli ago, mubeele emanyiso nduunzi aha beekiliza bóona abali Makedonia na Akaya. 8 Kuluga omuli íimwe, empola habwo Omukáma Yeézu ehuliílwe. Tikwo kwoónka ha baantu bo omuli Makedonia na abo omuli Akaya, náho okwiikiliza kwéenyu hali Múungu kukumuukile hóona. Ha bwéecho titukweéyagalaza kugaamba choóna chóona. 9 Abaantu boónyini nibasoomboola habwa akazeendele áako mwaátwiinaánkwiile obuchilo tweezile hali íimwe. Nibateekelela nka nikwo mwaabilekile ebisusano byáanyu no kumusubila Múungu, mubóne kumuheéleza weényini omulame niwe owa amazima, 10 no kumuliindilila Yeézu Omutábani kuluga omu igulu. Weényini akazoolwa na Múungu, káandi niwe alikutuchuúngula omu chihulumuko cha Múungu echilikwiiza.
*1:1 1:1 Silwaano: Omu chitabu che Amakúlu ge Entumwa naayétwa Sila.