Olwaandiko lwa kábili lwa
Yohana
Obweébeembezi
Omu lwaandiko lwa kábili, Yohana naazeendelela kubatiimbya emiganya abeekiliza, babone kutúula omu kweétegeeleza amazima ne engoonzi. Káandi naazeendelela kubahana bataákweékomya na abeégesa be ebisuba. Naakomeenteleza nka nikwo abeekiliza babe abeétegeelezi na balame omu kwiikiliza kwa amazima.
1
Empola
1 Íinye omunyaampala we ekelezia, niinkwaandikila íiwe munyaányeenye óogwo otoziibwe na Múungu, hamo na abáana baawe.*1:1 Munyaányeenye óogwo otoziibwe na Múungu, hamo na abáana baawe: Yohana naagaámba habwe ekelezia bunaanka hamo na abeekiliza baáyo. Áabo nnyeénda omu mazima, na ti íinye nyeénka, náho na abáandi bóona áabo abalikusoombookelwa ago mazima. 2 Nitubeénda habwo kuba íichwe neemwe nitusoomboókelwa ago mazima agali omuli íichwe, káandi nágo nigazeendelela kwiikala omuli íichwe obucha no obuchiile.
3 Mbwéenu, embabazi, echiganyizi no obuhóolo kuluga hali Isíichwe Múungu no Omutábani Yeézu Kristu, nibiba hamo neechwe omu mazima ne engoonzi.
Kweendana nikwo okugomookela ebilagilo bya Múungu
4 Nkanulilwa bwooli kubona nka nikwo omu baana baawe balimo abalikweékomya amazima, nka nikwo Isíichwe Múungu yaátulagiile. 5 No óobu, munyaányeenye, omu lwaandiko olu, niinkusába nka nikwo oyékomye echilagilo cho kweendana. Echilagilo echi ti chisha, náho nicho echo nyini chi twaabele twiinácho kulugiilila aha bubaandizo, nka nikwo tweendane íichwe omuli íichwe nyini.1:5 Osome Yohana 13:34. 6 No kweendana nikwo oku, tutuúle omu kugomookela ebilagilo bya Múungu. Echi nicho echilagilo chi mwaáhuliile kulugiilila ha bubaandizo, mutuúle ha kweendana.
Mutaákubaangisa ababéehi
7 Niimbagaambila iíntyo, ha kuba ababéehi béenzi balekile amazima beésuululukiize omu nsi, tibakwiikiliza nka nikwo Yeézu Kristu akeeza omu nsi yaaba omuuntu mále nibahabisa abaantu abáandi bityo.1:7 Osome 1 Yohana 4:2-3. Omuuntu weéna wéena óogwo alikugaamba aátyo, ogwo niwe omubéehi, na káandi no omuhakanisa wa Kristu. 8 Mbwéenu, mweétegeeleze, kuba ebikolwa byáanyu bitaákwiiza kufwa busa, náho mubóne kwiinaankula empeéla yáanyu1:8 Osome 1 Abakorinto 3:10-15. ekobile kuluga ahali Múungu. 9 Weéna wéena óogwo atakuzeendelela obuteékomya ameégeso ga Kristu, káandi akoongelaho éebye, ogwo tayina Múungu. Náho, óogwo alikuzeendelela no kweékomya ameégeso ga Kristu, ogwo ayináze Isíichwe Múungu hamo no Omutábani Yeézu Kristu. 10 Kábilaaba omuuntu naayiza hali íimwe óogwo atakweégesa ago, mutamwaángisa omu maka gáanyu, na káandi mutamwaángalucha. 11 Omuuntu ogwo alaamwaángalucha, ogwo naába yaákobana náze omu bikolwa byo obuzilwa éebyo alikukola.
Ebigaambo byo kulaga
12 Nnyina amagaambo méenzi, náho tiínkweenda kugaándika ago góona aha lupapula no obwíino. Náho niintegeza kwiiza kubayeélela no kuhooya neemwe butúnu, twéena tubone kunulilwa bwooli.
13 Abáana ba munyaányoko ogwo ayaatooziibwe na Múungu,†1:13 Abáana ba munyaányoko ogwo ayaatooziibwe na Múungu: Yohana naahoóyela ekelezia hamo na abeekiliza baáyo áaho yaabele aáli. nibakwaángalucha.
*1:1 1:1 Munyaányeenye óogwo otoziibwe na Múungu, hamo na abáana baawe: Yohana naagaámba habwe ekelezia bunaanka hamo na abeekiliza baáyo.
1:5 1:5 Osome Yohana 13:34.
1:7 1:7 Osome 1 Yohana 4:2-3.
1:8 1:8 Osome 1 Abakorinto 3:10-15.
†1:13 1:13 Abáana ba munyaányoko ogwo ayaatooziibwe na Múungu: Yohana naahoóyela ekelezia hamo na abeekiliza baáyo áaho yaabele aáli.