Olwaandiko lwa Paulo aha
Bakolosai
Obweébeembezi
Kolosai gukaba guli omuzihwa muche omuli Asia. Ebilo ebi Kolosai ne echinogóka che éensi ya Buturuki. Ekaba eli ekilomíita 175 kuluga omuzihwa gwa Efeso áaho Paulo akalaangaana Empola Nzima habwa Yeézu (Amakúlu ge Entumwa 19). Náho Paulo weényini talayegesize Kolosai okwo, náho embága ya abaheémba ba Kolosai ekabaanziswa no omuuntu óogwo akaba naayétwa Epafra.
Obuchilo Paulo akaba ali omu ibóhelo, Epafra akeeza, yaábugana náze, yaámugaambila habwa abeégesa be ebisuba abaabeele nibaagalaza Abakristu. Omu Bakristu bo okwo Kolosai hakaba heena embága ibili, Abakristu ba Abayahudi na abáandi be Echiyunani. Mbwéenu, omuli ezo mbága ibili, bakaba nibeénda kutulaaniza ameégeso ga Yeézu ne edíini záabo za kala.
Abaantu be Echiyahudi áabo bakeegesa ameégeso ge ebisuba, bakaba bali abalikwiikiliza nka nikwo boónyini na abaantu áabo abaatoziibwe na Múungu. Bakaba niboolekeelela nka nikwo no óobu kábilaaba omuuntu akaba ali omuheémba wa Yeézu, taladulize kukuúndilwa na Múungu keélaaba atákasázilwe ikóba lyoómwe no kukulaatila ebilagilo ne emizeenzo za Abayahudi. Abaantu abali Abayunani áabo bakeegesa ameégeso ge ebisuba, bakaba nibeekiliza nka nikwo, habwo kuba Múungu tayina biheno, tiyaákuhikize kuhaanga éensi éezo bakazibona eyina ebiheno. Káandi bakaba nibeekiliza nka nikwo omubili gwo omuuntu gwiina ebiheno, habwe éecho tibyaákukuundileene Yeézu aábe Múungu na káandi atuúle omu nsi nko omuuntu.
Paulo naagalulila ameégeso áago ge ebisuba omu kugaamba amazima habwa Yeézu. Yeézu Kristu ni Múungu, akahaanga éensi, na niwe mukúlu we ebihaángwa byóona. Akatuula omu nsi ali omuuntu, yaáfwa habwe ebiheno béetu abone kutuganyila. Áago akakola Yeézu nigahika butúnu. Omuuntu kaalikumwiíkiliza Yeézu, Múungu naamwiikiliza. Tihaliho chihika cho kusálwa ikóba nali kukulaatila ebilagilo nali emizeenzo yoóna yóona.
Paulo naabagaambila Abakristu nka nikwo, ni lwaampaka baleke entúungwa mbi za kala, no omwáanya gwaáho batuúle obulami obusha óobwo obulikumusemeleza Múungu. Naasoomboola ago omu kweégesa nka nikwo óokwo abaséeza na abakázi, abazéele na abáana, na abahálila na abahíte, balikweendelwa bakoleláne.
1
Empola
1 Olwaandiko olu niimbaandikila íinye Paulo, nkéetwa habwo okweenda kwa Múungu, kuba entumwa ya Kristu Yeézu. Íinye hamo no omwiikiliza muzeenzi wéetu Timoteo, 2 nitubaandikila íimwe abaantu ba Múungu áabo mulikutúula okwo Kolosai, íimwe abeekiliza bazeenzi béetu abeésigwa omu kukwaátana na Kristu.
Embabazi no obuhóolo kuluga ahali Isíichwe Múungu, bibe hamo neemwe.
Okusaba no okusiima habwa Múungu
3 Buli káanya óobu tulikubasabila íimwe, nitumusiima Múungu, Iíse wo Omukáma wéetu Yeézu Kristu, 4 buluga obu twaáhuliile óokwo mulikumwiíkiliza Kristu Yeézu no okweenda abaantu bóona ba Múungu. 5 Okwiikiliza kwéenyu ne engoonzi záanyu nizilugiílila omu kutegeza kwéenyu okwo mwateelilwého ensáho yaábyo okwo omu igulu, ne empola ze ensáho éezo mwaámazile kuhuliza aha chigaambo cha amazima ge Empola Nzima. 6 Empola Nzima ezo ekahika hali íimwe, ekasuungaanwa omu nsi yóona. Neezeendelela hóona kuleételela abaantu kumuhiindukila Múungu, nko óokwo yaabeele hali íimwe kulugiilila echilo echo mwaáhuliile habwe embabazi za Múungu no kusoombookelwa kuzima nka nikwo embabazi yoómwe óokwo éli amazima. 7 Íimwe mukeéyega ezo Empola Nzima kuluga ahali Epafra. Weényini no omuheéleza muzeenzi wéetu engaanzi, na no omweésigwa aha kumukolela Kristu emilimo ha bwéenyu. 8 Na niwe ayaatugaambíile empola ze engoonzi zéenyu éezo mwaáhéelwe no Omwooyo Mutakatíifu.
9 Ha bwéecho, íichwe titukalekile kubasabila, kulugiilila echo chilo chi twaahuliize empola záanyu. Na áago tulikusaba Múungu ni nka nikwo, abáhe okusoombookelwa kuzima engoonzi zoómwe, omu kubaha íimwe engeso zóona no obumanyi óobwo obulikuluga aha Mwooyo Mutakatíifu.*1:9 Kubaha íimwe engeso zóona no obumanyi óobwo obulikuluga aha Mwooyo Mutakatíifu: Ensoonga eéndi ni nka nikwo, kubaha íimwe amasala méenzi no obumanyi bwo mwooyo. 10 Niho mulaahicha kutúula óokwo Omukáma Yeézu alikweenda, no kumunuliza omu magaambo góona. Obulami bwéenyu nibumunuliza habwe emilimo yáanyu mizima, káandi nimuguma kumusoombookelwa Múungu. 11 Nitusaba Múungu aábe naabagumya aha magala goómwe maháango, kuba mubóne kweéyomeleza byóona mutéena kulemwa. Mbwéenu, mube na amanulilwa 12 nimumusiima Isíichwe Múungu, habwo kuba ababonesize kukoba obuhuunguzi bwa abaantu boómwe omu bukáma bwo omwaanga. 13 Atuchuungwiíle kuluga omu magala ge ensiimbaazi, atufulwiile no kututaasha omu bukáma bwo Omutábani engaanzi. 14 Habwo kulabila aha Mutábani woómwe ogwo, tuchuungwiílwe omu kuganyilwa ebiheno byéetu.
Kristu ayina obuzizi habwa byóona
15 Kristu naayoleka butúnu nka nikwo Múungu kwaáli,
nóobwo weényini Múungu takubonwa.
Weényini niwe mukúlu we ebihaángwa byoona,
kanyina wo obuzizi aha bihaángwa byóona.
16 Habwo kuba kulabila hali weényini, ebiintu byóona bikahaangwa,
ebyo ebili omu igulu ne ebili omu nsi,
éebyo tulikubona ne éebyo tutakubibona,
keélaaba abakáma nali abeena ikuzo, abatégeki nali abeena amagala,
byóona bikahaangwa kulabila hali weényini na ha bwoómwe.1:16 Osome Yohana 1:3.
17 Weényini akaba aliho ebiintu byóona bitakahaangilwe,
náwe aha buhicha bwoómwe ebiintu byóona nibizeendelela kubaho.
18 Weényini niwe omútwe gwo omubili, niyo ekelezia.
Weényini niwe entaándikilo yo obulami obulikwiiza obusha,
niwe owa mbele kuzooka kuluga omu bafwiile,
abone kuba mukúlu omu biintu byóona.
19 Ni bityo, habwo kuba ekamusemeleza Múungu,
nka nikwo bu Múungu bwoómwe bwóona bwiikale aha Mutábani.1:19 Osome Abakolosai 2:9.
20 Káandi ekamusemeleza nka nikwo kulabila ahali Kristu,
akwaátanisize ebiintu byóona na weényini,
ebiintu ebili omu nsi omu ne ebili omu igulu.
Akakola aátyo, habwo kuléeta obuhóolo,
kulabila enságama ya Kristu éezo ekaseeseka aha musalaba.
21 Aho enyuma neemwe mukaba muli hala na Múungu. Mukaba muli ababisa boómwe, habwe ebiteékuzo ne entúungwa zéenyu mbi. Náho óobu Múungu abakwaatanisize náwe, 22 aha muháanda gwo omubili gwa Kristu kufwa. Akakola aátyo kuba abaléete omu méeso goómwe muli abatakatíifu, mutéena akatokoozi nali kutuúzilwa. 23 Náho nimweendelwa kuzeendelela kwiikiliza Empola Nzima, kamulaaba muli abalame no kuba na amagala. Muteekiliza kuhiinduka no kwiíluka itegezo elyo mukaheebwa obuchilo óobwo mwaáhuliile Empola Nzima. Empola Nzima ezo nyini éezo eyolekeeliilwe ahali buli muuntu ali aheéfo yo obwíile, na nigwo omulimo, íinye Paulo, nkahaabwa kuba omuheéleza waágwo.
Echihika cha Paulo aha Bakolosai
24 Óobu niimbinulilwa ebyaágalazo éebyo nnyinabyo ha bwéenyu. Aha mubili gwaanze niinhikiíliza ebyaágalazo bya Kristu éebyo ebyaalebile habwo omubili gwoómwe, ensoonga yaáho, ekelezia yoómwe.1:24 Osome 2 Abakorinto 4:10-12; Abafilipi 3:10-11. 25 Kwiingana no óokwo yaáyeenzile, Múungu ankozile íinye kuba omuheéleza woómwe habwe ekelezia, mbone kuboólekeelela íimwe echigaambo choómwe chóona habwo omugaso gwáanyu. 26 Echigaambo echo nigwo omweétegeko gwoómwe óogwo ogukaselekwa kulugiilila kala aha nzaálwa zóona, náho óobu Múungu agusuúlulwiile aha abaantu boómwe.1:26 Osome Abaefeso 3:3-5. 27 Múungu akanulilwa kubasuululila abaantu boómwe omugaso gwo omweétegeko ogwo gwo kusobeza óogwo akakola no óobu ha Abanyamahaánga.†1:27 Abanyamahaánga: Habwo obusoomboozi bwooli osome Obusoomboozi habwa Amagaambo Agagumile. Omweétegeko ogwo ni nka nikwo Kristu ali omuli íimwe, káandi nka nikwo weényini Kristu niwe alikubaha obweésige nka nikwo nimukoba omu ikuzo lyoómwe.
28 Kristu niwe óogwo tulikwoólekeelela buli tulikuhana no kweégesa abaantu bóona omu bwéenze bwóona. Nitumwoolekeelela weényini, tubone kumuléeta buli muuntu omu méeso ga Múungu, baabeele abahikile omu kukwaátana kwáabo na Kristu. 29 Na habwe ensoonga ezo, niinyeyomeleza aha chihika omu kukoza amagala maháango áago Kristu ambonesa.
*1:9 1:9 Kubaha íimwe engeso zóona no obumanyi óobwo obulikuluga aha Mwooyo Mutakatíifu: Ensoonga eéndi ni nka nikwo, kubaha íimwe amasala méenzi no obumanyi bwo mwooyo.
1:16 1:16 Osome Yohana 1:3.
1:19 1:19 Osome Abakolosai 2:9.
1:24 1:24 Osome 2 Abakorinto 4:10-12; Abafilipi 3:10-11.
1:26 1:26 Osome Abaefeso 3:3-5.
†1:27 1:27 Abanyamahaánga: Habwo obusoomboozi bwooli osome Obusoomboozi habwa Amagaambo Agagumile.