Olwaandiko aha
Bahebrania
Obweébeembezi
Omwaandiki wo olwaandiko aha Bahebrania takumanyiika hali íichwe, yaakaáhicha kuba entumwa Paulo, Luka, Barinaba, nali oóndi. Omwaandiki wo olwaandiko olu akaba ali Omukristu óogwo akaba naasoombookelwa bwooli Endagano ya Kala.
Omwaandiki wo olwaandiko óolu akaba naabaandikila Abakristu be Echiyahudi abaabeele nibaagalazibwa na abaantu abaabeele nibalyoógooza okwiikiliza kwáabo. Omwaandiki akaba naabatamo omuganya omu kwiikiliza kwáabo ha muháanda gwo kwoóleka nka nikwo Yeézu Kristu no owa amazima, káandi niwe alikusuulula amakúlu góona go mwa Múungu (1:1-3; 10:19-25; 12:1-13).
Echihika cho omwaandiki chikaba no kwoóleka nka nikwo Yeézu niwe alikwoóleka ikuzo lya Múungu. Káandi naakomeenteleza nka nikwo Kristu ni mukúlu kuchila bamaléeka, abatégeki na abagabe bóona. Aha muháanda gwa Kristu, abaantu bóona nibeenaánkula obuchuúnguzi bwa amazima (9:26-28; 10:10, 14).
1
Múungu ahooyile kulabila aha mutábani
1 Aho kala, Múungu akahooya na besiichwe enkúlu entúlo nyíinzi na aha miháanda míinzi, kulabila aha babáasi. 2 Náho óobu, omu bilo éebi byo omuhélo, Múungu yaágaamba neechwe kulabila ebikolwa byo Mutábani. Kulabila hali weényini Múungu akahaanga éensi, mále Múungu akamutooza ogwo Omutábani abone kuhuungula ebiintu byóona. 3 Weényini no obweengelezi bwi ikuzo lya Múungu mále naayoleka butúnu óokwo Múungu aáli. Naaleételela ebiintu byóona kukwaátana hamo habwe echigaambo choómwe echiina obuhicha. Náwe akeésohoza kuba echitáambo cho kwihilaho abaantu ebiheno, yaázeenda omu igulu, yeékala olubazu lwo obúlyo lwo ogwo ali Mukúlu.
Yeézu ni mukúlu kuchila bamaléeka
4 Múungu akamukola Omutábani aábe mukúlu kuchila bamaléeka, nko óokwo akamuha obutégeki buháango kuchila obwa bamaléeka. 5 Habwo kuba táliho maléeka*1:5 Maléeka: Habwo obusoomboozi bwooli osome Obusoomboozi habwa Amagaambo Agagumile. óogwo Múungu akamugaambila amagaambo áago akamugaambila Yeézu aáti,
“Íiwe níiwe Mutábani waanze,
leélo íinye naaba Iíso.”1:5 Osome Enzina 2:7.
Na Múungu talagaambile habwa maléeka weéna wéena aáti,
“Íinye ndyáaba Iíse,
náwe alyáaba Mutábani waanze.”1:5 Osome 2 Samweeli 7:14.
6 Káandi, obuchilo Múungu akamusiíndika Omutábani nyakámo omukulu omu nsi, akagaamba aáti,
“Bamaléeka bóona ba Múungu bamulámye Omutábani ogwo.”1:6 Osome Okwiizukwa kwe Ebilagilo 32:43.
7 Habwa bamaléeka akagaamba aáti,
“Niinkola bamaléeka baanze kuba omuyaga,†1:7 Omuyaga: Echigaambo echo che Chiyunani chiina ensoonga yo omuyaga no omwooyo. Osome Abahebrania 1:14.
na abazáana baanze kuba emyeengezi yo mulilo.”1:7 Osome Enzina 104:4.
8 Náho habwo Omutábani akagaamba aáti,
“Íiwe Múungu echitébe chaawe cho obutégeki ne cho obucha no obuchiile,
íiwe nootégeka abaantu baawe aha mazima.
9 Íiwe oyeénda ebizima,
no kutamwa obuzilwa.
Ha bwéecho Múungu, Múungu waawe akutoólize,
akusiigile amazuta agalikukuha amanulilwa,
kuba kukukola oóbe mukúlu,
kuchila bazeenzi baawe bóona.”1:8-9 Osome Enzina 45:6-7.
10 Káandi Múungu akamugaambila Omutábani aáti,
“Íiwe Mukáma níiwe okahaanga éensi aha bubaandizo,
nályo igulu ne emilimo ye engalo zaawe.
11 Ebiintu ebyo byóona bilyaáhwaho,
bilaákokola nko omwéenda,
náho íiwe olama obucha no obuchiile,
12 Íiwe olaábiziinga ziinga ebiintu ebyo nke enkaanzu,
bilaahiindulwa nke emyéenda ya kala.
Náho íiwe tolihiinduka nakáti,
ne emyáaka yaawe tekuhwa.”1:10-12 Osome Enzina 102:25-27.
13 Múungu talamugaambiile maléeka weéna wéena aáti,
“Yikala olubazu lwaanze lwo obúlyo,
kuhika obuchilo óobwo ndita ababisa baawe
iífo ya amagulu gaawe.”1:13 Osome Enzina 110:1.
14 Mbwéenu, bamaléeka ni chiintu chi? Na abazáana ba Múungu, mále ne emyooyo éezo Múungu alagila, zizeénde kwaágalalila abaantu áabo abalichuúngulwa.
*1:5 1:5 Maléeka: Habwo obusoomboozi bwooli osome Obusoomboozi habwa Amagaambo Agagumile.
1:5 1:5 Osome Enzina 2:7.
1:5 1:5 Osome 2 Samweeli 7:14.
1:6 1:6 Osome Okwiizukwa kwe Ebilagilo 32:43.
†1:7 1:7 Omuyaga: Echigaambo echo che Chiyunani chiina ensoonga yo omuyaga no omwooyo. Osome Abahebrania 1:14.
1:7 1:7 Osome Enzina 104:4.
1:9 1:8-9 Osome Enzina 45:6-7.
1:12 1:10-12 Osome Enzina 102:25-27.
1:13 1:13 Osome Enzina 110:1.